CFL HMINGTHANGA LEH A ZAIPUI

CFL-a hla hit leh chuai thei lo “Intawng leh ngei ang aw” tih hi chu mp3 kan ngaithla a, a music video pawh kan en vek tawh awm e. He hla hian music video pahnih a nei a- hmeichhe samsei leh ngil awmna leh hmeichhe samkir awmna. A khawi ber zawk hi nge a zaipui tak tak chu tih zawhna pawh ka tawng ve fo mai.

A hmasain he hla lo pian dan han sawi lawk ila – 

Kum 1992 vel kha a ni ta awm e, Keitum khuaah Concert turin Pu CFL Hmingthanga te hi an kal a, a thianpa erawh mitdawivaih show tur a ni thung. Ticket hi a khuaa miten an buaipui a. Tlai khat chu ticket zuartu zinga nula pakhat chuan a mellh dan a danglam nge a fuh lutuk zawk ni, CFL-a hian a mitmeng awmzia chu hriain zanah a va leng ta nghal pang mai a, a hnu zela an kar thu chu hre lo mahila keini ho kan lo vanneihphah ta, hla mawi lutuk leh chuai tawh lo tur, “Intawng leh ngei ang aw” hi a lo piang chhuak ta a ni.

A sakpui C. Lalkhumi chanchin lungchhiatthlak tak chu –

“Intawng leh ngei ang” tih hla mawi taka CFL-a sakpuitu hi Hnahthial nula hmeltha leh fel, zaithiam C.Lalkhumi (Makhumi) a ni a. Anni unau hi Zoram pum anga lar hluai si loah chuan zaithiam tak an ni vek mai. Hetianga mi biru leh talented tak si CFL-a’n a thur chhuak mai hi a mak ang reng zawk hial mai. A aw a fuh a, an inchawih mawi tawk em em a ni. Makhumi hian pasal a nei a; nimahsela Khuanu ruat loh tur renga duan emni tih mai turin inthlahlel tak siin an awm hrang ren rawn a. Vanduaithlak takin Hrawk cancer a vei zui bawk a. Tichuan a zaipui Thangchhuah Lelte CFL-a chu a aw mawi tak a hnutchhiah hnuin kum 1995, June ni 17 khan Hrawk Cancer avangin he khawvel hi a lo chhuahsan ta a ni. A pasal Lunglei lama awm pawhin hemi kum 1995 vek hian he khawvel hi a lo chhuahsan ve nghal nghe nghe asin. An lainatawm tak zet zet a, a aw mawi tak avang erawh chuan mizo zingah a nung rei khawp ang. A zaipui Pu CFL-a pawh mihring damlai a lo ni tawh bik si lo  a, he hla hi chu a lungchhiatthlak takzet zet mai.

He music video-a samkir zawk hi Makhumi chu a ni e.

*******************************************

"Chhuahtlang Hmun Hlui"  ve thung hi-

He hla hi Hruaitea Ralte phuah anga ziahna hi lehkhabu leh article thenkhatah ka hmu leh zauh thin a, CFL-a phuah a ni lo ti pang pang ngam chu rawn insawifiah ngam sela ka ti thin hle mai. Hriatsual pawhin thupha hi chawi thin tur asin maw le. Thudik hre duh chuan inzawh pawh inthlahrung lo ta ila a tha ngawt mai.

He hla pawh hi hmeichhia leh mipa hla inchhawn tho a ni a. Mi tam takin kan hriat loh thin chu he hlaa hmeichhia a zaipui hi tudang ni lovin Mizoten Pathian thuhriltu lar tak kan neih  mek Pu R. Vanlalzauva nupui Pi B. Lalremtluangi hi a ni teh tlat mai! Pu CFL-a hi Lal Chhungkuaah a lo awm ve tawh a, Pu Zaua te chhung nen hian thawkkhatlai kha chuan an lo awm tlang dal dal tawh a ni. 

