𝐈𝐧𝐝𝐢𝐚-𝐢𝐧 𝐤𝐚𝐰𝐧𝐠𝐩𝐮𝐢 𝐬𝐢𝐚𝐦𝐧𝐚 𝐚𝐭𝐚𝐧 𝐏𝐥𝐚𝐬𝐭𝐢𝐜 𝐚 𝐡𝐦𝐚𝐧𝐠 𝐭𝐚𝐧 𝐭𝐚

- 𝙅𝙤𝙚𝙡 𝙇𝙖𝙞𝙧𝙚𝙢𝙨𝙖𝙣𝙜𝙖

India ramin kawngpui siam kawngah hmasawnna chhinchhiahtlak tak mai a tawng ta. A vawikhatna atan ram pum huapa kawngpui lian (National Highway) siamna atan plastic chhia a hmang tan ta. He hmalakna hi Union Minister Pu Nitin Gadkari kaihhruai Ministry of Road Transport & Highways hmalakna a ni a, National Highway 44-a Jhansi huam chhungah pilot project angin hlawhtling taka phah zawh a ni ta.

He thil hi kawng siam satliah a ni lo va, kan ram harsatna lian pahnih - khawpui bawlhhlawh pung zel leh ram pawn atanga bitumen kan lakluh nasat lutuk avanga sum tam tak luang chhuak thin sutkianna kawng hlu tak a ni. Hman deuh khan India ram chhung hmun hrang hrangah plastic hmanga kawng siam hi tih-chhin a lo ni ve tawh thin. Mahse chu chu a roa pawlh (dry-mix) a ni a, lung leh balu phah hnuah plastic te chu a chungah an phul mai thin a, a inzawmna a nghet lo hle thin.

Tunah erawh chuan a danglam ta hlak mai. IIT (BHU), Varanasi mithiam rualin Ministry sum hmanga kum thum chhung an zirchianna atanga an hmuhchhuah, Waste Plastic Modified Bitumen (W-PMB 76-10) an tih chu hman a ni ta.

He technology thar hnuaiah hian Low-Density Polyethylene (LDPE) an tih, kan nitin nuna kan hman thin - tui pipe hlui, file kawm, plastic folder leh polythene pan te chu thliar hrana silfai a ni a, chu chu bitumen lum sa vawl vawl, 160°C - 180°C vela sa nen khawl hmangin darkar eng emaw chen an chawhpawlh hmin ta a. A hnâwn laia chawhpawlh a nih miau avangin a inzawm nghet em em a, a muk thain a tlo zawk ta em em bawk.

He technology thar hian sawrkar hnen atangin patent pawh a hmu fel tawh a ni. Hlawkna pathum a thlen dawn a, chungte chu:-

1. Ram sum humhimna a ni.

India-in kawng siam nana bitumen kan hman hi a chanve vel hi ram pawn atanga lakluh a la ni a, kum tin Rs. vaibelchhe sang tam tak a luang chhuak thin. He technology hian bitumen hman ngai zat 4% vel a hum thei dawn a. Tlem hle angin lang mah se ram puma kawng kilometer sang tam tak siam ziah a nih avangin a pum puia chhutin a tam tham hle a ni.

2. A man a tlawm zawk:

Plastic chhia hi lei ngai a ni lo va, chhar khawm a ni mai. Chuvangin bitumen pangngai aiin 20% velin senso a tlawm zawk thei dawn. Kawng kilometer khat zelah Rs. nuai 3 atanga nuai 4 velin a tlawm thei tihna a ni.

3. Kawng a nghetin a tlo zawk:

Hei hi a pawimawh ber a ni. Kan ram lum leh lirthei rit tak tak, tonne 40 chuanga rit phur lirthei tlan nasatna hmunah hian kawng a khuar duh hle thin. Laboratory-a an enchhinnaah chuan he bitumen siam danglam hi lum vawr tawp 70°C-ah pawh a tuiral lo va, tui luh avanga kawng chhiatna lakah pawh a him zawk fe a ni tih hmuhchhuah a ni.

He project atana plastic hman te hi Jhansi khawpui chhehvela bawlhhlawh chhar thin leh kut hnathawktuten an chhar khawm a ni a, local recycler leh kutkawih eizawnna (MSME) ten an lo sawngbawl a. He thilah hian faina, eizawnna leh hmasawnna a kal kawp thei tih a lang chiang hle.

IIT (BHU) lam chuan tunah hian he kawng hi sensor hrang hrang hmanga vil rengin, kum hnih chhung a ngheh dan leh a daih rei dan an zir zui dawn a. A hlawhtlin chuan ram pumah hman turin Indian Roads Congress (IRC) dan hnuaiah thun a ni ang.

He hmalakna a sawi belhnaah Minister Gadkari chuan hmasawnna nghet leh tlo (sustainable development) chungchang a sawi chhuak bawk. Madhya Pradesh-a public bus service thar a hawnnaah "Tun hma chuan loneitute hi kan ei tur min petu te an ni kan ti thin. Tunah chuan kan chakna thahrui an ni tawh zawk," a ti.

A sawi danin, sawrkarin ethanol siam a uar hnuah loneituten hlawkna an hmu nghal a, vaimim man pawh quintal khatah Rs 1,200 atanga Rs 2,600-ah a kai chho tawh a ni. Motor tan E20 petrol hman a nih tan hnuah tunah chuan ethanol 100% (E100) ringawta tlan thei flex-fuel lirthei te pawh market-ah pho chhuah an ni thuai tawh dawn.

"India hian kum tin petroleum man atan cheng vaibelchhe nuai 22 chuang ram pawnah kan pe chhuak thin. Hei hi kan tihtawp a ngai a ni. Kawng siam nan kan bawlhhlawh siam chhuah, lirthei tlan nan kan loneitute thar chhuah ngei hman hi mahni kea dinna leh ram hmangaihna dik tak chu a ni," tiin a sawi.

Jhansi atanga intan thiltih te tak te hian India ram pum kawng siam dan a thlak danglam thei ang em tih chu hunin a la hril ang. Nimahsela, bawlhhlawh atanga ro hlu siam chhuahna kawngah chuan hmasawnna ropui tak a ni tih erawh hai rual a ni lo.

Beckham-a khuai khawiin sawi a hlawh hle!

- 𝑱𝒐𝒆𝒍 𝑳𝒂𝒊𝒓𝒆𝒎𝒔𝒂𝒏𝒈𝒂 

     England Football Captain hlui, a ball pet a han kir kual vel thin avanga khawvelin a hriat David Beckham-a chanchin hi tunah chuan football kaihhnawih a ni tawh lo. A chanchin chu pangpar bawma thlawk kual vel thin khuai te nen a inzawm ta zawk a ni.

     Kum 2020 chho velah khan Covid-19 avangin khawvel pum a reh thuap a, mi zawng zawng mahni inah kan tawmim lai khan Beckham-a pawh Cotswolds-a a in ropui leh zau takah chuan a nupui fanaute nen a tawm ve ran a. Chutih lai chuan a fapate nen thil thar an ching thar a, chu chu - khuai khawi a ni. 

     The Standard chanchinbuin a tarlan danin, a tirah chuan suit dum lian pui ha-a, khuai seh leh zuk hlau chunga a bu hawn vel kha a thil nuam tih tak a ni a. Mahse tunah chuan a eizawnna tak tak pakhat a ni tawh. Amah ngeiin khawizu a sawr a, a burah a khung a, a chhungte leh a thiante hnenah a sem kual vel tawh a ni. Instagram-ah a khuai bawm bulah ding chunga a nui var var lai te kan hmu ta fo mai.

     Khuai khawi lamah a mal tlat lo hle. Lockdown lai khan khawvel pumah khuai khawi hi a lar thar ta em em a. Stacey Solomon-i te, Rod Stewart-a te, Ed Sheeran-a te pawhin phur takin khuai an buaipui ve bawk. Mi hausa ber atanga mi rethei ber tan pawh kan in leh a velah te khuai bawm te tak te kan hung ve thei ta vek a, ti tha pawh kan inti viau maithei e. Mahse hetianga kan duh dan dana khuai kan khawi hian ram khuai (bumblebee) tan thil tha lo zawk a thlen thei tih hi i ngaihtuah ngai em?

     Khuai khawi chungchang kan sawi dawn chuan National Geographic Explorer leh wildlife filmmaker, Bertie Gregory-a a lo lang lo thei lo. Ani hi kum 30 hnuailama upa;mahse khawvel huapa savawm leh rannung film siamtu lar tak a ni. A documentary thar "Secrets of the Bees" tih avangin The Standard-in an kawm a, chutah chuan thu mak tak a sawi chhuak.

     "Khawpuiah hian khuai khawina bawm a tam lutuk tawh," tiin a sawi. "London khawpui bikah chuan kum 10 chhungin khuai bawm a let hnihin a pung a; mahse pangpar zat a pung ve si lo. Chuvangin ram khuai (bumblebee) ten chaw an hmuh loh phah ta a ni." a ti. 

     A thusawi tifiah turin tehkhin thu hetiang hian a sawi:- "Ram hnuaia khawsa savate humhalh duh vanga ar i vulh vak ang a ni. Ar vulh tam hian ram hnuai savate a chhan lo a, an ei tur a chhuhsak zawk a ni." tiin.

     A sawi tum chu - khawizu siam nasa chi khuai (Apis mellifera) hi sava anga ngaihtuah chuan, ar ang chauh a ni. Mihringin duat taka a vulh, a thlah pun thlap a ni a, thil sual a ni hran lo. Mahse ram khuai tak tak - bumblebee te, mahni chauha lei kuaa bu siam thin khuai te, pangpar kara muhil thin khuai te chu ram savate ang an ni. Mihringte duat an hlawh lo a, ngaihsak an ni lo a, an riral mek zawk a ni. 

