Pakistan-in indo thlawhna tha ber chi a nei dawn

- Joel Lairemsanga

China chuan indo thlawhna tha ber chi 5th generation fighter jet J-35 sawmli zet chu Pakistan hnenah hlan a remti. He thu hi official-in a puang chiang tawh nghe nghe bawk. 

Pakistan hian J-35 sawmli zet hi tun atanga kum hnih chhungin a dawn fel hman beisei a ni.

J-35 hi China rama Shenyang Aircraft Corporation-in an siam a ni a, engine pahnih a nei a, van indonaah chungnung hle tura duan a ni a, van atanga lei lam beihna atan a hman theih bawk. Radar-in a hmuh mai mai theih loh tura thiamna sang taka thuam a ni a, a thlawk chakin a inthazo hle a, lei lam leh van lama hman tur ralthuam tam tham tak a paipawn thei bawk.

J-35 hi thiam nal taka thlawhpui tur leh thunun thei turin Pakistan pilot-te'n an lo chul nel tawh hle a, training pawh an lo nei tan diam tawh nia report a ni. 

Pakistan kutah J-35 hi hlan a nih chuan Pakistan hi China tih lohah J-35 nei hmasa ber ram a ni dawn tihna a ni a, Asia khawmualpui chhimlam van boruakah ro a rel thei mai dawn niin mi thenkhat chuan an ngaih phah hial. Van boruaka lal a hrawt theihna atan Pakistan hian a indo thlawhna upa ve tawh tak F- 16 leh Mirage thlakna atan J-35 hi hman a tum ta a ni. 

India hian tunah hian Rafale leh Su-30MKI te hi a innghahna ber an ni a, hengte hi 4.5th generation fighter jet an ni tih hria ila. J-35 khingpha tura ama kutkawih ngeia siam a tum AMCA lah chu kum 2035 velah chauh a thlawh theih beisei a ni si a. Ralthuama lama mi thil chikmite chuan J-35 avang hian Pakistan-in kum 7 atanga kum 14 chhung chu India khumin van boruakah chungnung zawk nihna a hauh thei dawn ta niin an ngai ta hial mai.

Tun dinhmunah J-35 pakhat man hi dollar maktaduai 100 nia ngaih a ni a, 40 zet chu dollar tluklehdingawn 4 zet a tling pha dawn a ni. Tunlai hian Pakistan ram sum leh lai dinhmun a hniam hle a, kum 2024-2025 chhung atana ralthuam lama sum hman tura a dah pawh dollar tluklehdingawn 7.6 chauh a ni a, hetianga ram rethei takin J-35 40 rual ngawt mai a lei tur hi  mi tam takin awih har an tiin mak an ti a, Pakistan hian a talbuai phah an ring hle bawk.

China-in a indo thlawhna tha ber mai Pakistan kuta a hlan phal hian an inkar boruak thatzia a lantir chiang hle a, van boruak mai bakah lei lam leh tuipui lam venhimna kawngah pawh thawh dunna nghet zawk neih zel an tum a, Asia chhimlamah Pakistan hi hawi-pir se tih hi china duh dan a ni a, hei erawh Pakistan thenawm ramte tan mangchhia atan pawha an duh loh tawp tur thu dengkhawng tak a ni thung. 

Tun tuma China leh pakistan leh J-35 hming pathumin chanchin thar a rawn luah ta mai hi Pakistan thenawm ram te chuan bengsika ngaihtuahna hmang chungin uluk takin an lo thlir mek a ni.

                                   I ngaihthlak duh chuan hei hi hmet rawh