HETI ZAWK HIAN LE

-          Joel Lairemsanga

Mithiamte chuan mihringte hi hlawm hnih lian takah then theih niiin an hria a- mi thusawia innghat a, mahnia ngaihdan em em nei lem lo, a tam zawk kal dana kal ve tawp tawp thin te;  mi tam zawk kal dan zawm ve ngawt loa mahni chhia leh tha hriatna thiang hmanga duhtlanna thiang nena kawng zawhte, tiin. He thu hi kristan nun kawngah pawh thil awm thei tak a ni a, Bible thianghlim pawh keu khat ve tak tak, midang thusawi atanga pawm leh rin dan kalpui ta mai te a awm theih a. Thuhriltu ropui Joyce Meyer chuan, “Mi thusawiah i rinna chherchhuan mai suh, nangmah khan i Bible kha chhiar ve phawt rawh,” a lo ti a ni. Mi thenkhatte erawh chu mahni thiam ang tawka Bible zir a, chumi hnuah a thiamte zirtirna dawng leh a, ngaihtuahna thiang tak hmanga Kraws kawng zawh te an ni. Paula te meuh thusawi pawh an rawngbawlna khaw pakhat Beroia mipuite chuan an zawm nghal mai lo, an lehkhabu an keu a, an zirchian hnuah chauh an pawm a nih kha.   Hetianga mi chi hnih kan awmzia tarlangtu tha tak chu Kohhran pawl hrang hrang kan lo awm danah hian a lang chiang a ni. Tun tumah pawh hian mi thenkhatte tana thil thar ni lem lo, a thente tana a lo ni zawk tak anga tih theih tur thu ilo zir ho teh ang u:-  

1. Kraws chanchin

 Tirhkoh Paula chu Atheni khuaah Areopagi an tih hmunah vantlang zingah thusawiin rawng a bawl thin a. Amah mithiam a nih avangin miin an pan hut hut a, a thusawi a tha si, a fing a, a ril bawk a ni. Ringlo mite pawhin a ngaihnawm em mai tiin ngaithla turin an lo kal leh hial thin a ni. Mi zawng zawngin a thusawi an ei a, an lem duak duak mai. Nimahsela khati khawp khan a thusawi ei mahse Atheni khuaah Kohhran a ding tlat lo. A chhan an han chhui chuan Kraws thu reng reng a lo sawi hauh lo chu niin. Khawvel mite tan pawha thu tha tak tak chauh a sawi a lo ni a. Korinth khuaah erawh chuan Kraws thu lo chu sawi tur a neih loh thu leh mihring finna a ngaihnep thu a sawi ta a, in zingah hian kraws thu chauh lo chu sawi tur ka nei hleinem, hriat pawh ka hre lo. Khawiah nge khawvel mifing chu?  Khawvel finna hi atthlak a ni tih Pathianin a hrilh lo emni? a ti piap piap thung a. Khati khawpa khaw tawp leh tenawm, engkim a awm an lo tihna khua Korinth-ah chuan Kohhran tha tak a ding ta thung a ni. Pathian leh mihring inzawmna hmun Kraws thu a sawi chuan mi rilru a khawih a, a eiral ta a ni. Atheni khuaah erawh thung kha chuan thufing tha pangngai chauh a sawi avangin amah Paula  chu a ropui a, Isua erawh a lang ve ta lo a ni.

Keini mizo missionary hmasate leh ringtu hmasate chuan kraws thu chauh an puang a, sawi tur thu dang an pai tlem teh a nia. Chutiang chuan kum 100 chuang kan lo thleng ta. Tunah erawh a dang ta deuhin a lang. Kum khat chhunga Pulpit-a sermon hi lakhawm ta ila chuan Kraws thu hian hmun a chang tlem berin ka ring thin. Thu tha pui pui chu kan ngaithla ngei e, thufing leh ril tak tak, thil tha lo chu ni miah si lo, hnawl dawna ni chiah bik lo; amaherawhchu ringlo mite tan pawha zawm chi ve tho thu pangngai tak tak, philosophy hi a tam berin a rinawm. Kristiante tana a laipui kraws thu hi chu a tlem deuh niin a lang. Nun leh thusawiah hian Kraws atang hian bul i tan leh ngam ang u.

2. Kristian Chhungkua

Kristian chhungkaw din pawimawh thu hi kan hre zing ta hle mai. Kohhran hmeichhiate phei chuan thangkhat lian zet an lo bei ta. Nuho pawh hi an harh tlai hle hian a hriat mai. Pasal fanaute an han neih a, an fate an lo lian a, an thu an awih loh hnuah daih hian harh chhuakin Kristian chhungkua hi an ngaipawimawh thar ni berin a lang thin. Nulat tlangval laia kristian chhungkaw dinpui theih tur zawng mau hauh si lo, fanau din vek tawh hnua kristian chhungkaw din ngaihpawimawh thar hi chu kei chuan a sawt ka ring lo bur mai. Hetia kan sawi avanga sawt lo hulhual a ni tihna erawh a ni chuang lo. Paho phei hi chu tlangval lai atanga harh lo tak tak hi a tam zawk an ni. Tlai taka harh chhuak an awm zeuh zeh laiin harh chhuak ta miah lo pawh tam tak an awm ve a ni. 