     David Beckham-a khuai bawm pakhatah hian khuai nuai 5 vel an lawi thei. Chuti zat khuai chuan ni khatah pangpar maktaduai tel an tlawh a ngai. Chung zawng zawng chu ram khuaite nen an inchuh a ni. Khuai khawi chungchanga khuaite inel thu hi ngaihdan satliah mai a ni lo a, science-in a finfiah thlap tawh a ni.

     Kum 2016-ah khan zirchiangtu ten uluk takin hmun hnih an zir chiang a - hmun khat chu pangpar tamna hmun zau tak a ni a, pakhat chu pangpar tlemna, buh hmun vel a ni. Pangpar tamnaah chuan bumblebee ten nghawng an tuar lo a; mahse pangpar tlemnaah erawh chuan bumblebee zat a tlahniam nghal dawrh mai. A awmzia chu, chaw tamnaah chuan an awm ho thei a, chaw tlemnaah chuan chaw zawngin an inel nasa hle thung tihna a ni.

     Kum 2021-ah khan Germany ram Munich khawpui chhunga pangpar khawite an zir chiang a. Khuai khawi an tamna apiangah ram khuai an tlem zel a, khawizu siam chi khuai tha mi (honeybee) ten an hmun an luahlan zel tih an hmu chhuak. Pangpar pakhat bawmtu zingah pawh ram khuai (bumble bee) aiin khawizu khuai (honeybee) an tam zawk zel.

     Kum 2018-ah khan France chhim lam, ramngaw humhalh bikah khuai bawm sang tam tak an dahkhawm a. An enchian chuan khuai bawm awmna atanga metre 500-1000 chhung velah ram khuai an bo duak a, pangpar an bawm tur pawh a tlem sawt tih an hmu. Khuai khawi hian a vela ram zau tak a huam vek a ni. Heng zawng zawng hian thu pakhat min hrilh chu - "Khawizu duh vanga khuai khawina bawm tam lutuk hi a pawi thei" tih hi.

     A nih chuan David Beckham-a'n  thiam lohna a nei em? tih zawhna chhanna chu thiam lohna a nei lo tih a ni. Bertie Gregory-a pawhin Beckham-a sawisel a tum loh thu a sawi. Beckham-a ram Cotswolds ram zau takah chuan pangpar a tam a, a khuaite khan nghawng lian tak an nei kher lo mai thei. A thiltih hian mi tam tak mit a tivar a, khuai ngaihsak an tam phah zawk a ni.

     Mahse, a thiltih ang chiah hi khawpui chhung in chhawng sak tak leh room zim te-a awmin a tih ve chuan a pawi thei thung a ni. London khawpui laili, pangpar tlemna hmunah chuan pawi nasa tak a thlen thei tih a ni. 

     Kan ngaihdanah chuan khuai zawng zawng hi ang khat vek an ni maithei. Mahse khuai hi chi hrang 20,000 chuang a awm a, khawizu siam tam chi khuai (honeybee) hi chi khat chauh a ni. A dang zawng zawng hi ram khuai an ni a, pangpar chi hrang hrang tih puitlinna kawngah an pawimawh zawk fe bawk.

     A nih chuan engnge kan tih tak ang le? Gregory-a chuan kawng awlsam leh tha zawk min kawh hmuh a, chungte chu:

1. Pangpar phun rawh: 

      Khuai bawm lei ai chuan i huanah ram pangpar chi hrang hrang phun rawh. A par hun inang lo - thenkhat thlasika par, thenkhat nipuia par tur ang chi te ni thei se. Chutichuan kum tluanin khuaiin chaw an nei ang.

2. Hnim ngaithei rawh: 

      Kan huan kan tifai lutuk thin. Hmun hnim deuh te, thing tang ro te, lung khawkrawk te hi ram khuai ten bu an chhepna a ni. Hmun zawl fai vek ai chuan tlema hmun hnim deuhah hian khuai an awm duh zawk.

3. Tur (Pesticide) hmang tlem rawh:  

      I pangpar khawiah rannung thahna hlo kap vak suh. I kap a nih pawhin tlai lam, khuaite an lawi hnu ah kap chauh ang che.

     Beckham-a khawizu bur mawi tak mai, a  bangah "DB" tih inziak te chu hmuhnawm viau mahse, a phena thu dik tak chu hei hi a ni - Khuai humhalh nan khuai khawi kher a ngai lo. Pangpar pakhat i phun khan, khuai bawm pakhat i lei ai khan ram khuai 100 tan chaw i pe zawk tihna a ni.

     Chuvangin khuai i khawi ve duh a nih pawhin i khawi rualin i huanah pangpar phun hnem ve thung rawh. Chu chu khuaite tan chawlhna hmun dik tak a ni zawk ang.

Modi-a sawrkar bihchianna - Thutiam leh a tak ram khaikhinna

- Joel Lairemsanga

     Texas Tech University-a professor nupa Kevin Grier leh Robin Grier te'n August ni 25, 2026-a an tihchhuah zirchianna thar, 'Promises, Promises: Governance and Growth in India under Modi and the BJP' tih chuan India kum 10 kal ta chanchin chu fiah takin min hmuhtir ta a ni. An zawhna chu a mawlmang hle a, mahse a chhanna erawh a awlsam hran lo. "Narendra Modi leh BJP hi sawrkar lo se India chu engtin nge a awm ang?" tih a ni.

     He zawhna chhanna awm thei awmchhun chu science hmanga chhut chhuah a ni. A chhan chu Modi-a awm lohna India chu a takin kan hmu thei si lo a, chuvangin an siamchawp ta a, a hming vuah chawpin, 'Synthetic India' an ti a. He India lem hi an duh duh dana an siam mai mai a ni lo. Kum 1984 atanga 2013 inkar, kum 30 chhunga India tak tak kalphung, a than chhoh dan leh a tlak hniam dan zawng zawng an la khawm a, chumi ang chiah chiaha kal turin khawvel ram hrang hrang - Bangladesh, China, Ethiopia, Pakistan, Argentina, Brazil leh Vietnam te atangin data an la khawm a, an chawh fin a. Kum 30 chhung India tak tak nena inang chiah, hun thuhmuna kal dun India lem an duang ta a ni.

     Kum 2014-ah chuan kawng a inthen ta phawk a. India lem duan chawp chuan 2014 hmaa kalphung pangngai, sum leh pai than chhohna pangngai kha a chhunzawm zel a, India tak tak erawh chuan Gujarat Model leh ni ropui Acche Din tih thutiam nen kawng thar a zawh ta a ni. Kum sawm hnuah an pahnih hi an khaikhin leh a, an hmuhchhuah chu a inang lo nasa hle a, thutiam leh a tak inkar hlatzia a chiang hle a ni.

     Zirchiannain a hmuhchhuah hmasak ber chu economy lama tlakchhiatna a ni. Real per-capita GDP tehfungah chuan kum 2023-ah khan India tak tak chu Synthetic India aiin Dollar 1000 laiin a hniam zawk daih mai. He Dollar 1000 hi Delhi-a mi hausa tan chuan eng tham mah a ni lo vang; mahse lo neia ei zawng leh sumdawng tenau tan chuan thil lian tak a ni a, thla li atanga thla nga chhung ei leh in tur, fate pahnih kum khat chhung school fee emaw damdawi ina nu ner nau hrinna leh naupang enkawlna senso zawng zawng daih a ni thei tlat. Chutiang taka chhenfakawm chu India mi vaibelchhe 140 chungah an tibo ta a, ram pum huapa chhut chuan Dollar Trillion 1.4 zet a bo tihna a ni a, chu chu maktaduai zeta tam hna thar leh factory bona chhan a ni a, thalaite beidawnna hnar a lo ni.

     Hei hi eng vangin nge a lo thlen kan tih chuan sawrkar Policy hlawhchham vang a ni. November ni 8, 2016 zana mipui kuta sum awm 86% zet mai zan khat thil thua tihbosak -Demonetization te, mipuite Bank kawtah thla engemaw zat an intlar a ngaih phah te, mi engemaw zatin an nunna hial an chan phah te kha thil pawi tak a ni. Chumi hnuah GST fel fai lo tak, sumdawng tenauin an hriatthiam loh, an buaina siamsaktu an rawn hmang leh a. Tin, sawrkar ram, mipui ram leh Airport atanga Lawng chawlhna hmun leh tuipui thlengin mi tlemte kuta a lut khawm ta deuh vek te kha thup rual lohin a takin a lang chhuak ta a. Ni ropui - 'Acche Din' an tih kha mipui tam zawk tan chuan a lo la thleng lo va, a hma aiin an rethei zawk tih data chuan a nemnghet ta a ni.

     Sum leh pai lama tlakchhiatna aia na zawk chu kan ram inrelbawlnain a tuar ta chu a ni. Zirchianna hian rorelna tehfung pawimawh 10 lai a enchiang a, mak deuh maiin India tak tak hi 10-ah 10-in a tla hniam vek a, a tha zawngin pakhat mah a thang lo. A zatve phei chu 45% aia nasain a tla hniam a ni.

     A tirah kha chuan mipuiin sawrkar an thlak duh chhan ber kha eirukna do a ni a, Anna Hazare hoin ram pum an sawi nghing a. Mahse zirchianna chuan tunah hian political corruption chu a pung zawk daih tih a tarlang ta a ni. Corruption index a sang tawh zawk a, chu chu eirukna a tam tawh zawk tihna a ni a, Modi-a sawrkar hlawhchhamzia tarlangtu lian ber a ni.

