Lamine Yamal-a'n Israel pawi a sawi

- Joel Lairemsanga

   Barcelona-in la Liga title an hlawh chhuah ann lawmnaah footballer naupang leh tha za tak Lamine Yamal-a'n Palestina hnam puanzar a vai a, hei hian nghawng a nei thui hle a, Israel Defence Minister chuan he footballer hian Israel mite rilru a tina takzet a, thinurna chi a tuh thar a ni, tiin a sawisel nasa hle. 

   Spanish league title inchuha hnehna an chan avangin Barcelona team-te chuan May 11, 2026-ah khan an chakna lawmin Bus thaw-rawng hmangin khawpui chhungah kawng an zawh a, Barcelona tualchhung sanaa tlai dar 5:00-ah a lawmna an tan a, India sana chuan zan dar 8:30pm a ni. Tualchhung thuneitute sawi danin mi nuai sarih leh singnga zet an pungkhawm a, Barcelona chakna hi an lawm ta a ni. 

   A lawmna kawngzawhah hian kum 18-a upa Yamal-a chuan bus chung atangin Palestina flag hlai tha tak chu uar takin a vai a, hei hi social media hrang hrangah a darh nghal a, khawvel a al chhuak rang hle. Amah ngei pawh hian a thlalak hi a instagram account-ah a post zui ve bawk a, faktu leh seltu a ngah hle.

   A tuk thumna, May 14, 2026-ah chuan Israel Defence Minister Israel Katz chuan social media X kaltlangin footballer la naupang tak hi a dem thu a rawn chhakchhuak a, October ni 7, 2023-a Israel chunga thil thleng rapthlak tak phuba lakna atana Israel-in Hamas laka chet a lak mek laia hetiang thil a thleng hi a pawi takzet a, Israel mite thinlungah thinurna a tisosang zual sawt a ni a ti. 

   Katz hian mipui pawisawi lo thah hreh lo leh Israel chhiatna duh rengtu chu Hamas te hi an ni a, October 7, 2023-a thil thleng khan hei hi a tichiang hle a ni. Hamas tan zawnga chet lakna leh intarlanna reng reng chu mihring nunna zah lohna entirna a ni a ti bawk. 

   Israel minister hian FC Barcelona pawh Yamal-a chet dan hi pawmpui lo turin a ngen a, tharum thawhna leh rawlrala chetna reng reng an thlawp lo a ni tih lantirna atana thuchhuah siam turin a phut bawk. 

   Sawiselna tam tak awm mah se report tam tak chuan Yamal-a hian vantlang hmaah Israel kalh zawngin emaw, huatna thlen zawngin emaw thusawi a nei lem lo bawk alawm mawle tiin an tan ve thung. A pawi ta ber zawk chu Palestinian flag a vai kha a ni a, Israel leh Gaza inkar buaina awm mek kara khatiang thil a thleng kha chu a fuh lem lo hle a ni. 

   Kan sawi tawh angin a thiltih avang hian ngaihdan a phir hlawk a, Palestina tantute chuan Yamal-a thiltih kha thil dik tak, Gaza-a neksawrna tuar mekte inzawm khawm tura infuihna tha tak a ni an ti. A sawiseltute ve thung erawh chuan indo mek laia khatianga chetna khan inthendarh lehzualna leh inhuat zualna bak a thlen lo ang an ti ve bawk. Infiamna ngainatu mi tam tak chuan infiamna huangah politics tui-nu a lut tur a ni lo a, infiamna tualzawl hi politics thila hamthat lakna atan leh remchang zawnna atan hman zui zel a ni tawh tur a ni lo an ti. 

   Barcelona manager Hansi Flick pawhin a ngaihdan a sawi a, "Hetiang thil a thleng hi ka duh lo takzet" a ti. Flick-a hian sawi zelin, "A hma pawhin Yamal-a hnenah chak kan lawm a nih chuan politics a tel tur a ni lo va, football chauh kan ngaihtuah tur a ni tih ka sawi lawk tawh. Engpawhnisela, winger Yamal-a hi a duh dana che tura thu tlukna siam turin a naupang chhia tawh bik lo a, a thutlukna chu ama kuta innghat liau liau a ni e" a ti bawk. 

   Chak an lawmnaah vek hian Barcelona striker Robert Lewandowski pawhin Catalan independence a thlawpzia entirna atan flag chi khat - 'Estelada' a vai ve tho a; nimahsela ani erawh chuan sawiselna a tawk nasa ve lem lo thung. 

   Tun hnaia thil thleng hian a kang kai zau hle a, Gaza-a Israel chet dan duh lohna lantirna Europe leh khawmualpui hrang hrangah huaihawt a nih phah a, sports huang mai bakah hnam thil entirnaah te pawh lantir a ni hial bawk. Report thenkhatin an tarlan danin tun hnaiah mai pawh khan Spain ram bikah chauh pawh Palestina thlawpna tum engemaw zat lantirin kawngzawh huaihawt a ni tawh a, buaina tenau pawh a chhuak fo a ni awm e. Israel chet dan a duh lohzia lantirna atan Spain hian Europe ram dang tam takte ang bawkin kumina neih tur Eurovision Song Contest-ah pawh tel loh tlang a tum nghe nghe a ni awm e. 

   Lamine Yamal-a hi footballer lar mek tam tak zingah a thiamna leh theihnate thlirin hma hun eng tak nei zingah a langsar hle. Kum 18 leka upa a ni chungin Barcelona winger hi club tan leh a ram tana innghahna kulhpui a tling der tawh a ni. 

   Kum 2024-a UEFA Euro-a Spain an champion theihna atan Yamal-a hian a thawh hlawk hle a nih kha. Kum 19 a tlin hma hauhin Spain tan international cap 25 leh goal 6 a hlawh chhuak der tawh. 

   Tunah chuan FIFA World Cup 2026 hian football ngainatute rilru a luah lian hle a, Yamal-a hi Spain tana player thawhhlawk tak a nih a rinawm leh hle. Spain hian June 15-ah Cape Verde an tum dawn a, June 21-ah Saudi Arabia niin June 27-ah Uruguay an tum bawk ang. 

   Tun thlengin Lamine Yamal-a leh FC Barcelona atangin Israel laka insawifiahna leh thupha chawina siam a la ni lo. Infiamna chanchin ziahna chanchinbu lian tak takah chuan sawi zui a la hlawh hle a, khawvela buaina lian thlengin football thlenga nghawng a neih nasat theihzia sawina thuziak chhiar tur tam tak a pun phah hluai mai a ni.