Kristian chhungkua kan ngaih dan hi thlak a fuh lo maw aw ka ti thin. Kan ngaihdanah hi chuan Kristian chhungkua chu mi fel hlang awm khawmna, vantirhkoh ang maia mi thianghlim awmna ang hi ni berin a lang a. Chhungkaw member tin kha thlaraumi em em, Pathian thu awih em em mai ni turah kan dah ngawt thin. Engkim hi Bible atanga zir tur a ni a. Bible bu pumpui han en hian kristian chhungkua hi a lo dah pawimawh lutuk hauh lo. A hnampum Israel kha Pathian chhungte tiin tarlan thin a ni a, Juda chhungkuaah phei chuan hmeichhia leh naupangte hian sawi an hlawh lo hle mai.  keini ngaihdana chhungkaw bil te te, member tlem te te hi zirtirna a lo pe vak hauh lo. Keini ngaihdan atanga teh chuan rinnaa kan Pa Abrahama ngat pawh hi rinna pa han tih tur hi chu a ang lo mawle. Pathian thutiam ropui tak a nei a, chi thlah tura tiam a ni. A nupui Sari a ching si a, a bawihnu Hagari nen fa an nei dun a, a nupui Sari hriatpuinain a nei a ni. Chu chu Pathian hriatpuina chu a ni ve tlat lo. Hetianga bawih laka fa nei leh hmei neih hi keini rilru atanga teh chuan kristian chhungkaw rau chu a ni lo nghal phawt. A thlahte zel han chhui pawhin a fa Isaaka nupui Rebeki pum chhungah Jakoba leh Esaua an inmil lo nghal pang a, a ropui lo hle mai.

 Pathianin chhungkua a buatsaih dan hi engtia ngaihtuah tur nge ni ta le? Jakoba thlahte pawh an fakawm lutuk hran lo, amah pawhin nupui a ngah khawp mai. Davida pawh kha chhungkaw ropui tak chu a ni lo, a fapain a in chhungah lalthutthleng a chuhpui ngat ngat mai asin. Puithiam Elia meuh pawh a fate kha inthawina sa temin an hlei ve em em bawk a, an ropui hran lo hle. Kristian chhungkua kan beisei dan, fai thuh mai, vantirhkoh ang maia thianghlim awmna tura kan in beiseina hi chu tlem chuan bansan a tha ngawt mai. Bible-a mi entawntlak chhungkua kan tih pawh hi chhuidawl tak an vang khawp mai. Hetia kan sawi hian mahni inngaihdam nana tarlan a ni lo. Davida kha khatiang chhungkua dintu nimahse Pathian thuthlung a hre reng a, a vawng nung zel a, a tawpah chuan amah atangin thlah ropui tak an lo chhuak ta zel a ni. Chuvangin chhungkuaa thil pawimawh tak chu tu ber emaw Pathian be eih pha a awm chuan chu chu a ni dawn lawmni Krista lenna chhungkua chu. Kan chhungkuaah fate emaw, unau emaw  sual tak an awm avang hian i zak suh ang u, kan mi hmasate meuh chhungkua pawh an buai ve hle. Nimahsela kan chhung zingah Pathian be eih pha leh a thuthlung vawng nung tlattu awm zel tum tur a ni thung ang.

3. Kohna leh Inpekna

Kohhran rawngbawlna huangah hian inpekna(commitment) hi kan ngaisang a, kan chawisang bawk a. Missionary atana inpete pawh chanchinbuah hial chhuahin kan hlutzia kan lantir thin. Hlut pawh a hlutawm reng e. Nimahsela kan Bible hi han en ila, inpekna hi a ngaihlu lo chu a ni lo, a aia hmasa zawk a awm a, chu chu  kohna (Calling) hi a ni. Pathianin a rawngbawl turin min ko em tih hi kan chiang hmasa tur a ni a. Kohna a chiang phawt ang a, inpeknain a zui tur a ni a. Kan ramah hi chuan inpekna hi kan uar a, a ko reng em tih zawhna hi kan dawl mang lo a ni. Chu chu kan tlo lohna pakhat a ni. Thuthlung hluia Lalpa zawlnei ho hi an inpe hmasa ngai lo; a ko te te phawt thin a ni. An huphurh em em a, in hnenah ka awmzel dawn alawm a tih avangin inpeknain a zui ta thin a, zawlnei ropui kan lo ti thei ta chauh thin a ni. Pathian rawngbawltute pawh hian Pathian hian min ko tih kan chian chuan kan huaisen zual a,  min tichak a, hnehna pawh hi kan ta a lo ni zui thin a.  Inpekna hi ropui viau mahse kohna a hmasak loh chuan chapona hi a rahchhuak duh khawp mai. Kan rama harhna a tlo loh nachhan pakhat pawh hi a ni thei awm asin.