      Electoral Bonds hmanga vaibelchhe sing tel, tu pek nge tih hriat loh, Supreme Court-in dan kalh a tih hial kha party fund-a a lut te, PM CARES fund, RTI hnuaia zawh theih loh, audit theih loh, rinhlelh kai tak te leh CBI, ED, Income Tax hmanga sumdawng lian leh chanchinbu mite vau beh leh rikrap te hi eirukna leh thuneihna hman khawlohna chi khat a ni tih a chiang ta hle a ni.

     A pawi ber chu danpuiin zalenna min pek te a bo ta tial tial hi a ni. Sakhaw zalenna, Freedom of religion chu 80% chuangin a tla hniam a, hei hi a tlak hniam ber tum a ni. 2014 hmaa khawvelin India a hriat dan kha  secular ram, sakhaw tin te zalen taka an awmna ram a ni a. Tunah erawh chuan sakhaw pakhat hminga mi dang nekchepna ram anga ngaih a ni ta.

      Kawtthlera mi sawisak hlum te, bulldozer hmanga in leh dawr tihchhiat te, sakhaw dang hmusitna tawngkam nasa tak, TV-a zan tin au pui te kha kan nitin hmuh a ni tawh a, data chuan dawt a ni lo tih a nemnghet ta bawk. A zahthlak ber chu an siamchawp Synthetic India-ah pawh Bangladesh leh Pakistan te an tel ve a, chung ram pahnih te telna India lem pawhin India tak tak aiin sakhaw zalenna a pe tha zawk tih hi a ni. Kan thenawm ram te aiin kan dinhmun a chhe ta zawk hle tihna a nih chu.

     Mahni ngaihdan sawi tura zalenna Freedom of expression pawh 60% laiin a tla hniam a, hei hi democracy tan chuan thu lungchhiatthlak tak a ni. Chanchinbu mite jail-a an khung te, NewsClick leh BBC office an thawng te, IT Rules thar hmanga Facebook leh Twitter an vau te kha thil thleng tak tak a ni. "Sawiselna hi democracy khalh ngiltu a ni" titute sawrkar hnuaiah sawisel tura zalenna a bo ta a ni ber mai. Dan hmaa intluktlanna leh rorelna dik Rule of Law pawh a tla hniam a, court leh parliament-in sawrkar laipui an kaihruai thei tawh lo va, thuneihna zawng zawng chu Delhi-a mi pakhat kutah a innghat ta vek a, federalism a thi zo ta a ni.                

     Heng thil zawng zawng hian khawvel mithiam ten 'Strongman Bargain' an tih chu Indiaah a hlawhchham tih a tilang chiang hle. Mipuite chuan 'kan zalenna thenkhat chu kan hloh ang a, min hausaktir la, min venghim rawh' tiin an thuneihna zawng zawng chu mi pakhat kutah an pe thin.

     Mahse Indiaah chuan mipuiin zalenna an hloh a, rum thaih an tawk a, an tawng ngam tawh lo va, an sakhua an sawi tha ngam tawh lo va, nun nuam zawk an beisei kha an hmu bawk si lo. An chan chu chhiatna pahnih a ni ta a, a hma aiin an rethei zawk a, a hma aiin an zalen lo zawk bawk a ni. Hei hi mi pakhat thu sawi mai mai a ni lo va, kum sawmthum chhung data hmanga chhut chhuah, science hmanga finfiah, ram 100 chuang tehkhinna atanga hmuhchhuah a ni .

     Thutiam sang tha tak tak a awm a, beiseina sang tak a awm bawk a, mipuiin an awih a, an vote a. Mahse a tak a lo thlen chuan thutiam bawhchhiatna chanchin mai a lo ni ta a ni -Promises, Promises tih hming hi a pu dik hle a nih ber hi.

Bawrhsaiabe hi rin phak bakin a lo hrisel nia mawle!

- Joel Lairemsanga 

     Mizoin 'Bawrhsaiabe' kan tih, sap ṭawnga ‘okra’ emaw ‘lady’s finger’ an tih hi Mizote chawhmehah chuan thlai pawimawh tak a ni a, a tui em vang ringawt ni lovin, kan pi leh pu ten ‘damdawi tha’ tia an lo sawi ṭhin angin, a chhunga chakna awm - vitamin, mineral leh damdawi tha tam tak avangin vawiin thlengin nutritionist leh doctor ten ‘superfood’-ah an chhal tawh nghe nghe.  Gram 100 lek-a rit bawrhsaiabe hian taksa mamawh tam tak a phuhru thei. Calorie - 33 vel a pai a, thau a pai tlem em em thung. Thau aiin hruihram fiber a pai tam zawk a, 100 gram-ah hian gram 3.2 vel a awm. Chu fiber zinga a tam zawk chu ‘soluble fiber’ leh ‘mucilage’ an tih, a pherh deuh chi a ni. Vitamin lamah chuan Vitamin C - 23 mg, Vitamin K - 31.3 mcg, Folate - 60 mcg, Vitamin A - 36 mcg leh Vitamin B1 leh B6 te a pai ṭhahnem hle. Minerals-ah chuan Magnesium - 57 mg, Calcium - 82 mg, Potassium - 299 mg, Manganese leh Iron a awm bawk. Tin, antioxidant-ah heng : quercetin, catechin, epicatechin, rutin leh polyphenol chi hrang hrang a pai tam em em a, hengte hi taksa cell chhe tur vengtu ber an ni. 

𝐇𝐫𝐢𝐬𝐞𝐥𝐧𝐚 𝐚𝐭𝐚𝐧𝐚 𝐚 𝐭𝐡𝐚𝐭𝐧𝐚𝐭𝐞 𝐡𝐚𝐧 𝐬𝐚𝐰𝐢 𝐢𝐥𝐚:  

1. 𝙕𝙪𝙣𝙩𝙝𝙡𝙪𝙢 𝙙𝙤 𝙡𝙚𝙩𝙣𝙖 𝙠𝙖𝙬𝙣𝙜𝙖𝙝 𝙝𝙢𝙖𝙝𝙧𝙪𝙖𝙞𝙩𝙪 𝙖 𝙣𝙞:  Bawrhsaiabe-a awm mucilage hian chaw kan ei ruala kan taksain thlum ‘glucose’ a hip lut tur a titlem a, a timuang bawk. Hei vang hian chaw ei khamah hian thisen thlum a sang thut lo va, insulin mamawhna a tlem phah bawk. Research thar lamah chuan bawrhsaiabe hian pancreas-a insulin siamtu beta cell a siam thar leh thei nia hriat a ni bawk. Zunthlum type-2 nei tan phei chuan zankhuaa bawrhsaiabe chiahna tui zing thawh veleh no khat in hian fasting blood sugar a tihniam thei. Metformin damdawi ei lai tan erawh bawrhsaiabe hian damdawi hnathawh a tibuai thei a, doctor rawn hmasak a ngai tih hriat tur a ni thung. 

2. 𝙇𝙪𝙣𝙜, 𝙩𝙝𝙞𝙨𝙚𝙣 𝙯𝙖𝙢 𝙡𝙚𝙝 𝘽𝙋 𝙩𝙖𝙣 𝙖 𝙩𝙝𝙖: Pectin a pai a, hei hian pum chhungah cholesterol ṭha lo LDL a hip bet a, paih chhuah kawngah taksa a pui a, thisen zam a thian fai a ni ber. Potassium a pai hian sodium tha lo paih chhuah a pui a, thisen sang a tihniam thei. Tin, polyphenol antioxidant a pai te'n thisen zam vung tur leh thisen khang tur an veng a, chu chuan heart attack leh stroke a titlem thei. Magnesium hian lungphu a mumal-tir a, thisen kal vel a titha bawk. 

3. 𝙋𝙪𝙢 𝙡𝙚𝙝 𝙧𝙞𝙡 𝙡𝙖𝙬𝙣𝙜 𝙙𝙖𝙢𝙣𝙖 𝙖 𝙣𝙞:  Bawrhsaiabe hnang ban hian pumpui bang a tuam nal a, pumpui ulcer hrik nei H. pylori vanga ulcer nei tan pum ulcer nasa zual tur a dang a, acid-in a ei chhiat belh tur a veng bawk. Chaw ei puar hnu lawka pum sa lutuk leh pum nuam lo tan damdawi ṭha tak a ni. Hruihram 'fiber' a pai hian ek a timumal a, em a tinem a, ek khal, pile tha lo leh ril cancer thlengin a veng thei. ‘Prebiotic’ ang deuhin a thawk a, rila hrik ṭha- ‘gut bacteria’ te tan chaw tha a ni a, pum a tihchak phah hle. 

4. 𝙍𝙪𝙝 𝙘𝙝𝙖𝙠𝙣𝙖 𝙖𝙩𝙖𝙣 𝙡𝙚𝙝 𝙣𝙖𝙪𝙥𝙖𝙞 𝙩𝙖𝙣 𝙖 𝙝𝙡𝙪 𝙝𝙡𝙚: Vitamin K tel lovin calcium hi ruhah a bet ṭha thei lo. Bawrhsaiabe hian Vitamin K leh Calcium a pai kawp a, chu chuan tar hunah ruh mawih leh ruh tliak awlsam tur a veng. Folate leh Vitamin B9 a pai tam a, hei hi naupai tan a pawimawh zual hle. Nau hrin hma thla thum aṭanga ei hian naute thluak, thling leh hnungzang ruh piansualna -‘neural tube defect’ a veng thei a, thisen tlakchham ‘anemia’ nei tan pawh Iron leh Folate a pai kawp avangin thisen thar insiam tur a pui. 

