BRUCE LEE KHA ENG VANG CHIAHA THI NGE?

A pianpui hming dik tak “Lee Jun-fan” tih aia  “Bruce Lee” ti-a kan hriat lar zawk hi Kungfu style chi khat ‘jeet Kune Do’ hmu chhuaktu a ni.

Mi tam tak chuan Bruce Lee hming kan sawi  hian kan rilruah kungfu ringawt a rawn lang awm e. Mahni mihringpuite nena inrem taka awm duh mi leh chumi thu au puitu a nih thu te, kan chenna khawvel humhalh duhtu a nihna te hi kan hriatpui kher awm lo ve.

Chumai a la ni hleinem, hla phuah lamah a tui hle bawk. Amah hrechiangtute chuan- “Bruce Lee-a hian a ke a khai loh chuan hla thu hmangin remna thu a tlangaupui thin” an tih hial chu!

Heti khawpa mi hlu leh ngaihsanawm hian July ni 20, 1973 khan kum 32 leka upa niin lei dai a lo bel ta a, a uiawmin lainattu pawh vawiin thlengin mi tam tak a la nei cheu mai! A thihna chungchangah pawh hian thu leng-vak a tam thin hle a, thluaka thisen zam chat (Brain aneurysm) vanga thi a ni ti an awm laiin, China misual rual khat (Chinese gangsters) te thah a ni ti tawk an awm bawk.

Engtin nge Bruce Lee a thih?

Sawi tawh angin Bruce Lee thih danah ngaihdan lian tak pahnih a awm a. Khawi hi nge thu dik zawk ni ta le?

A thattu chu tu pawh lo nise, a thih pui ber chu thluak vung (Cerebral Oedema) vang a ni tho tho tih hi mi thiam tam zawk te ngaihdan a ni.  Cerebral Oedema chu thluak vung chi khat a ni a, chu chuanin thluak hnathawh tibuaiin nunphung maksak tak tak a thlen thei a,  thaw hah a thlen mai bakah thawchhamin awlsam takin a thih theih a ni.  Mi thiamte chuan Bruce Lee hian Cerebral Oedema a neih avangin film a siam changin a thaw a chham zauh zauh thin an tih chu!

A hrechiangte sawi dan chuan Bruce Lee hian a thih ni zing dar 4 khan a film siam tum mek ‘Game  of Death’ chungchangah film siamtu lar tak Raymond Cho chu Hongkong-ah a hmu a, an inkawmlai hian Bruce Lee hian a lu chu na a tih hle thu a sawi a, Bruce Lee-a thiannu  Betty Ting Pei chuan natchhawkna damdawi a pe a, he a damdawi pek hi chemical chi hnih - Aspirin leh Meprobamate pai a ni.

Hemi ni vek hi Bruce Lee leh filmstar ve bawk George Lazenby te’n film chungchang sawi paha zanriah ei tlan an tum ni a ni. Zanriah ei hunah pawh chuan a rawn lan tak loh avangin an ruahmanna siam hi a tlawlh a, a chhan pawh Bruce Lee-a luna khan reh lam pan lova a nat zual zel avangin Bruce Lee hi Queen Elizabeth Hospital-ah an hruai a lo ni a, he Hospital ngei hi kungfu star lar leh chuai tawh lo tur Bruce Lee-a’n a hringnun khawvel a zawh tawpna hmun a lo ni ta a ni.

Mi thiamte’n post-mortem an han tih chuan a luna damdawi atana a damdawi ei-a Aspirin leh Meprobamate te kha an inhal (allergic reaction) a, chu chuan Bruce Lee-a thluak kha tivungin 13% laiin a len phah a ni. Hei hian a thluaka tui (CSF) chu a tipung hluai a, hei hian kungfu legend chu a hringnun hlu tak a lo chhat ta a ni. Kungfu pasaltha ruang hi Seattle-ah an la a, an phum ta a ni.

Kan sawi tawh angin China misual pawl khatin Bruce Lee hi an that a ni tih thu a awm ve bawk a. Engpawhnise, a finfiahna leh hre chiangtu ni-a insawi fel fai tak an awm loh avangin misualin an that a ni tih thu chu a zuzi ta zawk a ni. Hetihlai hian Bruce Lee-a thih danah hian mi thiam tam takin zirchianna an nei mek zel bawk a ni tih kan hriat ve a tha awm e.