4. Pianthar leh sual huat

Ringtuten kan tlakchham tam tak zinga mi chu sual huat hi a ni. Sual kan haw lo lutuk te hi kan thlarau chan tineptu a ni a, Thufingte 8:13-ah chuan, “LALPA tih chu sual huat hi a ni” a ti tawp mai a ni. Thlarau Thianghlim-a harhna, hlim leh lawmna kan chante hi Pathian hnathawh chu a ni ngei e;nimahsela sual kan huat chhunzawm ta lo lutuk thin hian min vaw chhe let der thin chu a nih hi. Tin, a kawng pawh a ni lo reng reng. 

Thlarau Thianghlim hi miin a chan chuan a thil hriatchian chu- Sual huat hi a ni. Nih sual leh misual a nih a hre phawt a, chutah chuan sual huatnaah hruailuh a ni a, amah pawh a inten thin a, chutah chuan Pathian khawngaihna hi a lo thleng a, a nun a siamthatsak a, tihdanglamin, siamtharin a lo awm thin a ni. Keini mizote thlarau chang ve hi chu kan sim lai ber pawh hriat mang loh hian kan hlim vut a, kan phur em em a, a thenah phei chuan Thlarau Thianghlim hnathawh timualphotuah kan tang ta mai thin a ni. Chuvang chuanin kan sual hua pawh hi midang hua kan ni tlat mai a ni. Sualte hi kan haw em em mai a, sualna tak a kha kan haw mang hauh lo. Corruption haw em em anga langte pawh an han sem ve chuan ngawi hmak theite hi kan tam tawh em em a, an chan ve loh avanga haw ngawih ngawih anga lak lek an lo ni awm asin maw! An inthup thin a, mitdel biru ang maiin an langsar em em lawi si a ni.  He corruption duh lohna, thil dik lo duh lohna lam hi a tla na lo em em chu a ni si.

Kan thil huat dante pawh hi a fel tawh lo a ni. Eng mi leh engtianga nasa sual pawh timi ni mahse Pathian chuan a hmangaih reng a; nimahsela misualte sualna lai tak kha chu a hua a, keini pawhin kan haw tur a ni. Dem chungin khawngaih rawh u a tih te hi a ni. Sual huatna tak tak nen piantharna chan i tum teh ang u.

5. Simna tak tak chu

Mi tam takin simna kan sawi reng reng hian ‘ti lo’ sawi nan kan hmang a ni ber a. A ti tawh lo, a sim tawh, zu in khan a sim tawh, tih lam hlir hian sual sim kan sawi a. Kan Bible-in sual sim a sawi dan erawh chu tihlai bansan mai a ni lo a, chu simna chuan a simtu nunah khan rah a chhuah  thin a ni.  Thil sual ti khan a bansan mai ni loin a thain a thlak a ni. Zu zuar zuar ta lo pawh an tam alawm, thlarau thianghlim hnathawh vang pawh a ni lo, an zuar lo ve mai a ni. Zu in thin in ta lo pawh an tam mai, thlarau thianghlimin a simtir pawh a ni lo, an taksain a chhiatpui zel avanga in ta lo mai te an ni. Chuvangin simna chuan a simtu nunah sual huatna a thlen a, chu chuan rah tha a chhuah ta thin a ni.

6. Naamana leh mizote

Naamana sal hmeichhe naupang chanchin (2Lalte 5: 1-4) kan zir hian Naamana nunah hian zir tur a awm thu hi kan tarlang fo thin. Chu chu engdang ni lovin khatiang khawpa sipai ropui ni siin hmeichhe naupang thu mai mai awiha Israel ram a pan ta mai te, zawlnei thusawi awiha Jordan luia a inchiah duh te kha a inphahhniam thei kan ti a, entawntlak hlein kan hria a nih hlawm hi.