5. 𝙈𝙞𝙩, 𝙫𝙪𝙣 𝙡𝙚𝙝 𝙩𝙖𝙠𝙨𝙖 𝙞𝙣𝙫𝙚𝙣𝙣𝙖: Vitamin A, lutein leh zeaxanthin a pai hian mit a tifiah a, tarmit bun ngai khawpa mit chhe rang tur a sawn hla thei a, ‘macular degeneration’ a veng thei bawk. Vitamin C khan vun-ah collagen a siam a, vun chuar tur a veng a, hliam a tidam chak bawk. Antioxidant dangte hian taksaa natna chi hrang hrang, bu khuar hlim a tireh thei a, cancer cell ṭhang tur pawh a do let thei tih zirbingna pakhat chuan a tarlang. 

6. 𝙏𝙝𝙖𝙪 𝙩𝙞𝙝𝙠𝙞𝙖𝙢 𝙡𝙚𝙝 𝙩𝙖𝙠𝙨𝙖 𝙨𝙖𝙬𝙞𝙯𝙖𝙬𝙞 𝙥𝙪𝙞𝙩𝙪 𝙖 𝙣𝙞: Calorie a pai tlem a, fiber a pai tam a, tui a pai tam hle bawk. Hei hian thil thak leh thlum ei chakna a tireh a, thil ei tlem vanga taksa a chauh loh nan Vitamin leh Mineral a chhawm nghal bawk. Gym kal leh insawizawi ngawrh tan phei chuan Magnesium leh Potassium hian tihrawl kham tur leh na tur a veng. 

𝐄𝐧𝐠 𝐭𝐢𝐧 𝐧𝐠𝐞 𝐤𝐚𝐧 𝐡𝐦𝐚𝐧 𝐭𝐚𝐧𝐠𝐤𝐚𝐢 𝐚𝐧𝐠? 

1. 𝘼 𝙨𝙖𝙬𝙣𝙜𝙗𝙖𝙬𝙡 𝙙𝙖𝙣: Tih hmin lutuk chuan mucilage leh Vitamin C a ral duak thei. Chuvangin kan hmin emaw, tui nei lova chhum emaw, hmin chiang lova chhum thuak te hian ei ila a ṭha ber. Chhum pherh vek i duh loh chuan i chan sawm hnuah ser tui emaw, aieng tlem emaw telh la, rei lo te chhum hmasa la, a pherh vek lo mai ang. 

2. 𝘽𝙖𝙬𝙧𝙝𝙨𝙖𝙞𝙖𝙗𝙚 𝙩𝙪𝙞: Bawrhsaiabe chiahna tui in hi zunthlum leh cholesterol sang tan damdawi tha a ni e tih hi a lar hle. Zanah bawrhsaiabe pahnih emaw pathum emaw la chhuak la, a lu leh a mawng tan la, a laiah chan phawk la, tui no khatah zankhuain chiah rawh. Zingah a tui kha kaw ruah lai ngeiin in rawh. Kar 2-3 chhung in chhin la, i thisen thlum zawng inthlak dan lo chhinchhiah ang che. 

3. 𝘼 𝙧𝙤-𝙖 𝙫𝙖𝙬𝙣 𝙩𝙝𝙖𝙩: Bawrhsaiabe hmin ṭha tawk chu zai sin la, ni sa-ah pho ro rawh. A ro hnuah bur-ah khung la, thlasik lai leh thlai awm loh hunah bai atana hman theih a ni. A vitamin pai ṭhenkhat chu a bo deuh ang a; mahse fiber leh mineral a la pai tam reng tho ang. 

4. 𝘼 𝙘𝙝𝙞: Bawrhsaiabe chi hmin hian protein 20% chuang a pai a, unsaturated oil ṭha a nei bawk. A ro-a dah that chu coffee-a thlakah a hman theih a, sawr fu erawh chuan caffeine a pai lo thung. Vai ramah chuan ‘okra seed powder’ an ti a, zunthlum damdawi atan an hmang nasa hle. 

𝐓𝐮 𝐭𝐚𝐧 𝐧𝐠𝐞 𝐟𝐢𝐦𝐤𝐡𝐮𝐫 𝐧𝐠𝐚𝐢?  Bawrhsaiabe hi taksa tan a him tlangpui a; mahse mi tlemte tan chuan fimkhur a ngai ve tho. Chutianga fimkhur ngaite chu han sawi ila 

1. 𝙆𝙖𝙡𝙖 𝙡𝙪𝙣𝙜 𝙥𝙖𝙞 𝙩𝙚: Oxalate a pai tam a, hei hi calcium nena inchawh pawlhin kalah lungte a siam belh thei. Kala lungte awm vanga buai tawhte tan ei tlem a, tui in tam hle tur a ni.  

2. 𝙏𝙝𝙞𝙨𝙚𝙣 𝙩𝙞𝙝𝙙𝙖𝙡𝙣𝙖 𝙙𝙖𝙢𝙙𝙖𝙬𝙞 𝙚𝙞 𝙩𝙚: Warfarin ang chi ei tan Vitamin K hian damdawi a do let thei. Ei zing lutuk lo la, ei tawp thut lo bawk la, doctor rawn vat thin ang che. 

3. 𝙍𝙞𝙡 𝙘𝙝𝙖𝙠 𝙡𝙤 𝙣𝙚𝙞 𝙩𝙚: Ril ṭha lo ‘IBS’ nei tan mucilage a pai hian pum a tipuarin a tinuam lo thei. Ei hmasak berah chuan tlem te ei chhin la, i taksain a ngeih leh ngeih loh chik hmasa rawh. 

4. 𝘼𝙡𝙡𝙚𝙧𝙜𝙮: Thil thleng khât tak nimahse mi thenkhat chu bawrhsaiabe an khawih hian an vun a thak emaw, a za mer mer thei. Chutiang nei i nih chuan kutkawr bun la, i ei hnuah i taksa en fimkhur ang che. 

     Kan pi leh pu ten an ngaih hlut leh an chin uar em em, kan chawhmeh zinga a tui ber pawl bawrhsaiabe hi a lo va hlu em. A man a tlawm a, chin a awlsam a, hriselna kawngah erawh damdawi man to ber aiin a thawk ṭha zawk thei thung si. I chaw ei dawhkanah bawrhsaiabe i chhawp apiangin damdawi i chhawp tel tih hre reng la, a tui avang ringawta ei lovin, i taksa dam nan ei ang che. Hriselna hi kan neih hlu ber a ni a, bawrhsaiabe pakhat lek pawh hian hma a sawnpui thei che a ni.

India-in China a vau ta chher chher mai le!

- Joel Lairemsanga

     India leh China inkar boruak, rei tak lo dai tawh chu Arunachal Pradesh atangin a rawn so sang leh ta thut mai. Arunachal Pradesh-a Upper Subansiri District chhunga awm, ramri hnaih tak Taksing bial chhungah China sipai People's Liberation Army te chu ralthuam famkima inthuamin an lo lut nia sawi a ni a, he thu thang hian Delhi a beng harh chiang hle. India chuan rang takin China hnenah thuchah khauh leh chiang tawk tak a thawn nghal a, Line of Actual Control (LAC) depa hetiang thiltih hi engti kawng mahin pawm theih a ni lo va, ngaihthah mai mai a ni lo ang a, nakin zelah hetiang thil a thlen nawn tawh loh nan India chuan a tul angin hma a la ngei ang, tiin a vau ta chher chher mai.

     Taksing bial hi mihring chen tam lohna, tlang sang leh ramngaw chhah tak karah a awm a, LAC pawh chiang taka rin hleih theih lohna lai tak a ni. Chuvangin he lai bial hi kum 20 chuang kal ta atang khan buaina chhuahna hmun a ni fo tawh a, 2021 khan he hmunah vek hian China sipai 200 chuang an lo lut tawh nia sawi a ni bawk.

     Thu thanga an sawi danah chuan tuna thil thlengah hian China sipaite chu patrolling niawm takin an lo lut a, darkar engemaw zat hnuah an let leh nghal nia hriat a ni. An let hnuah India lam Army leh Indo-Tibetan Border Police (ITBP) ten a hmun an thleng nghal a, evidence awm ang ang an la khawm a, thil awmdan an en chiang nghal bawk. Sawrkar laipui Ministry of External Affairs lam chuan thil awmzia kimchang erawh mipui hriatah an la puang chhuak rih lo va, mahse Beijing-a Indian Embassy leh military channel hotline kaltlangin China a nawr nghal a ni. India ngaihdanah chuan LAC-ah dinhmun ngai tih danglam tumna reng reng, a bikin ralthuam nena rawn luh leh hmun lo luah tumna hi a ngai thutak hle a ni.

     He boruak sosang tak karah hian India a ngawi mai lo va, Pathianni khan India leh China sipai hotu liante chuan inbiakna pawimawh tak an nei nghal a. Eastern Sector-a LAC chungchang bik sawiho turin Flag Meeting an ko a, Arunachal Pradesh chhunga awm, Vacha-Damai Meeting Point an tihah chuan an inhmukhawm a, an inbiakna hian zan rei tak thleng a awh a ni. India aiawhin Tezpur-a 3rd Corps hnuaia awm 3rd Corps Commander ni mek Lieutenant General Girish Kalia-a'n sipai hotu dangte a hruai a, China lam atangin rank inang, anmahni Western Theatre Command hnuaia sipai hotute an rawn thawk chhuak ve bawk. An sawihonaah chuan Taksing-a thil thleng bakah Eastern Sector-a LAC pumpui-a patrolling kalphung leh inrinhlelhna awm te chu sawiho a ni an ti.

     He inbiakna hi a pawimawhna chhan chu thla hmasa lawka National Security Advisor Ajit Doval-a'n Beijing a tlawhna nen a inzawm tlat vang a ni. Doval-a chuan Special Representative (SR) level inbiakna, kum 2005 atanga ram pahnih ten ramri buaina sutkian nana an hman thinah khan Chinese Foreign Minister leh SR ni bawk Wang Yi hnenah LAC-a muanna a awm theihna turin boruak sosang siam loh leh inrintawnna lam thil pawimawh tak tak a lo sawipui tawh a. Tuna Corps Commander level inbiakna hi chu a chhunzawmna leh a taka hna thawhna anga ngaih a ni a, hmarchhak biala sipai hotute level-a inkawmna hi ramri chungchanga inbiakna chhunzawm zel tumna a awm vangin a pawimawh hle a ni.

