PU LALLIANSAWMA, R.I.P.

- Joel Lairemsanga

"Lal lenna Zion khawpui tual nuam" tih leh kristian hla dang tam tak phuahtu Pu Lalliansawma chu nizan 7:10 p.m. (08/02/2017) khan Chuap Cancer avangin Grace Nursing Home-ah boralin chatuan atan a chawl hlen ta. Ka ui kher mai.

Nikum November Ni 3-a Aizawl Civil Hospital-a ultrasound a rawn tih trum khan kan lo titipui hlut a, amah pawh khan,"In bula awm chu a nuam barh barh hle mai," a ti ve hial asin le!

Lawng chawlhna chunglam Jerusalem-ah chuan muangte'n han chawl teh le.

A Chanchin Tawi:-

Lalliansawma hi October ni 10, 1942-ah Laldanga leh Zachhungi te inkarah a piang a, nupuiah Déngziki neiin fa paruk an nei a. Primary School Zirtirtu niin Darlung khuaah a khawsa a; Presbyterian Kohhranah Tual Upa a ni bawk. Hla 90 zet a phuah. 'Lal lenna Zion khawpui tual nuam' tih hi August ni 1, 1983-a a phuah a ni.

A hla phuah a lar hlawm viau; hriat hlawh zualte:

1. Muhilte tho turin tawtawrawt a lo ri e

2. Van boruak zau takah khian

3. Beramno hnehna van hla mawi ropui ber chu

HLA PHUAHTHIAM PATE-A LEH A TUPA CFL HMINGTHANGA

An inanna:-

* Hla phuahthiam ve ve an ni.

* Mi lunglengmi ve ve an ni.

* Hla phuah tur chuan dai pawnah pawh an chhuak vang vang mai thin.

* Hmun khawharah mahni chauha an awm laiin an phuah tlangpui.

* Khuarel ngaina mi ve ve an ni.

* Mi nun zawi, mi pawi sawi lo mi tak an ni.

* Tisa lamah mirethei leh baihvai an ni.

* Pu Patea hi a pain a thihsan hma a, Pu CFL-a hi a nuin a thihsan hma thung.

* An hringnun zinkawng hi ngaihtuah peihte tan chuan an khawngaihthlakzia a lang thei.

* Nulat tlangval kawngah an to ve ve.

* Khaw hrang hrangah an khawsa/pem kual hnem hle.

* Pu Patea hian hla 55  a phuah nia hriat a ni a; Pu CFL-a hian hla 100 chuang.

* Samthang khuaah lu an phum ve ve.

* Anmahni hriatrengna lungphun a ngaisangtuten an phun ve ve.

* Pathian thuhriltu zuiin an zinchhuak ve ve tawh.

* An chetsualna sawinuam timi an nei ve ve.

* An awm loh hnuah an hla chuhtu an nei ve ve.

* An hming leh an hlate hi mizo hnam a awm chhung chuan a reh tawh ngai lovang.

An inan lohna:-

* Pu Patea hian Pathian hla a phuah ber.

* Pu CFL-a hian lengzem hla leh hla lenglawng a phuah ber.

* Pu Patea hian music cassette a siam lo.

* Pu CFL-a hian music cassette album 12 a siam.

---------------------------------------------------------------------------

PU PATEA (1894-1950) CHANCHIN TLANGPUI

Tualte khua Pu Selbawnga leh Pi Sinnawiin fanu Zohrangi an neih hnuin, kum 1894 khan fapa Zaliana an nei a. Chu an fapa chu a pisil em avangin 'Patea' tiin an ko va. 'Patea' tih a ni hlen ta a. Patea chhang hi Khuangdailova (Pakhuanga tia hriat) a ni a. Chu mi chhang leh chu Ralchhinga a ni. Patea tih loh, anni unaute hian Khawbungah lu an phum vek hlawm.

