BULFEKZAWL

Thingtlang khua ka tlawh ve tawhah chuan Bulfekzawl, Champhai District hi khaw nuam ber pawl a ni awm e. 

A khaw hmun hma hi tuihawk thlifim zung zung thei tawkin a zawl dap a, tun ang thal tui har lai pawhin an kawt kaiah tui a haw liam pur pur mai!

Khua atanga hla lo taka awm Tiau luiin Myanmar lakah min daidang a, he Tiau lui hi mi tam tak tana eizawnna siamtu, Balu leh lui lam sa lakna hmun pawimawh tak a ni.

A panna kawng hi la chhe rih viau mahse a hmun thlen chuan hah a dam sawng sawng thei zu nia! A mi chengte pawh an hawihhawmin an thilphal hle a, an in bula zawngtah leh tengtere min hawntir treuh mai.

INKHAWM LEH ZAI HRUAI

Kum 2009 khan Zoram Pawn Presbytery KṬP Meet Shillong Mizo Kohhran Biak Inah kan nei a. Chairman ber chuan, " Tunah hla ka thlang dawn a, he ka hla thlan hi chu keyboard tel lovin khuangtê leh khuangpui nen chauh kan sa tawh ang. Keyboard kha chu lo dah ṭha ula..." tiin a sawi a, tui takin kan zai ta a ni. 

Thil reng rengin side A leh B a nei an tih angin Keyboard pawh hian Biak In chhunga inkhawm zai a tituiin a titui lo thei hle. Mizoramin kan hmelhriat tirh chuan Biak In chhunga lakluh chi a nih leh nih loh thuah ngaihdan phir lian tak pahnih a awm a. Mizopa kutchhuak a nih loh avangin hnamdang musical instrument anga ngaihna lian tak a awm rei hle. Amaherawhchu kan Biak In meuha kan han sengluh a, thiam taka an han khawih hi chuan zai a chawi nung thei hle a lo ni a, thingtlang kilkhawr taka ngaih thleng pawhin kan lo kawl fir fer ta mai.

Hetiang hi a lo nih takah chuan thiam taka zai chawitu atana hman thiam hi a lo pawimawh ta ber mai. Hmun tam takah keyboard hi ring deuh deuha play, khuangpute tibuai khawpa inmil lova play ka hre tam ta fu. Hla sak nawn titui lo khawpa zai rem lova ri bung bung pawh a tam. Kut ben hial zuk tibahlah thei a!

A pawimawh tak em avangin inzir nana khawih emaw, tlawmngaia khawih te emaw chuan thiam bel zel tura inzir an mamawh em em a, anmahni avangin zai a tuiin a tui lo thei tih hriat a ṭha hle. Chutiang bawkin thiam chiang mang lo chuan hunpui leh inkhawmpui nikhua chuan a tum (play) thiam zawk te zak lova papek nachang hriat pawh a ṭha khawp mai. A thiam zawkte pawhin Kohhran hma ngai rana khawmpui nikhuaah hian keyboard hi chuh chat a ṭha ngawt mai.

Mizote hi zai ngaina hnam kan ni a, musical instrument tel lo chuan zai a theih meuh loh tluk a ni e. Biak In chhunga kan hun hmanna tam tak pawh hi zai leh lâm a ni. Thuhriltu an pawimawh tluk chiahin zai hruaitu (khuangpu, keyboardist) te pawh an pawimawh hle a. Inbuatsaihna nei ṭha thusawi chu a nung ṭha bik ang bawkin zai hruaitute pawh mi bik an nih angin an thiamna leh inpeknaah inbuatsaihna ṭha an mamawh ve hle a ni.

"Engkim thaw thei tawh phawt chuan Lalpa chu fak rawh se".