     He buaina hi a thlen hun a fuh lo hle a, a chhan chu karleh lawkah China President Xi Jinping-a'n BRICS Summit-a tel tura India a rawn tlawh dawn tih thawm a awm mek vang a ni. Kum 2019-a Mahabalipuram-a Modi leh Xi te an inhmuh hnua Galwan buaina avanga ram pahnih inkar boruak a chhiat atanga kum 6 chuang hnuah hruaitu pahnihte an inbe leh thei dawn tih beiseina a awm mek lai a ni.

     Chutiang hun pawimawh tak hma chiaha India ram chhunga luh rukna a thleng hi thil palzam mai chi a ni lo va, India tan chuan dawhkana chhawp chhuah ngei chi leh pressure na tak siamna remchang a ni thei bawk. Modi leh Xi te an inhmu tak tak a nih chuan an sawi tur pawimawh ber chu ramri buaina hi a ni dawn chiang a, LAC dinhmun mek te, sipai inhnuhdawh dan tur te, Depsang leh Demchok tih loh Eastern Sector-a ram pahnihte inkarah inrintawnna siam leh dan tur te hi sawiho a ngai dawn a. Hruaitu pahnihte an inbiak hma lawka sipai level-a inbiakna neih hi thil pawimawh takah ngaih a ni.

     He boruak chungchangah hian Chief of Defence Staff (CDS) hlui General Anil Chauhan-a'n thu fing leh pawimawh tak a sawi chhuak a, "India leh China inkar ramri buaina hi a la fel kim lo hle a, a buaithlakna ber chu ram pahnih te hian Line of Actual Control tak tak chu khawiah nge a awm tihah pawh inremna pakhat mah kan la nei lo. Mahse, India leh China inlaichinna hi ramri atang chauha thlir hi a dik lo," a ti a.

     A sawi zelnaah, "Ram pahnihte hi khawvela ram lian pahnih, Asia-a thuneitu lian leh sumdawnna lama innghat ve ve kan ni a. Kan inkarah hian sumdawnna, thiamna sang leh khawvel huap thilah thawh ho a ngai a, inelna pawh a awm reng bawk ang. Chutiang dinhmunah chuan inbiakna tihtawp a, inhuatna chauh vawn reng hi a fuh lo va, inbiakpawhna kawng hawn reng a pawimawh hle a ni. Inlaichinna zawng zawng hi ramri buaina chauhva teh tur a ni lo," tiin a sawi.

     A tawp berah chuan India thuchah chu a chiang fel fek fawk hle. Ramriah inthlahdah a ni lo ang a, ram pakhatin a ram a venna kawngah chak takin a ding tlat ang, tih a ni. Mahse indona a duh lo va, inbiakna hmanga chin fel a duh zawk tih a lantir tel bawk. Tunah chuan ram pahnih inlaichinna lama rilru sengtute mit zawng zawng chu BRICS Summit lamah a fu ta mek a, Delhi leh Beijing te hian ram pahnih inkar sa ru thar mek hi an hruaitu liante dawhkanah engtin nge an pharhtir ang a, eng ang inremna nge an siam ang tih chu nghakhlel taka thlir a ni ta a ni.

𝗖𝗵𝗶𝗻𝗮 𝘃𝗮̂𝗻 𝗸𝘂𝗹𝗵𝗽𝘂𝗶 𝘀𝗮𝗻𝗴 𝗯𝗲𝗿 - 𝗛𝗤-𝟮𝟵 𝗰𝗵𝗮𝗻𝗰𝗵𝗶𝗻 𝗻𝗴𝗮𝗶𝗵𝗻𝗮𝘄𝗺

- Joel Lairemsanga

 

     September ni 3, 2025-ah khan khawvel mit zawng zawng chu Beijing khawpui, Tiananmen Square lamah a fu thup a ni ber. China-in Indopui Pahnihnaa Japan chunga an hnehna champhaphak kum 80-na lawmna pualin sipai rual ropui tak a entir a, ralthuam thar an neih te a pho chhuak a. Chung zingah chuan Truck lian tak, axle paruk nei chunga missile dum lian pui pahnih bawk thiang, a hmaa khawvelin a la hmuh ngai loh hi a tel a. Ralthuam lama tui te'n an hmuh rual rualin mak an ti a, zawhna pakhat an nei nghal a, "Hei hi eng nge ni?" tiin. Chu zawhna chhanna chu HQ-29 a ni.

     HQ-29 tih hi hming lamtawi a ni a, a hming pum chu Hong Qi-29 a ni a, Mizo tawnga lehlin chuan Puan Sen - 29 tihna a ni. China Communist Party chhinchhiahna zahawm tak a ni.

     He ralthuam hi zan khat thila lo piang a ni lo va, China-in kum 60 chhung zeta a thawhrimna chu thup hlen theih a ni ta lo a. Kum 1964 daih tawh khan Chairman Mao Zedong khan America leh Soviet Union-in Ballistic Missile hmanga an beih hlauvin Project 640 tiin van lam ralvenna siam turin thu a pe a. Mahse chutih hun laia China technology chu a la hniam em avangin a hlawhtling thei lova, kum 1980-ah tihtawp a lo ni ta a. An beidawng hlen lo va, 1990 hnu lama America-in Patriot Missile a hmang an hmuh hnuah an harh chhuak leh a, kum 2010 atang khan Midcourse Interception an enchhin tan ta char char a. Vawi sarih lai hlawhtling taka an enchhin hnu leh kum 15 chhung ngawrh taka an thawh hnuah 2025-ah chuan a tak takin People's Liberation Army Air Force kutah an hlan ta a, chu chu a vawikhat nan mipui hmaah an pho chhuak ta a lo ni. 

     HQ-29 hi eng ang ralthuam nge tih hre fiah tur chuan Ballistic Missile thawh dan kan hriat a ngai. Missile hi kah chhuah a nih atangin bung thumin a kal a. Kah chhuah a nih tirh lam chu Boost Phase a ni a, a laihawl, van boruak sang tak, km 1000 chuanga sanga darkar khatah km 25,000 chuanga chaka a thlawk lai chu Midcourse Phase a ni a, a tawp lam, a target lam pana a tla leh lai chu Terminal Phase a ni. Ram tam zawk ten an neih America Patriot, THAAD, Russia S-400 ang te hi Terminal Phase-a lo dangtu an ni tlangpui. HQ-29 erawh chu a sang ber Midcourse Phase-a lo dangtu a ni a, van boruak pawn lamah hna a thawk a ni.

     A thiltihtheihna hi a mak em em a, chuvangin khawvela chanchinbu lian South China Morning Post leh The Independent te chuan America-in a neih tha ber SM-3 Block IIA leh Ground-Based Interceptor te nen an tehkhin hial a ni.

     A theihna te chu hetiang hi a ni- A kah san zawng hi China sawrkar TV CCTV-in a puan dan chuan km. 100 atanga km 2000 thleng a ni. Hei hi Karman Line an tih, van boruak leh Space inkar km. 100 pelh chhuah vek a, Space chhunga thlawk lut tawh tihna a ni. French sipai chanchinbu War Wings Daily chuan km. 500-ah pawh Intercontinental Ballistic Missile (ICBM) a kap thla thei ang a ti a, China sipai magazine Ordinance Science and Technology chuan km. 2000 thleng pawh a kap phak ang a ti. A kah phak chin hlat zawng hi km 2500 atanga km 4000 thleng a ni an ti a, a then chuan km. 850-ah ICBM a um phak thu an sawi bawk. A len zawng hi eng nge kan tih chuan Truck lian tak chungah hian an dahna Tube, metre 1.3 vela zau pahnih a awm a, a chhungah chuan metre 10.5-a sei, metre 1.2-a bial zau leh kg 2000 chuanga rit missile a awm a ni. A thlawh chak zawng hi ri let 6 atanga ri let 10 a ni a, darkar khatah km 7350 atanga km 12250 vela chakin a thlawk thei niin an sawi. A bitum a kah thlak dan hi a danglam bik hle a, puak darha kap ni lovin Hit-to-Kill emaw Kinetic Energy Interception an tih ang hian a taksa ngei hmangin, silai muin silai mu dang a kap ang maiin second khat chhunga km 3-4 a chaka thlawk chu a su chawrh a, a tikeh sawm vek thei a, hei hi technology sang ber a ni rih mek.

     HQ-29 hi a mala thawk tura tih a ni lo va, China-in van lam venna kulhpui lian tak, thuah ruk a siam zinga a chung bera thawk tur a ni. Tiananmen-a an pho chhuah rual khan ralthuam chi ruk an pho chhuak rual a, chungte chu HQ-11, HQ-20, HQ-22A, HQ-9C, HQ-19 leh HQ-29 te an ni. Heng te hian hna hrang theuh an nei a. HQ-11 hi terminal defence, hnai te, hniam te-a vengtu, Bomb leh Cruise Missile leh Helicopter lo dangtu a ni a, HQ-22 hi mid to high altitude-a vengtu a ni a, HQ-9C hi hla tak vengtu a ni a, HQ-19 hi sang taka vengtu, America THAAD ang deuh a ni a, km. 100 atanga km. 150-a sang a kap thei a ni. HQ-29 hi chu chung zawng zawng chungah chuan a awm a, vanthengrenga China vengtu a ni. Missile pakhat lo lut chu HQ-29 in a lo dang hman lo a nih chuan a hnuaiah HQ-19-in a lo chang ang a, chu pawhin a dang hman lo a nih chuan HQ-9C-in a lo dang leh ang. Chutiang chuan computer pakhat leh radar lian tak tak hmanga thlunzawm China kulhpui nghet leh rinawm tak an ni ho ta a ni. Global Times chuan hetiang taka  system puitling a neih avangin China chu khawvela anti-ballistic missile system kimchang nei ram tlemte zinga mi a ni ta tih a tarlang hial.