An pain a thihsan hma avangin Pi Sinnawii chuan a fate a vahvaihpui a. Kum 1903-ah Khawbung lal, Lalbika rawn belin lal Vanlung an ni ta a. Khawbunga zirtirtu hmasa ber Pu Hrangphunga (Phungdawra tia hriat) sikulah Patea hian ziak leh chhiar a thiam a ni. Patea leh Kaphnuni hi Khawbungah chuan Kristian dana innei hmasa ber niin, Tirhkoh Vanchhunga'n a inneihtira. A fate chu Lalengi, Lalauvi, Lalhruaii, Lalhawii, Lalhmingthangi, Lalchungnunga, Lalrema leh Lallianate an ni.

Patea hian hla 55-a phuah a. A hlate chu taima takin Pu B.Lalthangliana'n la khawmin hla 54 a hmu thei a. A hlate hi Pathian pawlnaa phuah a nih hlawm avangin, Kristian hla kan tih hi an ni vek a. Khawhar in, Krismas leh Good Friday vuak vetah sak hlawh tak tak te an ni hlawm.

A hla te hi ram reha Pathian pawl chunga a phuah te an ni a. Ruah sur hnuaiah pawh khum pawh neilo mah se, hla thar dawng turin a fianrial thin a. A ruahthamloh hlate chu in lamah ziak chhuak in a thiante nen an zir ho ta thin a ni. Hla phuah thiam a nih bakah Thuhriltu ropui tak niin, tualchhung leh khaw thenawmah a thu sawi a tlangtla hle a. Kum 1919-ah Burma (Myanmar)-ah Chanchin Tha, Tirhkoh Bankuaia , Pu Tuhniamate nen hrilin Tlangkawiah Kohhran an din a ni.Chutiang taka kohhran chawmtu tha chu ni mah sela, mihring hi kan fel famkim tawk lo theuh va. Lal Davida ngei pawh khan a en loh tur lam zawk, a General Uria nupui Bethsebi inbual lai a en a, a uire sak a nih kha. Pathian hriak thih meuh pawh heta tang hian sualah a tluk luh theih zia kan hre theuh awm e. Rawngbawltu tha hian thlemna an tawk nasa ting mai a lo ni. Patea pawh hi chutiang kawngah chuan a fihlim bik miah lo va. Kum 1922-a kohhran Upaa nemngheh pawh hian Krista lam en lovin nula lam a lo en ve pawh ni fahmiang; nula hmeltha Darngengi nen kohhranin a thunun a. (He Nula hming kan tihlan hi a vahpa Pu Hualkunga phalna laa tihlan a ni.)

Chu tih laia Patea nupuiin fa a hrin chu fuke nei lo, Mizovin 'Lungtat fa' an tih ang hi a ni a. An nupa chuan hum sual a dai vang ni riaka ngaiin "Lalpan min hawisan a nih hi" an ti a. A hnua fa pian kim tha tak an neih leh takah chuan, 'Lalpan min lo la hawisan lo a nih hi' tiin a hmingah LALHAWII an sa a.

Rom 8:11-ah chuan -A nih leh an petekna chu an tluk hlenna tur em ni? Hnai lo ve. An tluk avangin Jaintail-te hnenah chuan chhandamna a lo thleng ta zawk a, tih ang khan -

Zion khawpui ka pan laiin,

Suala hliamin ka lo tlu a;

Nangmah lovin khawvelah hian ka tap Lalpa

Hmana ka lawmna ber Thlarau min hruai leh rawh.

a lo tih phah thei ta hial a ni.

Kum 1939-ah Mualzawl (Myanmar)-ah a pem a. Indopui II-na ah Reiek khuaah tla thlain, Japan tlawm hnuin Kawlzawla chhoh leh tumin khawchhak a rawn pan a. Samthang-ah kum li lek a awm laiin natna khirh takin a tlak buak a. March 23, 1950 khan 'Thih lui kamah zaiin i hming ka fak ang' titu chu Lawng chawlhna tlang thianghlimah a Lalpa hnenah a chawl ta a ni.

