HMELTHATNA THURUK

By JV Chhakchhuak 

I mawia i mawi chuang e Enchim loh mi thianghlim Van Angel leh Seraf te tluk hial leh Rose par leh Lily, Hawilopar nen, nula hmeltha Chernghaleng leh an sawi hmeltha ram khat lanu hnehin; mahse siamchawp mawina rochan tling lo ral leh mai thin mawina chhuanga inhnangfak ve mai thin, nulate zingah i lo telve mai dah ang tih ka hlau a ni.

Lo hnai la, ka thu ngai teh. Kum sang rorel lo thleng tur tluk hiala dik “HMELTHATNA THURUK” dik tak chu ka han rawlruk teh ang che. Chhaktiang turni chhuakin thlangkawl zamual a liam leh na ngai e tih leh nausen pianghlim chuan hnuntui a mamawh tih pawh lo ringhlel ta mah la ka ngaithiamin awm pawh ka la ti e. Mahse he hmangaihna thuruk zet hi zawng lo ringhlel hlek suh ang che. I mawi a i mawi hluan e. Zoram mawitu Derhken par leh Thangrei, Chawnpui par paw’n an iang zo lo i hmel mawina; mahse lungchim tak a dawn chungin ka han thlir thin che a, lungtiawi lo mit tikhamtu chu mawi lehzual nan ti-a phuahchawp mawi tlereuh incheina, hmelhmai rawng danglamna chi hrang hrang leh sakruang mawina lan loh hlauh vanga khuhtu mumal pawh nei lova i inpenparh velna te khan hmangaihtu che thinlung hi a tihnur thin a ni tih hi theihnghilh hauh suh ang che. 

Thinlung thianghlim si lo puan chang tivar i la nih chhung zawngin hmel zawng a tha “mahse” tih thawm hian i hnung lamah um chein hriat pawh i hre thawi thin reng dawn asin. Thawhchhuah ni si lo, thawhin a phu bak el-euha inchei a, in pen-parh leh ngawt thin nula te hian ngaihsan an hlawh ngai mawlh lo tih hi hria ang che. Puitling i ni ve tawh a, ngaihtuahna fim hmangin tunge i nih i inhriatchian theih vena turin i thinlung darthlalangah Inbih nawn fo ang che. Kangvar lenghawr ang lek-a thli bengna lam lama lengkawi mai mai tur i ni hleinem! Mawi nan tia lunghlu behin i ban tluanin darluan-ngun kual bun khat vek mahla, milem bia te pathian cheimawi ang lek bak englua a anpui chuang law’ng che.

Theihtawp chhuaha incheiin han inhnawih paw vel thin teh mahla, Ni a lo tlangsan a, boruak a lo lum meuh chuan i thlan ti rimchhetu mai a lo chan zawh tak kha. I silh leh fen chu sawi loh, i hmui leh hmai cheinaah ngawt pawh khan thawh chhuah loh cheng tam a luangral asin. Khang te mawlh khan a nia hmangaihtu che thinlung hi tina thin ni!!! Ka zilhhauna che hi haw lo la, ngaithla kiau la, zawm ngei pawh tum la, chuti’n i fin leh fel, i hmel mawina te chu nangma tan mai ni lovin Zoram hmel mawina hial lo ni tur chein ka duh tak meuh meuh che a ni. Chuti’n hei hi hria la – I ropui leh mawina nangmaha awm a nih lai khan, i hmelma lian ber pawh nangmaha awm reng a nih avangin fimkhur hi damdawi hmasa a nih hi ringhlel hlek suh la, chetze kawngah te, inchei danah te mizo i nihna tarlang thei tur hi ngaihluin ngaisang tlat la, i hmai aiin i nun tuai ngun zawk rawh. Chu chu “HMELTHATNA THURUK” chu a ni.

{ * He thu ziaktu JV Chhakchhuak hi zaithiam lar leh hla phuahthiam C. Lalzetluanga, “Heiha Huiha” leh hla dang tam tak hmanga Zoram mipuite lo awi tlei tawhtu kha a ni e. }