     He ralthuam hian khawvel a tihral-khelhna chhan pahnih a awm. Pakhatna chu satellite a kap thei hi a ni. HQ-29 hi missile lo dangtu mai ni lovin Low Earth Orbit-a awm Spy Satellite te, GPS te, Starlink ang te pawh minute reilote chhunga kap thla thei Anti-Satellite Weapon a ni a, chuvangin thenkhat chuan Double-Barrelled Satellite Hunter ti hialin an sawi. Indona tak takah chuan hmelmate mit tihdel theihna a ni. Pahnihna chu a awmna hmun vang a ni. Tun hnaia social media-a video darhah chuan Tibet Autonomous Region, Shigatse lama India ramri atanga km. 200 vel leka hlaah HQ-29 Launcher 8 leh Interceptor Missile 16 vel an phur lut lai hmuh a ni. Hei vang hian India tan a hlauhawm zual a, India chuan van lam ralvenna turin S-400 bakah Russia S-500 emaw America THAAD emaw lei turin an indawr mek tih thawm a awm ta hial a ni. Bulletin of the Atomic Scientists tarlan danin he ralthuam hian America nuclear invenna a tihderthawng thei a, ralthuam lama intlansiakna a ti zual sawt thei an ti bawk.

     A tawp berah chuan HQ-29 hi missile mai a ni lo va, China-in kum 1964-a Mao Zedong mumang, van boruakah tumahin min kap thei lo ang tih mumang kha 2025-ah a taka a chantirna a ni a, khawvel hnenah kan van boruak pawh kan veng thei tawh e tia a inlanna a ni. Indopui a chhuah hlauh chuan he missile hi kah chhuah a nih loh hram beisei ila; mahse a awm mai mai pawh hian khawvel muanna boruak a tawk che tham a, a bikin keini India ram tan phei chuan kan van lam venhimna turin ngaihtuahna hman nawn a ngai ta hle a ni.

 

𝗘𝗻𝗴 𝘃𝗮𝗻𝗴𝗶𝗻 𝗻𝗴𝗲 𝗜𝗻𝗳𝗹𝘂𝗲𝗻𝘇𝗮 𝗮 𝗵𝗹𝘂𝗮𝗿 𝘁𝗵𝗮𝗿 𝘁𝗵𝘂𝘁?

- Joel Lairemsanga

 

     Tun hnai mai aṭang khan hritlang khawsik "influenza" vei an tam thar hle a, damdawi in OPD-ah an khat mup mup ni-tin a ni ber mai. A bik takin naupang school kal rual leh tar chak lo te zingah an tam zual. Khawsik 102°F atanga 104°F-a sang, khuh ro, taksa na them ṭhum, lu na bûr leh chau ngawih ngawih avanga ni 7-10 lai school/office kal thei lo an awm nual. Kum dang zawng aiin kumin 2026-ah hian eng vanga hluar thut nge a nih tih hi zawhna lian tak a ni a, a chhan bulpui panga a awm thei a, hei hi tun tumah hian kan sawi dawn a ni.

     A hmasa ber chu kan taksa invenna, sap ṭawng-a "immunity" an tih hi a chakna a tla hniam ta lutuk hi a ni. Kum 2020 atanga 2022 thleng khan Covid-19 leng avangin ram pumah mask kan vuah a, kut kan sil sek a, school leh biak in kan khar a, in lamah kan tawm nasa em em. Chumi rah chhuah ṭha tak chu Covid bakah influenza virus pawh a leng vak hman lo va, kum 3 chhung zet chu hritlang vei kan tlem phah ta hle. Mahse a nghawng ṭha lo zawk a lo awm ta a, kan taksa hian natna hrik a hmachhawn khât lutuk chuan a do let dan strategy a theihnghilh ve thei a, chutiang chiah chu tunah hian a thleng mek niin a lang. Naupang kum li, kum nga mi te phei chuan an pian hnuah influenza virus an la tawng miah lo a, an taksa tan chuan mikhual hmelhriat loh ang hlauh a ni tawh. Tunah erawh hnar leh hmui tuamna (face mask) kan phelh a, kuta inchibai leh inkuah te, biak in leh bazara inhnaih taka awm khawm leh ṭhut ho te a pangngai leh vek tawh. Chutih laiin influenza virus erawh a bo hlen lo va, remchang a hmuh veleh a darh nghal ta phuk phuk thin a ni. Kum thum chhunga kan kai loh tur kha tunah kan kai khawm ta chiam mai a ni ber a, scientist-te chuan hei hi “Immunity debt" an ti a, a awmzia chu kan taksain natna leiba a rul let mek tihna a nih ber chu.

     A pahnihna chu kan ram sik leh sa dinhmun nen a inkaihhnawih tlat hi a ni. Mizoram leh India hmarchhak pumpui tan hian August leh September hi "flu season" bul inṭan hun a ni tawh ṭhin. Ruahtui a tlak tam avangin in lamah kan tawm nasa zual a, kawngka leh tukverh kan khar tlat a, boruak a lut tha meuh lo. Chutiang boruak hnawng leh lum lam lek lekah chuan influenza virus hian nuam a ti bik a, hahchhiau leh khuh atanga thlawk chhuak te chu darkar chanve dawn boruakah an lêngin an dam thei a ni. Chubakah ni sa kan do tlem avangin kan taksain Vitamin D a siam chhuak tlem a, chu chuan kan taksain natna a do letna a tiṭhuanawp ve leh zel thin. Gauhati Medical College report-ah pawh July thla aiin August thlaah hritlang vei a let thum zetin a pung tih a chiang a, ruah sur tam leh mihring awm khawm tam hun hi flu tan chuan hun remchang a tling tih a lang chiang hle.

   A pathumna leh a pawimawh ber te zinga mi chu kumina leng mek influenza virus hi a danglam bik tlat mai hi a ni. Tun season-a hluar ber chu Influenza A chi hnih – H3N2 leh H1N1 a ni a, a bik takin H3N2 hian kumtin a pianzia a thlak danglam ve zel a, nikum lama vaccine kan lak tawh kha kuminah a hmantlak lutuk tawh loh phah thei a, chu chu a hlauhawmna tak a ni. Kumina H3N2 hian mi a bei na bik em em a, a vei te chuan khawsik sang tak, 103°F-104°F laia sang an nei thei. An khuh a roin zanah mut-hilh harsa khawpin an khuh zing a, âwm a na bûr thei. Tin, taksa na hi “ruh tliak na” ang hialin a na thei a, chauh ngawih ngawihna avangin damdawi ei chung pawhin ni sarih atanga ni sawm chhung bawksawp pawh an tam hle. World Health Organization tarlan dan chuan kumina H3N2 hian naupang kum sawm hnuai lam leh puitling kum sawmruk chung lam a bei na bik a. Zunthlum, BP sang, lung ṭha lo nei sa tan phei chuan pneumonia neih a awlsam zuial lehnghal a, damdawi in luhpui ngai an tam phah hle.

     A palina chu India ramah hian flu vaccine lak hi kan la ngaihthah em em hi a ni. Covid vaccine ang em emin sawrkar pawhin a nawr lo va, mipui pawhin “hritlang satliah” ah kan ngai mai a, Flu vaccine la hi ram mipui zawng zawng zat aṭanga za zela pahnih pawh kan tling lo. Kumtin khawvel huapin mi maktaduai 30-50-in flu hi an vei a, chu’ng zinga nuai 3 atanga nuai 6 velin nunna an chân ṭhin tih hi kan hre meuh awm lo ve. Vaccine hian 100%-in min veng thei lo; mahse influenza hi kan kai palh a nih pawhin damdawi in luhpui ngai khawpin min tina lo ang a, kan thihpui loh phah thei a, chubakah midang kan kai chhawng tur a veng thei bawk. A bik takin naupang thla ruk aṭanga kum nga inkar te, raipuar te, kum 60 chung lama upa te, zunthlum leh chuap ṭha lo nei te tan chuan lak ngei ngei chi a ni. Private hospital-ah cheng sangkhat leh zanga atanga cheng sanghnih inkar vel sen a ngai a, kum khat chhung a ven theih avangin a man hi a sang lo hle a ni.

     A pangana leh a tawp ber chu Covid-19 hripui a reh hnu hian kan nunphung a pangngai leh vek tawh hi a ni. Hnar leh hmai khuhna (Mask) kan vuah tawh mang lo va, bazarah leh bus-ah kan innêk leh tâwlh tâwlh a, kut kan sil ngun tawh lo va, hand sanitizer pai lah kan awm ta meuh lo. Influenza hi kai a awlsam em em a, mi pakhat hahchhiau leh khuh bawrh bawrhin a bul hnaia mi pathum pali a kai chhawng hman zel a ni.

     Chuvangin tun dinhmunah chuan kan zavaiin kan fimkhur thar leh a ngai a ni. A pawimawh hmasa ber chu mi nawlpui a tam thei ang ber flu vaccine la turin intihhmuh ila, chu bakah chuan mi tamna hmun, a bik takin damdawi in, bazar leh bus chhungah te mask vuah i uar ṭha leh ang u. Mask ringawt pawh hian flu virus hip luh tur za zela sawmriat lai a dang thei. Kan vah chhuahna atanga kan haw apiangin sahbawn hmangin second sawmnih chhung tal kut sil fai ziah bawk ila. Chhungkaw member pakhat a dam loh chuan room hranah riak hrang sela, thleng leh no pawh a hrana hmantir tur a ni. Khawsik a reh hnuah pawh ni khat tal chu inah chawl hahdam la, i thawhpui leh i sikul kalpuite i kai loh nan i inkhung hrang hram hram dawn nia. 