( Thu lakna : Mizo Hlakungpui Mual )

********************************************

PU CFL HMINGTHANGA (1967-2012) CHANCHIN TLANGPUI

Pian leh Murna : 1967 November  ni 15-ah Samthang khuaah Pu Khamliana leh Pi Tawksungi te fa mipa 3 leh hmeichhia 3 zingah a tlum ber ni tura lo piang a ni. A nu Pi Tawksungi hian a boral san hma a, Pu Khamliana hian nikum (2011) khan a boral san ve leh ta bawk a ni.

CFL tih hi ‘C’ tih hian a pa hnam Chhangte tih lamin ‘F’ hian a nu hnam Fanai tih a lam thung a, ‘L’ tih hi Lai tihna niin ‘ Chhangte Fanai Lai Hmingthanga’ tihna a nih chu.

Zirna Lam : Samthang khuaah hian a seilian a, Primary School a zawhin Khawbung lamah Middle School leh High School a kal thung.

Sakhuana Lam : Kohhran-ah Samthanga an chhungkua hi Presbyterian Kohhran a awm an ni a, amah CFL-a hian Aizawl lama a khawsaknaah Lalchhungkaw Kohhran zawmin hun eng emaw chen Lalchhungkua-ah a awm hnuin, a hun hnuhnung lamah Presbyterian Kohhranah a let leh a ni.

Infiammi A Ni : Tleirawl chhuah atanga infiamna buaipui em em a ni a, Volley ball leh Football-ah a tui fal a, football-ah keeper tha tak a ni thin a, Samthang ‘A’ teamah a tel nghe nghe a ni. Samthang Games & Sports Association-ah hun eng emaw chen OB-ah lo tel tawh a ni. CFL-a hian Samthang-a a khawsak chhungin NGO hrang hrangah a tel thin a, hawlh lawr ber pawl a ni.

Zai leh Rimawi lamah : Rimawi lamah naupan tet atanga rilru pe lian em em, Tonic Solfa phei chu thiam tak a ni. 1980 bawr chho velah a thiante nen Zoawi Virthlileng Group dinin, heath hian lead guitar a perh a, Tuipuiral Beat Contest-ah pakhatna an ni nghe nghe a ni. 1983 atangin mal zaiin a kal tan a, Tuipuiral Meet-a zai intihsiaknaah a tel tawh chuan lawman pakhatna a dawng zat zat thin.

Zai Lam Hmasawn Tumin Aizawl-ah : He Samthang tlangval hmeltha leh hawihhawm, feet 5.8 zata sang CFL Hmingthanga hian zai lama hma sawn zel duhin 1989 atangin Aizawl-ah awm hmun rawn khuarin Aizawl Venghlui-a hmeithai Pi Rodi-i chu belin, Pi Rodi-i hi ‘ka nu’ tiin a ko ve mai thin. Zai thin hla phuanh bawk thin a nihna chu mite hriat vak la ni lo mahse, a album hmasa ber ‘Ngaihlai Masang’ tih chu Pi Rodi-i tanpuinain Tlangnuama Pu Sanglianthanga Studio-ah Cassette pakhat-a hla 12 awmna chu Rs. 5000/- in an siam tir a, tum khatah a copy siam tamna tur sum a neih loh avangin copies 100 bawr vel atangin cassette zawrhna thler Zion Street-ah chuan a zawrhtir ve ta a, a cover pawh thlalak bel chawpin, chu pawh chu thlalak order chawp zelin a siamtir a ni. He album hi a belchiangtu ten an ngaina hlawm hle mai a, kar lovah copy za chu an hralh a, chutah order a tam tial tial a, kar tin copies 1000 te a vanglai chuan an hralh chhuak ta mai a ni. Lelte-ah pawh ‘Tunge CFL Hmingthanga hi, a va zaithiam em em ve le’ tia zawhna an dawng teuh mai.

A Lar Chho Ta Zel : Lelte Recording kha kha tihlai chuan zaithiam lar te belh ber a nih avangin CFL Hmingthanga pawhin Lelte produce turin album siam tumin hma an la a, cover leh engkim tih fel hnuah, ‘Roosna Hmeltha’ tih chu Otto Recording-in an produce ta zawk a ni.