Kei chuan Naamana hi a entawntlak em em bik chuanna ka hre lutuk thin lo. A phar natna kha tihdam a duh a, a damna tur chu a ti a ni ve mai. Keini dam duh huam huam mizote tan lek phei chuan a thiltih hi a ropui bikna a tlem teh asin. Kum 2000 hnu lam hretah khan khitah Champhai khawchhak kila Hruaikawn khuaah chuan Pu Tawka chuan tawngtai dam theihna a chang tiin Zoram hmun hrang hrang atangin kan pan khawm ruih ruih a, Zoram pawn atang te hial pawhin an pan a, thingtlang kilkhawr taka awm, tum khata motor pakhat chauh kal theihna leh metalled road pawh ni lo, fur lai phei chuan motor tang berh luaia nawr chawp ngai a nih hre chung pawhin Officer lian ber ber atanga a rethei ber thleng pawhin kan pankhawm nitin thin a nih kha. Kum 2005/6 vel khan Myanmar rama Muchhip tlangah tihdam rawngbawlna a rawn lar leh a. Nu derdep ve tak Pi Darmani rawngbawlna a ni. Khur an laih chu Bible-a lui hming hrang hranga koin a tuk zinga tui tling chu damna atan an hmang thin a ni. Hei pawh hi Zoram leh Zoram pawn hmun hrang hrang atangin kan pankhawm leh luih luih mai a nih kha. Hetia kan sawi hian tihdam rawngbawlna kan sawinep tihna erawh a ni lo. Tihdama awm kan thlakhlelhzia tarlanna mai a ni. A thuhrimah mizote hian damdawi tualchher tak tak hi kan ngah teh a nia aw! Zun thlum natna tih te, thisen sang natna leh natna hrang hrang tuar tana damdawi nia sawi ei chakawm loh pui pui, a then phei chu tenawm rawngkai ni zawk, nuih tiza em em mai te pawh damna nia kan hriat tlat avangin tenawm pawh sawi loin kan ei bawrh bawrh thei zel a ni. 

Pum na leh khawsik chauh hi kan Pathian hian a tidam thei kan ti emaw ni, kan han tawngtai ve mai a. Nimahsela pum na leh khawsik ni lo natna dangah hi chuan tawngtai hman pawh hi kan tlem teh asin, Hospital leh Specialist Doctor hming hi kan lam chul tawh mai chu a nih hi. Hetiang taka dam duh mizote kan ni a. Chuvangin sipai hotu Naamana’n a phar damna tura an sawi, a dam ngei ngei dawn tih pawh a hriatlawk loh pawh nimahse Jordan luia vawi sarih a inchiah hi mizote tan ngat phei chuan thilmak leh zirtlak a ni hran lo. Bible-ah hian Jordan lui tui chu a nu a, a rimchhe hle tih pawh a inziak hleinem, a lo fim phian maithei bawk a, chuta inchiah mai mai chu a har lo a ni. Tun hnua Jordan lui tlawh te pawhin lui tui nu tak a ni hran lo tih an sawi fo. Vawiin thlengin an la inchiah huai huai tho a ni. Chuvangin Naamana sal hmeichhe naupang chanchin ringawt pawh hi zir fe tham a awm reng a, chutihlaia duhkhawp lo ang maia Naamana nun lehzel entawnna tur zawnga sawikai hi a chuangtlai hlein kei chuan ka hria a, sal naupang nun chauh zir pawh hi a tawk ka ti a, Naamana hi entawntlak em em a nihna ka hmu ve hran lo a ni.

‘L.D Hmeltha’ Hla Hi Tu Phuah Nge?

Thuziak leh tawngkam lamah te ‘L.D Hmeltha’ phuahtu nia insawi an awm ta fo mai.

Mizote zinga thil chimawm tak pakhat chu hla inchuh hi a ni. Mitthi khin hneh loh thu a awm lo ti niawm taka pakhat a boral hnua ka hla tia lo sawi thin hi a chimawm tak zet. Damlai leh damlai ve ve inkhin mai tur a ni a, ka nuih pawh hi a za pha lo, ka haw takzet thin zawk a ni.

Pu CFL-a hla chungchangah pawh hian chuhpuitu hi tui daiput ang mai hian an rawn hnam tuam tuam nitin ta mai! A then phei chu awihawm loh lutuk avanga hnuk tiulh thei te an ni hlawm. Heng mite hian an hla atan an duh tak tak a nih chuan amah Pu CFL-a damlai khan an lo dil ngawng ngawng mai loh ni. Zah nachang lah chu hre lo an tam khawp lehnghal a.