     Influenza i vei a nih chuan tui lum in tam la, mu tam la, thei leh thlai lam ei uar bawk ang che. Doctor ten Tamiflu an tih damdawi an chawh che a nih chuan khawsik i neih atanga ni hnih chhung ngeia ei hman tur a ni a, chumi hnuah chuan a thawk ṭha tawh lo tih hria ang che. Thawk a harsat a, awm a nat a, ni thum ral hnu pawha khawsik a la reh thei lo a nih chuan inentir vat ang che, a chhan chu pneumonia a nih zui theih vang a ni.

     Thu dik lo leng vel pakhat chu “Ruah do hi  hritlang kai ngei ngeina a ni” tih hi a ni. Ruah do hian taksa a tichauin hritlang a kai awlsamtir mai zawk a; mahse virus i hip luh loh chuan ruah va do ringawt avangin hritlang i kai ngei ngei dawn kher lo. Chuvangin kan hlauh tur zawk chu ruahsur hrim hrim do hi a ni ngawt lova, virus leh kan nunphung fimkhur lohna hi a ni zawk.

     Hri leng hlauhawm tak Covid-19-in min chhuahsan fel deuh chauh a, tunah hritlang satliah ve maiin min run leh a. Mahse hritlang mai mai ti-a kan ngaihthah chuan naupang leh tar chak lo zawkte tan chuan thihna thlentu a ni thei tih hria ila. Thufingte 22:3-in, “Mi fing chuan thil ṭha lo a hmuhin a biru ṭhin; mi mawl erawh chuan a tawn lui a, a tuar phah ṭhin,” a tih ang khan, tun hi fimkhur a, tul lova len chhuah loh a, inven hun lai tak a ni. I chhungte, i ṭhiante, i hnathawhpui te hnenah he thu hi hrilh darh la, i ṭawngkam avangin chhungkaw pakhat talin damdawi in kawngka an pumpelh phah mial maithei asin. Dam leh hrisel tha tura induhsak hi a kristian zia hle bawk si a.

I fate kha smartphone khawihtir hma lutuk suh

- Joel Lairemsanga

Smartphone hman hi naupang tan a ṭha lo viau em tih hi i ngaihtuah tawh ngai em? Zirchianna thar pakhat chuan kum naupang bikah phone, computer leh tablet khawiha naupang te'n hun rei tak an hman chuan naupangte chuan hriatrengna leh zirna kawngah harsatna an tawk thei tih a tarlang.

     I fate, a bik takin kum 2 chin hnuailam  te awm tleina atan smartphone i pek loh a ṭha, a chhan chu naupang tan screen hmaa hun hman tam lutuk hi a pawi vang a ni a, hei hi thil thar a ni lo bawk. Kum tam tak chhung chu mi thiamte'n naupangte chungah tunlai thiamna hian nghawng ṭha lo a neih thu an lo sawi tawh ṭhîn a; mahse engtiang chiahin nge a hlauhawm theih tih hre lo erawh kan tam viau awm e. Tun hnaia zirchianna thar pakhat chuan naupangte'n an naupan zual laia screen kan tih mai- phone, computer leh tablet te  an hman tam chuan heng screen te hian an thil zir leh thil hriat rengna kawngah nghawng tha lo leh damchhung daih thil lawmawm loh a thlen theih thu a tarlang.

     Inserm leh National University of Singapore-a zirbingtute zirchiannain a sawi danin, naupan zual laia phone, TV, computer leh tablet hmaah hun tam zawk hman chu zirna kawnga hlawhtlin lohna leh puitlin hnua thil hriat rengna chak lohna nen a inzawm tlat. He zirchiannaah hian mithiamte chuan Growing Up in Singapore Towards healthy Outcomes (GUSTO) tih hming vuahin naupang 502 an zirchiang a, naupangte'n kum tina screen an en hun chhung an chhinchhiah a, chu chu kum 9 an nih laia an zirna leh kum 10 leh a chanve an nih laia an thil hriat reng theihna nen an khaikhin a ni.

     World Journal of Pediatrics-a tihchhuah he zirchianna hian naupangte'n phone, computer, laptop, tablet, etc. an khawih hun rei zawng ringawt en lovin, naupangin screen an hman ṭan hunin nghawng a neih leh neih loh hriat nan kum ruk chhunga screen an hman dan an zir chiang a, chuta an hmuhchhuah chu ngaihtuah-tham tling tak vek a ni. 

     Naupangte an naupan zual lai, a bîk takin kum khat an nih laia screen en tam ṭhîn te chu nakin hnu zela zirna lama hlawhtling lo zâwk leh thil hriat rengna kawnga chak lo zâwk an nih theihzia he zirchianna hian a târ lang. Kum ruk vêla naupangte screen hman ṭhîn dân pawh zirna lama hlawhtlin lohna nên a inkûngkaih a, hei hian naupan lai leh sikul an luh tirh hun hi screen hman chungchângah hun pawimawh bîk a nihzia a târ lang a ni.

     Zirbing mite sawi dan chuan hetiang taka nghawng a neih chhan pakhat chu screen hmaa hun tam zawk an hman hian naupangte tan thil zir leh than chhohna atana ṭangkai, entirnan- infiam te, lehkhabu chhiar te leh nu leh pate nena hun hman ang chi te ti turin hun an neih tlem phah vang a ni ber.

     Tin, screen hman chungchangah hian he zirchianna hi a awm chhun a ni hran lo. Kum 2020-ah khan University of Calgary-a Sheri Madigan kaihhruai zirbing-tute chuan naupang 18,905 te zingah zir bingna chi hrang 42 an kalpui a, screen hman dan leh naupang ṭawng thiam chak zawng inkungkaih dan an zir chiang a ni. Screen hmaa hun tam zawk hmang naupangte chuan ṭawng an thiam chak lo deuh tih an hmu chhuak a. Chutihrual chuan awmze neia screen hmanpui emaw, enkawltu tha hnuaia screen hmantir emaw an nih thung chuan tawng an thiam chak phah hle tih an zir chhuak. Zir mite chuan screen hmaa hun hmang tam lo naupangte chuan ṭawng an thiam chak zawk hle tih an hmu chhuak bawk.

     France rama zir bing mite'n kum 2023-a an zirchiannaah chuan screen hman nasat leh rilru pek theih miah lohna a inzawm em tih hriat nan naupangte-ah zirchianna pariat an kalpui a. An zirchianna panga te chuan screen hman tam leh rilru pek theih lohna chuan inzawmna a nei tih an hmu chhuak a, hun rei tak naupangte an zirchianna sawm zinga paruk chuan phone khawih hma lutuk chu nakin hnuah rilru pek theih miah lohna nen a inzawm tih an hmu chhuak a, zirchianna paliah erawh inzawmna chiang tak an hmu lo thung.

     A tawp berah chuan mithiamte chuan phone hman tam lutuk emaw hman hma tir lutuk emaw chuan naupang thanlenna kawng hrang hrang, zirna lam leh thil hriat rengna te, ṭawng thiamna leh rilru pek theihna thlengin nghawng a nei tih an sawi. Phone an khawih ringawt hi a pawi ber chu a ni lo; mahse naupangte'n eng nge an en, eng tia rei nge phone an khawih tih leh nu leh pa an inrawlh em tih te hian an thanlennaah nghawng a nei vek a ni.

China-ah Robot infiamna ropui siam a ni | Mihring record an khûm

- Joel Lairemsanga

    Beijing Robot Games-ah Chinese humanoid robot-te chuan 100m-a thui intlansiak leh inzuansan siakah mihring record an rawn khum. August 22-26, 2026 chhung awh tura Beijing-a World Humanoid Robot Games neih mekah Chinese humanoid robot-te chuan Usain Bolt-a 100m race record leh midang tam tak record an rawn khum malh malh mai. Robot 2,000 chuang zet inelna hrang hrang 51-ah an tel a, hei hian technology lama inelnaah China-in robotics lamah hma an sawnzia a tilang chiang hle.

     Inrinni August 22, 2026-ah khan Beijing-a World Humanoid Robot Games, Olympics ang chi-a buatsaih ni khatnaah Chinese humanoid robot-te chuan mihringte record siam chu an khum a, chung zingah chuan Usain Bolt-a meter za tlan chak lam record pawh a tel. Robot humanoid sang hnih chuang zet chu he inelnaah hian an tel tih inelna buatsaihtute chuan an sawi.

     A vawi hnihna atana buatsaih, ni nga chhung awh tur he inelna hi China-in robotics lama hma a sawn chakzia lantirna ropui tak a ni a, US nena technology lama intlansiakna a san chhoh zel laiin he infiamnaah hian inelna huang hrang hrang sawmnga pakhat leh intihsiakna sang khat chuang a awm a, chung zingah chuan intlansiak te, table tennis leh soccer-te pawh a tel.

     Kum 2022 Winter Olympics puala sak National Speed Skating Oval-a neih infiamna-te hi Beijing-in kum 2026 World Robot Conference and Expo a thlen chawlhkar vêk khan hawn a ni a, chutah chuan company-te chuan humanoid robot-te telin thil thar sangthum chuang an pho chhuak a ni. Khawvela humanoid robot zinga a tam zawk hi China-in a siam a ni a, hei vang hian US chuan ram dang atanga robot lak luh chungchangah enfiahna nasa zawk a kalpui tan ta bawk.