CFL-a hian album chi hrang hrang 12 lai a lo siam hman a, chungte chu –

1. Ngaihlai Masang

2. Roosna Hmeltha

3. Chhanlet loh Hmangaihna

4. Kur Diam Diam

5. Tunge Hmeltha Ber

6. Lam dun ang/ I tan ka lo kir leh

7. Min hriat chhuah tir

8. Hlim la nui rawh

9. Ka Star No. 1

10. Theihnghilh ngai loh

11. Lemchan Khawvel

12. Hla Inchhang Special

tihte an ni.

Heng bakah hian Collection hrang hrangah zai tura sawm a nih angin a zai nual a, a hunlai na na na kha chuan Collection-a a zai a tel tawhna-ah chuan an hralh thei bik tih a ni thin.

Hlaphuah Lam : Tleirawl chhuah atanga hla phuah hrat tak, a rilru a chak em avangin hla phuah pawh a awlsam hle a ni. A album hmasa ber ‘Ngaihlai Masang’ tihah hian khatih laia Lalchhungkua a a rawngbawlpui Pi B. Lalremtluangi (Mrs R. Vanlalzauva) khan a album-ah hian a zaipui nasa em em a, a hla sak tam zawkah khan a part a pek sak vek nghe nghe a ni.

A hla phuah hi chhut danin 100 bawr vel niin a hriat a, a album 12 a hla zawng zawng hi amah CFL-a phuah deuh vek a nih avangin, a tlem berah za hi chu a phuah hrim hrimah ngaih a ni.

A hla phuah pakhat,’Intawng leh ngei ang’ tih audio a C.Lalkhumi (L) nen an inchhawnna hla phei chuan LPS Top 10 Count Down-ah thla thum chhung kha number one a hauh a, hei bakah hian kum 1992 chhunga kum khat chhunga LPS hla thlangtu ngah berah puan a ni bawk.

1991 atangin AIR : Aizawl-ah hla a record tan a, chhinchhiah danin hla 45 a record a, a hla tam zawkte hian AIR : Aizawl hla thlan hun a luah hlawm a ni. Radio-ah hian B High Graded Artiste a ni nghe nghe a ni. Aizawl Doordarshan-ah pawh Music Video-in hla 12 bawr vel a record a, local channel-ah hian tum li hla a record bawk.

A Mak A Makin A Lar : 1991-1995 bawr chho velah chuan Mizo mipa zaithiam lar leh album pawh hralh tla ber a ni chho a, he a larna hi atan harsatna thlentu a ni ang tih hria se zawng a buai em em lo tur. A hmel a tha a, a zaithiam a, rual pawl dan thiamine, nula try dan hrang hrang pawh a zei hle a ni ang. A bik takin a zai leh hmel hian Zokhaw nula lam a awi thlu deuh zel a, a nungchang duhawm lo laite chu nula tam takin an hai der tlat a ni mai e.

Hun Hnuhnung : Zaimite tan hautak tak mai ‘Zu’ leh ‘Nula’ chu atan pawh thlemtu lian an ni a, hei hi a chhiatpui a ni ta ber. Kum 2000 a rawn herchhuah meuh chuan a takin a nitin nun hman dan chu tlin bik ta hek lo le, a rawn lang chhuak tan a, zawi zawia awngrawpin, zai lamah phei chuan a inhmang hlei thei ta lo a ni ber. Mipui hmaah pawh a zai thei ta meuh lova, mipui hma a a zai hnuhnung ber nia hriat chu 2010 June ni 10-a Samthang Community Hall-a a zai kha nia hriat a ni. Kum 2012 a rawn her chhuah meuh chuan tlangval hmeltha leh sang thlerh thlawrh chu thimin a kap zo ta, TB natna a lo vei bawk nen, Samthang lamah khawsa chhoin tlem tlema tha chho deuha a inngaih lain September ni 7 khan a insawiselna a zual deuh a, Khawbung PHC panpui a ni a, September ni 9, 2012 zan chuan a darker telin a hniam thla zel a, dar 10:45 a thlen mueh chuan CFL-a a awm ta lo tih a lo ri ta.

