𝐆𝐨𝐚𝐥𝐤𝐞𝐞𝐩𝐞𝐫 𝐥𝐚𝐫 𝐭𝐡𝐚𝐫 𝐭𝐡𝐮𝐭 - 𝐕𝐨𝐳𝐢𝐧𝐡𝐚 𝐜𝐡𝐚𝐧𝐜𝐡𝐢𝐧 𝐧𝐠𝐚𝐢𝐡𝐧𝐚𝐰𝐦

- 𝐽𝑜𝑒𝑙 𝐿𝑎𝑖𝑟𝑒𝑚𝑠𝑎𝑛𝑔𝑎

     June 15, 2026-a Atlanta Stadium-a inkhel tihtawpna hamrik a rik rual chiah chuan  cameraman- te chuan Cape Verde goalkeeper Vozinha lam an pan nghal hum hum mai.

     Kum 40 mi goalkeeper hi a tap a, a hringnun zinkawnga hun harsa a lo paltlang tawh te chu a rilruah a lo lang chhuak zut zut mai a lo ni. He thil hi World Cup-a champion tura rin kai Spain nen goal lut awm lova an inhnehtawk hnua thil thleng a ni.

     Cape Verde tantu mipui sang tam tak, minute 90 chhung tawp lova au te chu an phur em em a, an inpawm a, an lam a, result an hlimpui takzet. Khelmualah pawh player-te chu an hlimzia lantirin an inkuah chuk chuk a, neutral mi tam tak te pawh inkhel ropui en hian an lo phur ve em em a, game a tawp hma hauhvin Cape Verde hi an lo lawmpui ve hial mai.

     European champion Spain lakah goalkeeper Vozinha chuan goal ven a thiamzia a lantir a, goal a chhuah duh tlat loh avangin a ram tana World Cup-a result hriatrengtlak a hlawh chhuak ta a ni.

     

“Ka tap lo thei lo a ni. Ka pi leh ka pu te bula seilian ka ni a, anni erawh chu khawvelah hian an awm ve tawh lo. Kum tam tak liam taah khan an boral tawh a ni. Anni kha ka tan chuan engkim an ni a, min chawi liantute an ni” tiin player of the match-a thlan a nih hnuah Vozinha chuan a sawi.

     

“Ka nu vang pawhin ka hnuk a ulh a ni. Visa man a to em avangin a hun takah kan inbuatsaih hman lo a, visa vangin hetah a lo kal thei si lo a ni. A hmunah lo kal ve se ka ti khawp mai.”

     

Vozinha chuan sawi belh zelin, “Kan team ka chhuanna ber chu kan inlungrualna hi a ni. Player tupawh lo tel se, chhungkua ang maiin kan inen thei vek a, hei hi kan chakna thuruk chu a ni. Mi thenkhat chuan nuam chen mai mai turin World Cup hi khel satliah turah min ngai a, mahse a ni lo. Team zahpuiawm loh ber kan ni tih kan hria a, hei hi kan World Cup khelh vawi khatna a ni bawk. Kan ram tana theihtawp chhuaha khel tura thawk chhuak te kan ni." a ti.  

     

Vozinha chuan World Cup khelh hi a naupan lai atang tawha a duhthusam leh a lo thlir thin a nih thu a sawi. Josimar Dias-a piang Cape Verde goalkeeper hian World Cup khelh chu a duhthusam leh mitthla a nih reng thu a sawi a, a tak takin a khel ta mai pawh ni lovin, khawvelin a mi chhinchhiah a lo ni ta a, an ram tan history a siam ta hial chu a nih hi. 

     Vozinha hi tunah hian kum 40-a upa a ni a, Cape Verde international team-ah upa ber a ni bawk. World Cup khelh laia upa ber record chelhtu chu Egypt mi Essam El Hadary a ni a, kum 2018-a World Cup a khelh lai khan kum 45-a upa a ni. 

   

“Kum 25 ka nih hnuah kum 2012 khan professional football ka khel tan chauh a, ka tan chuan a tlai lutuk tawh,” tiin Vozinha chuan a sawi. “National team hi bansan ka tum tawh a; mahse he ka dream vang hian ka chhunzawm leh ta zawk a ni.

“Kan thawhrimna zawng zawng hi kan zavaia ta a ni. Kei hi Man of the Match-a thlan ka ni a; mahse he award hi ka team-puite zawng zawng ta a ni. An tel lo chuan engmah ka ni lo. Ka team leh ram mipuite tan ka thawk zel ang.” a ti bawk.

     Cape Verde hi Africa khawthlang tuipui kam aṭanga mel 600 zeta hla, tuipui zau laili taka awm, thliarkar sawm leh pakhat inkawp khawm, arkipelago mawi tak a ni a; nimahsela khawvel ram dang lakah erawh a mal hle si. Football tuipui naupang tan phei chuan eizawnna kawng a inhawng zau lo kher mai. 

