CFL HMINGTHANGA TRIBUTE CONCERT {Champhai-ah Ropui Takin Neih A Ni} {A Lungphun-ah Mi 4000 Bawrin Ruai Theh}

Mizo zaithiam leh hla phuahthiam boral ta CFL Hmingthanga Tribute Concert, Champhai Promoters’ Club-in November ni 22, 2012 zana Champhai Parish Hall-a an buatsaih chu mipuiin an hlut hle a, Hall-a leng lo khawp mipui an pungkhawm a ni.

Pi Lalnipuii, Womens’ Commission Chairperson chu Khualduhawm a nih anga thusawi-ah sawm a ni a, Pi Nipuii hian CFL-a puala hun hmanah Khualduhawm atan an sawm chu lawmawm a tih thu sawiin, amah CFL-a nen khan hmai chhanah inhriatna hun an neih loh chhan chu a lar vanglai hun tam zawkah phai lama an awm bo vang a ni tih sawiin, a zai leh hla te hian Mizo lunglenna hla a hril hle a ni a ti.

Khuatha atana sawm Pu C. Dinthanga pawhin CFL-a nena an inhriat tirh dan leh a hnu zeal Mizoram rimawi-ah CFL-a’n Mizo hnam tan mel lung a phun thute sawiin, a hla leh zaite avangin CFL-a chu Mizo hnam zingah hriatreng a ni ang a ti.

Promoters’ Club-in CFL-a puala Tribute Concert an siamah amah CFL Hmingthanga sunna hun siamin, mipui ngawi rengin minute khat an ding a ni.

Tribute Concert hi chhawng hniha kal puiin, programme chhawng khatna Pu Masthanga, Tribute Organising Chairman-in kaihruaiin, Pu R. Rosiamliana, Organising Secretary-in report a pe a, CFL-a khua Samthang khawtlang aiawhin Pu Lalrintluanga, Vice President, Samthang YMA Branch-in CFL Hmingthanga chhungte leh khawtlang aiawhin thu a sawi a ni.

Programme thawhhnihna hi CFL-a hla pual bikin Concert neih a ni a, Aizawl lam atangin Rebecca Lallawmsangi, Biakmuana, Lawmi Khiangte leh H. Lalthakima te an zai a, Champhai District huam chhunga zaithiam hrang hrang pawhin CFL-a hla sain mipui an awi bawk a ni.

CFL-a Lungphun A Ropui

November ni 28, 2012 (Nilaini) khan CFL-a hriatrengna lung chu Samthang khawtlang tangrualin an phun ta a, lungphun hmang hian Samthang khawtlang bakah hmun dang atangin mikhual 1500 chuang an kal khawm a ni.

Kawtchhuah leh amah CFL-a ruang zalhna Samthang thlanmualah Granite-in a lung hi siam a ni a, zing dar 8-ah Samthang kawtchhuaha lungphun hawnna hun chu Pu Pachhunga, DLAO, Champhaiin hmangin zing dar 9-ah Community Hall-ah vantlang inkhawm neih a ni a, chhun dar 12 atangin zaina hun hman a ni a, Champhai District Promoters’ Club atangin zaimi 38 zet an zai a, tlai lamah ruai theh a ni.

CFL Hmingthanga lungphunah hian bawngchal 2 leh vawk 7 talh a ni a, ruai kiltu zawng zawng hi sangli bawr vel nia hriat a ni.

H. VANLALHLANA’N CFL-a LUNGPHUNAH SUM THAWH

November ni 22, 2012 zana Champhai Parish Hall-a CFL Hmingthanga puala Tribute Concert neih zawh takah H. Vanlalhlana chuan tel ve ngei turin ruahmanna a siam fel vek hnuah hmun dangah zaina pawimawh tak a neih thut avangin a tel ve thei ta lova; mahse Vanlalhlana hian programme danga a zainaa a sum hmuh Rs. 3,000/- zet chu CFL-a lungphuna a tul an ganga hman atan Champhai Promoters’ Club Secretary Pu Rosiama (RS-a) hnenah a hlan a, RS-a hian Samthang khawtlang hruaitu CFL-a lungdawh buaipuitute hnenah a hlan chhawng leh a ni. CFL-a damlai khan Vanlalhlana te nen hian hmun hrang hrangah programme lo neiho thin an nih avangin CFL-a boral pawh khan Hlana hi tuarna ber pawl zing a mi a ni.

Source : Lelte Weekly Nov 30 – 6 Dec 2012