Nupui Fanau Lam : Zaithiam lar tam tak hi nupui pasalah an tluang lo tih hi ani chungah pawh a thleng dik ve khawp mai. Nupuia sawi hi eng emaw zah an awm na chungin a boral lai hian nupui a nei lo thung. Fa erawh 4, fapa 2 leh fanu 2 a nei a, chungte chu – Vanlalrema, Lalremtluangi, Hmingthanpuii leh Lalthangliana te an ni a, Mizoram khaw hrang hrangah an awm hlawm.

Zoram Mipuiin An Sun : CFL Hmingthanga boral thu Mizo mipuiin an hriat hian an ngaihtuahna chu amah vui ni hian Samthang lam a hawi thup a ni ber a, AIR : Aizawl chuan CFL Hmingthanga pualin darker chanve zet hun a hmang a, a chanchin leh a zai record tawhte a tichhuak hlawm a ni.

Cable TV pahnih ZONET leh LPS pawhin CFL-a pualin hun an hmang a, a Music Video te pawh an tichhuak nasa a ni. Cable TV News leh Aizawl chanchinbu zawng zawngah CFL-a chanchin hian a lailum a luah vek a, khawlai titi lian ber a tling.

Mizo zaimi Inzawmkhawm Gen. Hqrs pawhin thuchhuah siamin CFL Hmingthanga an member an uizia an sawi a ni.

Champhai Promoters Club-in Ral : Champhai District-a zai leh rimawi lama hma la liantu ber Champhai Promoters’ Club chuan CFL Hmingthanga ruang nghah tuk September ni 11, 2012 khan Champhai atangin Samthang-ah CFL-a ral turin Car 3-in an member 20 zetin Samthanga CFL-a te inah an va ral a, Champhai Promoters’ Club hian hun remchang hmasa berah CFL-a Tribute Concert pawh Champhai-ah buatsaih an tum thu an puang nghal bawk. November 22, 2012 zan khan Champhai Parish Hall-ah hlawhtling takin an buatsaih a ni. 

Champhai Promoters Club aiawhin Pu C. Huaisavunga’n CFL-a chanchin a sawi a, Pu Hruaia, Pu R. Rosiamliana leh zaithiam eng emaw zah an tel a ni.

( Source : Lelte Weekly ) )

CFL HMINGTHANGA LEH A ZAIPUI

CFL-a hla hit leh chuai thei lo “Intawng leh ngei ang aw” tih hi chu mp3 kan ngaithla a, a music video pawh kan en vek tawh awm e. He hla hian music video pahnih a nei a- hmeichhe samsei leh ngil awmna leh hmeichhe samkir awmna. A khawi ber zawk hi nge a zaipui tak tak chu tih zawhna pawh ka tawng ve fo mai.

A hmasain he hla lo pian dan han sawi lawk ila – 

Kum 1992 vel kha a ni ta awm e, Keitum khuaah Concert turin Pu CFL Hmingthanga te hi an kal a, a thianpa erawh mitdawivaih show tur a ni thung. Ticket hi a khuaa miten an buaipui a. Tlai khat chu ticket zuartu zinga nula pakhat chuan a mellh dan a danglam nge a fuh lutuk zawk ni, CFL-a hian a mitmeng awmzia chu hriain zanah a va leng ta nghal pang mai a, a hnu zela an kar thu chu hre lo mahila keini ho kan lo vanneihphah ta, hla mawi lutuk leh chuai tawh lo tur, “Intawng leh ngei ang aw” hi a lo piang chhuak ta a ni.