‘L.D Hmeltha’ pawh hi a thenin Hnahlan pa Pu Romankunga’n ka phuah a ni a ti” an rawn ti a, a thenin Muthi pa phuah a ni zawk an ti bawk. Pu CFL-a phuah a nih chian dan chu hre chiang tak tak awm mahse han tarlang ve ila-

Kan hriat angin zaithiam Nl. Zomuanpuii khan a album pahnihna kum 2008, March ni 27 a a siam “Chuailopar” ah khan  “L.D Hmeltha” hi a sa a. Amah Zomuanpuii tawngkam ang diak diakin han tarlang ila-

“Ka pa hian he hla hi nalh a ti thei lutuk a, sa tur pawhin min ti nghe nghe a ni. Nimahsela a phuahtu tak hi a hre mai lova, kan hriat theih dan berah chuan Ngopa khuaa Pi Lalhmunsiami phuah tiin. Pi Hmuni pawh chu kan han bia a, I hla L.D Hmeltha kan sak i phal em tiin kan han dil tawp a, ani chuan a lo phal ve mai bawk a ni. “L.D Hmeltha” tih ve tho, tlangval laka luanliamna hla chu a phuah ve tho a ni awm e. (A phuah chhan a L.D-a pawh hi a takin ka hmu tawh tak e – Zmpi )

Ka album-ah pawh L.D Hmeltha phuahtu-ah hian Lalhmunsiami kan ti ta ngawt mai a, kan lo hresual hle a, a pawi tak tak a ni. Ka audio album ka siam pawh a phuahtu nia kan lo hriat Pi Hmunsiami pawh chu kan han thawn vang vang a, a lo ngaithla ngei chuan a rinawm a; nimahsela a hla phuah zawk a nih loh thu engmah a rawn sawi lova, a ngawi tlang ta reng a ni e, a hla a nih loh thu rawn tarlang vat thei sela chuan a that tehlul nen khan.

Ni khat chu Pu CFL Hmingthanga leh a thianpa hi kan inah an rawn kal vang vang a, Pu CFL-a chuan, “Ka hla te i lo sa thar leh hi ka lawm khawp mai. Nimahsela 'L.D Hmeltha' i sak tur thu hi min hrilh hre lova, min dil hek lo. Ka lawm lo hle mai. Ka hla a nia sin. Chuvangin thupha chawi nan pawisa chawi rawh u” a rawn ti a.  A phut tam ang reng em avangin ka pa chuan tam deuha a hriat thu a sawi ri a, a tawpah chuan Rs. 1000 ah a lungawi ta a. Darkar hnih lai an rawn leng a, tha takin kan inthlah liam a. A hnu zelah pawh a theihna hmun apiangah a phuahtu chu amah a nih thu tarlang tawh tura min tih angin  a hnuah Music Video ka siamnaah pawh phuahtu-ah khan, CFL Hmingthanga tih kan tarlang nghal bawk a. Audio album erawh kan lo peihfel vek tawh avang leh kan lo tihchhuah tawh si avangin a nih tur ang a ni tawh si a, pawi kan ti takzet zet a, phuahtu-ah Pi Lalhmunsiami tihin a kaltlang ta si a.  Pu CF-a pawh a hmaizahawm tak zet zet a, thupha kan chawi a ni",  a ti.    

He thu atang mai pawh hian LD Hmeltha hla hi Pu CFL-a phuah a nihzia a hriat em em mai a ni.

**********************************

LD hmeltha Hla thu dik tak chu-------

Phuahtu: CFL Hmingthanga

Satu: CFL Hmingthanga / Zomuanpuii

Kan hlimlai ni a liam mai tur hi,

Ka phallo aw ka Di nang ngaihlai;

Eng biahthu hria in nge maw suihlung i her tak?

Aw ka ngai em a che luah loh LD hmeltha.

I mawi chuang bik a sin,i lenrual zingah hian,

Fur khawthiang chhawrthla eng i iang e;

Ngaihnobei chuang hmangaih par ka thliah pui silo,

Aw ka ngai em a che luah loh LD hmeltha.

Kan runah nuthai chan min tiam a,

Kan silh leh fen ang fen min tiam a;

Lianchhung a leng ka phu loh val i tawn vang a,

Suihlung min hersan hi tuar a har na ka ti.

Hmangaihna chhingmit del vang em ni?

An hai lo lengzawng ten kan nunhlui;

Kan hlimthla a suihlung kan ruallai ka thlirin,

Ka tuarzo dawn nem maw luah loh LD hmeltha.