     Mindelo khuaa sei lian Vozinha pawh hian harsatna a pal tlang hnem ve hle. “Kan ramah hian goalkeeper ṭha ber pawl ka ni ve a; nimahsela, ka pian a tawi avangin ṭhahnemngai taka ka khelh pawhin min thlan phah ngai meuh lo,” tiin a sawi. Mi tam tak tih dan ang bawkin an ram lo awp tawhtu Portugal-ah beiseina thar zawngin a pen chhuak a, chu chu a eizawnna kawng inṭanna bulpui a lo ni ta a. Hemi hnu hian Slovakia, Angola, Moldova leh Cyprus ramah te a pen chhuak zui ta zel a, tunah hian Portugal second-tier club, Chaves tan a la khel mek a ni.

     Vozinha hming hrim hrim pawh hian football chanchin a keng tel ve reng reng. A pa chuan Argentina leh Real Madrid player ropui Jorge Valdano hming chawia ‘Valdano’ tiin a fapa hming hi phuah a tum a; mahse Cape Verde thuneituten an phal tlat lo. A tawpah chuan kum 1986 World Cup-a langsar ve tak Brazil defender Josimar hming chawiin a fap hming hi a phuah ta a ni. Kum tam a liam hnuah World Cup khelmualah tho Vozinha hian history rawn a siam ve ta a ni.

     

Spain mipui sing tam takte an ram tana an au hulh hulh lai leh Spain-in na tak taka an nawr laiin Cape Verde team goal-keeper hi a ding nghet hle a, save pawimawh tak tak pariat a nei hial mai. 

     Kum 40 chunglam goalkeeper zinga World Cup-a save nei tam ber chu Pat Jennings a ni a, a piancham vawi 41-naah Northern Ireland tan Brazil lakah save vawi 10 a lo nei tawh a, a hun lai kha chuan Cape Verde goal-keeper ang maiin khawvel lawm a hlawh ve hle a ni.

     Vozinha hi khelmual pawn lamah pawh a lar nghal hluai a, instagram-a amah zuitu pawh 50,000 aṭangin maktaduai 13 chuang an tling ta hial mai! Hei hi a chhan ber chu - Brazil rama World Cup inkhel thlir theihna YouTube channel lian ber CazeTV-in an channel entute hnenah Cape Verde keeper instagram page hi follow ngei tura a ngen vang ni-a sawi a ni. “Hetiang thil mak hi a thleng thei ang tih ka ring pha ngai lo,” tiin Vozinha hian thuthar  theh darhtute hnenah a sawi a, a hlim hle.

     Scotland winger hlui Pat Nevin chuan "Cape Verde goalkeeper hian he game hi a ti hmuhnawm takzet. Kum 40 mi a ni tawh naa a khel tha tak zet a ni,” tiin 5 Live-ah a sawi. “Camera zawng zawngin an tin a, a teammate-te pawhin an kawk vek a, hun duhawm tak a ni.

Cape Verde hian minute 90 chhung zawng khan anmahni lama yard 18 chhungah an khel a ni ber. Chutiang chu nimahse theihtawpin an bei zel a, mahni thu duh mi chu ni se khatiang khan an khel thei lo ang. Team inpawh leh tangrual, tumruh an nih avang chauhin khatiang khan an khel tluan thei a nih kha.” tiin a sawi zui bawk.

     ITV sports-a commentator Lee Dixon chuan: “A mak tak zet a ni. Inkhel ropui a ni. Cape Verde khan fak an phu thlawt a, Spain erawh chu han fakna tur a awm hran lo. An duhthusam chu ni bik lo mahse Cape Verde tan chuan zan chhinchhiahtlak tak a ni. An theihna zawng zawngin an khel a, centre half-te, full-back-te an fakawm tak zet. An goalkeeper mittui tla ka hmuh khan kei pawh ka tap lo chauh a ni.” a ti. 

     Mipui nuai 5 chauh awmna ram ni-a, World Cup-a qualifying ram zingah ram te ber pathumna ni bawk tan chuan mi thahnem takin kumin World Cup-a champion tura an ngaih Spain ram meuh inhnehtawkpui hi result pawimawh tak a tling.  

Cape Verde ram mipuite chuan an ram football team-te hi an lawm tak zet a, an jersey rawng inbelin flag sen, var leh dum an keng a, an zai a, an lam a, an player-te hi an chawk phur thiam hle. Game a tawp hma hauhvin neutral mi te pawhin an lo tan ve a. Cape Verde international football team chanchin chu mi zawng zawng thawnthu sawi nuam tih a lo ni ta a ni ber e.

     Mizoram ai pawha te zawk thliarkar ram chuan football khawvel mit a la ta em em mek chu a nih hi.