A sakpui C. Lalkhumi chanchin lungchhiatthlak tak chu –

“Intawng leh ngei ang” tih hla mawi taka CFL-a sakpuitu hi Hnahthial nula hmeltha leh fel, zaithiam C.Lalkhumi (Makhumi) a ni a. Anni unau hi Zoram pum anga lar hluai si loah chuan zaithiam tak an ni vek mai. Hetianga mi biru leh talented tak si CFL-a’n a thur chhuak mai hi a mak ang reng zawk hial mai. A aw a fuh a, an inchawih mawi tawk em em a ni. Makhumi hian pasal a nei a; nimahsela Khuanu ruat loh tur renga duan emni tih mai turin inthlahlel tak siin an awm hrang ren rawn a. Vanduaithlak takin Hrawk cancer a vei zui bawk a. Tichuan a zaipui Thangchhuah Lelte CFL-a chu a aw mawi tak a hnutchhiah hnuin kum 1995, June ni 17 khan Hrawk Cancer avangin he khawvel hi a lo chhuahsan ta a ni. A pasal Lunglei lama awm pawhin hemi kum 1995 vek hian he khawvel hi a lo chhuahsan ve nghal nghe nghe asin. An lainatawm tak zet zet a, a aw mawi tak avang erawh chuan mizo zingah a nung rei khawp ang. A zaipui Pu CFL-a pawh mihring damlai a lo ni tawh bik si lo  a, he hla hi chu a lungchhiatthlak takzet zet mai.

He music video-a samkir zawk hi Makhumi chu a ni e.

*******************************************

"Chhuahtlang Hmun Hlui"  ve thung hi-

He hla hi Hruaitea Ralte phuah anga ziahna hi lehkhabu leh article thenkhatah ka hmu leh zauh thin a, CFL-a phuah a ni lo ti pang pang ngam chu rawn insawifiah ngam sela ka ti thin hle mai. Hriatsual pawhin thupha hi chawi thin tur asin maw le. Thudik hre duh chuan inzawh pawh inthlahrung lo ta ila a tha ngawt mai.

He hla pawh hi hmeichhia leh mipa hla inchhawn tho a ni a. Mi tam takin kan hriat loh thin chu he hlaa hmeichhia a zaipui hi tudang ni lovin Mizoten Pathian thuhriltu lar tak kan neih  mek Pu R. Vanlalzauva nupui Pi B. Lalremtluangi hi a ni teh tlat mai! Pu CFL-a hi Lal Chhungkuaah a lo awm ve tawh a, Pu Zaua te chhung nen hian thawkkhatlai kha chuan an lo awm tlang dal dal tawh a ni. 

‘L.D Hmeltha’ Hla Hi Tu Phuah Nge?

Thuziak leh tawngkam lamah te ‘L.D Hmeltha’ phuahtu nia insawi an awm ta fo mai.

Mizote zinga thil chimawm tak pakhat chu hla inchuh hi a ni. Mitthi khin hneh loh thu a awm lo ti niawm taka pakhat a boral hnua ka hla tia lo sawi thin hi a chimawm tak zet. Damlai leh damlai ve ve inkhin mai tur a ni a, ka nuih pawh hi a za pha lo, ka haw takzet thin zawk a ni.

Pu CFL-a hla chungchangah pawh hian chuhpuitu hi tui daiput ang mai hian an rawn hnam tuam tuam nitin ta mai! A then phei chu awihawm loh lutuk avanga hnuk tiulh thei te an ni hlawm. Heng mite hian an hla atan an duh tak tak a nih chuan amah Pu CFL-a damlai khan an lo dil ngawng ngawng mai loh ni. Zah nachang lah chu hre lo an tam khawp lehnghal a.

