Russia do turin Europe a inpeih ta emni?

- Joel Lairemsanga

Kum thum zet Russia leh Ukraine an indo ta a, tawp a hnekin an indo nasa tulh tulh a, nghawng lian zawk a hring ngei dawn niin a lang ta hial mai.

June ni 1, 2025-ah khan Russia ram chhung thuk taka lutin drone hmangin Ukraine hian Russia indo thlawhna hlauhawm tak tak a bomb chhia a, he beihna hi bomb mit nei thawk na chiin Russia hian a chhanglet ve bawk a nih kha. Hei hi thil awm dan tharlam ber a nih mek avangin nuclear indona a chhuak mai ang tih hlauhthawnna a lian zual ta hle. 

Ralthuam lama mi thiamte'n an ngaihdanah chuan Russia lakah hian Ukraine hi dawl zawra zawrin tlawm ta chiah sela chuan Russia hian awm mai mai lovin Europe ram dangte a beih zui nghal chat an ring. Tunah hian Ukraine hi Russia kawlhsenna tuar mektu a ni mek a  tlawm sela chu Russia hian ram dangte hi a beih zui nghal an ring hle. 

French President Emmanuel Macron chuan Europe pum pui himna atan chuan a nuclear ralthuam a sem chhuah tur thu a lo sawi tawh a, America pawhin a nuclear attack aircraft thenkhat chu Europe-ah hian a lo chhawp lawk diam tawh bawk. America hian nuclear ralthuam hlauhawm tak tak 20 zet chu Germany rama Bundeswehr thlawhna tum hmunah a chhawp fel tawh a, heng te hi US President-in code a hmeh hun hunah che chhuak mai thei turin an inring sa reng nghe nghe.

Britain, Germany, Belgium, Italy leh Turkey te'n mawh an lak ngam ve phawt chuan France chu eng hunah pawh che chhuak turin kan inkau reng tawh e tiin French President hian a sawi chhuak ta hial mai. Ukraine chunga a chet duh dan an hmuh hian Poland, Luthuania, Denmark leh Hungary ram te chu Russia hlauhna chhumpuiin a tuam mup mup mek a ni ber e. 

European Union-a ram awm zingah France chauh hi nuclear ralthuam nei ram awm chhun a ni a, nuclear bomb hi 280 vel a neih rin a ni a, heng te hi khawmual, tuipui leh van boruak atanga kah chhuah theih an ni. Brirain hian nuclear ralthuam 225 a nei ve a, nimahsela European Union-ah a tel ve si lo a ni. Americ President Donald Trump-a hi khawi lamah zawk nge a tan tih a chiang si lo a, chuvangin America rama innghata thu thluang thei kan ni lo a, theihtawpin kan insangmar tur a ni tiin Europea Union hruaitute an tawng chhuak ta mawlh mawlh mai. 

Hetih lai hian US hian Germany-ah a nuclear ralthuam a chhawp sa diam tawh tih kan sawi kha hre reng ila. French President chuan Russia leh Ukraine indona avang hian khawvel indopui pathumna hi chhuak lo hram sela kan duh hle a; amaherawhchu indopui pathumna lo thleng thei a ni tih hriain kan inbuatsaih erawh a tul si a ni a ti bawk.

                                I ngaihthlak duh chuan hei hi hmet rawh