‘L.D Hmeltha’ pawh hi a thenin Hnahlan pa Pu Romankunga’n ka phuah a ni a ti” an rawn ti a, a thenin Muthi pa phuah a ni zawk an ti bawk. Pu CFL-a phuah a nih chian dan chu hre chiang tak tak awm mahse han tarlang ve ila-

Kan hriat angin zaithiam Nl. Zomuanpuii khan a album pahnihna kum 2008, March ni 27 a a siam “Chuailopar” ah khan  “L.D Hmeltha” hi a sa a. Amah Zomuanpuii tawngkam ang diak diakin han tarlang ila-

“Ka pa hian he hla hi nalh a ti thei lutuk a, sa tur pawhin min ti nghe nghe a ni. Nimahsela a phuahtu tak hi a hre mai lova, kan hriat theih dan berah chuan Ngopa khuaa Pi Lalhmunsiami phuah tiin. Pi Hmuni pawh chu kan han bia a, I hla L.D Hmeltha kan sak i phal em tiin kan han dil tawp a, ani chuan a lo phal ve mai bawk a ni. “L.D Hmeltha” tih ve tho, tlangval laka luanliamna hla chu a phuah ve tho a ni awm e. (A phuah chhan a L.D-a pawh hi a takin ka hmu tawh tak e – Zmpi )

Ka album-ah pawh L.D Hmeltha phuahtu-ah hian Lalhmunsiami kan ti ta ngawt mai a, kan lo hresual hle a, a pawi tak tak a ni. Ka audio album ka siam pawh a phuahtu nia kan lo hriat Pi Hmunsiami pawh chu kan han thawn vang vang a, a lo ngaithla ngei chuan a rinawm a; nimahsela a hla phuah zawk a nih loh thu engmah a rawn sawi lova, a ngawi tlang ta reng a ni e, a hla a nih loh thu rawn tarlang vat thei sela chuan a that tehlul nen khan.

Ni khat chu Pu CFL Hmingthanga leh a thianpa hi kan inah an rawn kal vang vang a, Pu CFL-a chuan, “Ka hla te i lo sa thar leh hi ka lawm khawp mai. Nimahsela 'L.D Hmeltha' i sak tur thu hi min hrilh hre lova, min dil hek lo. Ka lawm lo hle mai. Ka hla a nia sin. Chuvangin thupha chawi nan pawisa chawi rawh u” a rawn ti a.  A phut tam ang reng em avangin ka pa chuan tam deuha a hriat thu a sawi ri a, a tawpah chuan Rs. 1000 ah a lungawi ta a. Darkar hnih lai an rawn leng a, tha takin kan inthlah liam a. A hnu zelah pawh a theihna hmun apiangah a phuahtu chu amah a nih thu tarlang tawh tura min tih angin  a hnuah Music Video ka siamnaah pawh phuahtu-ah khan, CFL Hmingthanga tih kan tarlang nghal bawk a. Audio album erawh kan lo peihfel vek tawh avang leh kan lo tihchhuah tawh si avangin a nih tur ang a ni tawh si a, pawi kan ti takzet zet a, phuahtu-ah Pi Lalhmunsiami tihin a kaltlang ta si a.  Pu CF-a pawh a hmaizahawm tak zet zet a, thupha kan chawi a ni",  a ti.    

He thu atang mai pawh hian LD Hmeltha hla hi Pu CFL-a phuah a nihzia a hriat em em mai a ni.

**********************************

LD hmeltha Hla thu dik tak chu-------

Phuahtu: CFL Hmingthanga

Satu: CFL Hmingthanga / Zomuanpuii

Kan hlimlai ni a liam mai tur hi,

Ka phallo aw ka Di nang ngaihlai;

Eng biahthu hria in nge maw suihlung i her tak?

Aw ka ngai em a che luah loh LD hmeltha.

I mawi chuang bik a sin,i lenrual zingah hian,

Fur khawthiang chhawrthla eng i iang e;

Ngaihnobei chuang hmangaih par ka thliah pui silo,

Aw ka ngai em a che luah loh LD hmeltha.

Kan runah nuthai chan min tiam a,

Kan silh leh fen ang fen min tiam a;

Lianchhung a leng ka phu loh val i tawn vang a,

Suihlung min hersan hi tuar a har na ka ti.

Hmangaihna chhingmit del vang em ni?

An hai lo lengzawng ten kan nunhlui;

Kan hlimthla a suihlung kan ruallai ka thlirin,

Ka tuarzo dawn nem maw luah loh LD hmeltha.