     Thla liam ta khan U.S. Federal Communications Commission chuan ram dang siam humanoid robot thar lakluh khapna a puang a. FCC chuan China laka he thil an tih chhan chu ram venhimna kawnga harsatna a awm vang niin an sawi. Pentagon chuan tun hnaiah China-a humanoid robot siamtu lian berte zinga mi Unitree chu China sipai nena inzawmna nei nia an ngaih company list-ah an telh bawk a. Beijing chuan he puhna hi a dik lo tiin an chhang let ve a ni.

     Inrinni-a robot games hawnnaah khan ruahmanna siamtute leh robot siamtute chuan Chinese humanoid robot-te chuan mihringte record siam hrang hrang an khum thu an sawi a, humanoid robot zabi tel chu inngeih takin field-ah an che za a, inrem tak leh inthunun fel takin hmuh nuam takin an che vel a ni. Meter 100 intlansiakah humanoid robot pakhat chu second 9.39 chhungin a tlan chhuak thei a, kum 2009-a Jamaica infiammi Bolt-a record siam second 9.58 chu a khûm a ni.

     Inzuansân-siakah humanoid robot pakhat chuan meter 2.88 a zuang thei a, hei hi humanoid robot dangin record a lo siam tawh meter 1.95 aiin a sâng zawk a ni. Kum 1993-a Cuba mi Javier Sotomayor-a record siam meter 2.45 pawh a khum bawk a ni. Heng rawn khumtu robot-te hi Beijing-a awm X-Humanoid-te siam a ni. Chinese smartphone company Honor-in an siam humanoid robot chuan inelna pakhat a tihchhinnaah meter za tlan chu second 9.39 chhungin a zo a, chu chu record thar a ni tiin company chuan an sawi a, a tlan chak theih bera a tlanin second khatah meter 14.5 a tlan thei a ni.

     Hetiang taka robot-te an changkan mek lai hian mi thiamte chuan humanoid robot-te hi tunah rih chuan hmasawnna entirna, lemchan leh zirchianna atan chauh hman an la nih thu leh a tak taka mipui vantlang hnena hman lar ni tur chuan hun a la duh dawn tih an sawi. Robot infiamna entute zinga ṭhenkhat chuan humanoid robot-te hmasawn chak lutuk chuan a tiphur hle tih an sawi.

     Humanoid robot-te chu "an changkang chak hle," tiin zirtirtu leh Beijing khuaa cheng Li Yanfeng chuan a sawi. "A tirah chuan artificial intelligence hi ka pawm thiam vak lo va. Mihringte ai an awh mai ang tih ka hlauh avangin ka dodâl deuh hial a ni," tiin a sawi a. "Mahse, he hmasawnna hi dan rual a ni lo tih ka hriat hnuah ka lo en ve duh ta a ni." a ti. "Hetiang infiamna hi mihring tan chuan thil pangngai tak a ni a; mahse tunah chuan robot-ten an ti thei ta a, mak ka ti hle" tiin mipui zinga mi Yang Shangzheng chuan a sawi.

     A fapa nena infiamna en ve Liu Tao chuan, "China-in robot ṭha ber ber a neih ang angte hmuh ka beisei," a ti. Kumin robot infiamnaah hian a huaihawttute sawi danin ram sawmparuk an tel a, chung zingah chuan Germany, Japan leh U.S. te an tel a, rit inchawisiak leh in-hrui pawh hmang te pawhin an inel a ni.

𝐓𝐚𝐧𝐤𝐲 𝐜𝐡𝐡𝐮𝐧𝐠𝐚 𝐭𝐮𝐚𝐥𝐭𝐡𝐚𝐭𝐭𝐮 𝐩𝐚𝐥𝐢 𝐭𝐞

- Joel Lairemsanga

Kawngpui sira tuichhe luankawra luhna tura lei laih khuar thuk tak khuhna chhin an hawn rualin pa pakhat a zuang lut a, a tlu zui nghal der mai. A thianpain a au va, chhanna reng a awm lo. A hlauhthawn em avangin a zuang lut ve nghal. Minute khat hnuah an hotupa a lo thleng a, a mi chhawr pahnihte chu chhan tumin a zuang lut ve leh a, vanduaithlak takin darkar khat hnuah ruang pathum lak chhuah a ni. An kutah hmanrua an lo la hum a, mak ti hmel leh mangang hmel an pu vek bawk. An thih chhan chu chemte a ni lo a, silai lah a ni hek lo. Mitin a hmuh theih loh leh benga hriat theih loh; mahse second sâwm leka nunna latu chu ‘boruak’ mai a ni.

Hetiang thil thleng hi vawiin thlengin khawvel pum huapin a la thleng ta fo mai. Septic tank, tuizem, lawng chhiat hnuai bera tui dahna khur, buh dahna khur, uain sawrna khur ang chi – hmun khar chip leh boruak thar luh ṭhat lohna hi sap ṭawngin “Confined Space” an ti. A chhungah hian nunna tana hlauhawm boruak chi hrang hrang a insiam ṭhin. Tanky chhungah hian tualthattu palî an cheng a, an ṭanrual phei chuan mihring tan dam khawchhuahna kawng a vâng hle. Chung tualthattu palite chu i han sawi thuak thuak teh ang:

𝟭. 𝗛𝘆𝗱𝗿𝗼𝗴𝗲𝗻 𝗦𝘂𝗹𝗽𝗵𝗶𝗱𝗲 (𝗛₂𝗦)

Artui tawih rim a nam a, chutichung chuan hnar a bum thei hle si. A chhan chu 100ppm a pelh tawh chuan kan hnar hi a ti chawmawlh nghal a, a rim kan hre thei tawh lo a ni. Vawi khat lek kan hip luh pawhin kan thluak a khawih buai a, second hnih khat lekah kan tlu nghal thei a, minute khat ral hma hauhin nunna a la thei. Ek, zun, sangha lu leh sa tawih atangin a lo insiam thei a, Fire Department mite chuan “Knock-down gas” tiin an ko hial.

𝟮. 𝗠𝗲𝘁𝗵𝗮𝗻𝗲 (𝗖𝗛₄)

Methane hian rim a nei lo a, rawng pawh a nei lo, mahse meizial si lek pawhin a tipuak thei thung. A hlauhawmna ber zawk erawh chu boruak ṭha Oxygen a hnawt chhuak vek ṭhin hi a ni. Thil ṭawih reng reng atangin a lo insiam chhuak a, a pung khawl tial tial ṭhin.

𝟯. 𝗖𝗮𝗿𝗯𝗼𝗻 𝗗𝗶𝗼𝘅𝗶𝗱𝗲 (𝗖𝗢₂)

Hei hi kan thawk chhuah ve bawk kha a ni a, hei vang hian kan ngaihthah fo. Nimahse za zelah sawma tam a tlin khawm chuan kan lu a tihai muai muai thei a, nikhaw hre lovin min tluk zuitir thei bawk. Za zela sawmhnih a pelh phei chuan thawk a titawp hmak thei.

𝟰. 𝗢𝘅𝘆𝗴𝗲𝗻 𝘁𝗹𝗮𝗸𝗰𝗵𝗵𝗮𝗺

Mihring dam khawchhuah nan boruak zingah za zela sawmhnih tal hi Oxygen a nih a ngai. Tanky chhungah erawh hi chuan oxygen hi za zela paruk atanga sawm inkar chauh a awm fo. Hei vang hian vawi hnih khat lek thawk kan lak chuan kan lu a hai a, kan ngaihtuahna a buai a, au chhuah nachang pawh kan hre hman tawh lo thei a, minute li chhung Oxygen kan hmuh loh chuan kan thluak a thi ṭan tawh tihna a ni.

Boruak hlauhawm kan sawi te hian second sawm pawh tling lovah mihring nunna an la thei. Chuvangin khawvel pumah tanky chhung hi “Immediate Danger to Life and Health” tiin puan a ni tawh nghe nghe. Khawvel history-ah chuan tanky-a luh avanga thihna tam zawk hi “rescuer death” an ti a, mizo tawng chuan "Chhanchhuaktuin nunna a channa" tihna a ni a, a chhan chu a chhantu an thih deuh zel vang a ni.

Kum 2017-ah khan Key Largo, Florida, USA –a kawngpui siam hna thawktu pa pakhat chu kawng sira lei laih khuar, metre li-a thukah chuan a chhuk a. A reh rei deuh tak avangin a thawhpuipain a va bih a, a lo tlu reng mai chu a hmu ta. Chhan tumin a zuang thla ve nghal a, ani pawh a tlu zui ve leh ta tlat mai. An hnathawhna supervisor a lo thlen ve leh chuan a hnathawk pahnihte chu chhanchhuah tumin a zuang thla ve leh a, vanduaithlak takin mi pathumin nunna an chan ta a ni. An post-mortem report-ah chuan- “An takaah hydrogen silphide a lut a, hei vang hian oxygen tlachhamin an thi ta a ni” tih a ni.

Kum 2022-ah Delhi-a Jahangirpuri veng pakhatah chuan chhungkaw pa berin an in hnuai septic tank a en fiah a, a lo chhuak leh ta lo. A nupui chu mangang takin a au va, a fapa upa ber kum 18 mi chu a pa chhanchhuah tumin a zuang lut ve nghal a, ani pawh a rawn chhuak zo ta bik lo. A fapa naupang zawk kum 16 mi chuan a u au ri a hria a, ani pawh a zuang lut ve leh a. Vanduaithlak takin pa ber leh a fapa pahnihin nunna an chan a, an lainatawm hle. An naupang ber kum 11 miin pawn atangin ṭap chungin a au a; mahse a chhungte tan tih theih a nei tawh si lo. Delhi Fire Service ten an enfiahnaah chuan H₂S leh Methane a tam lutuk tih an hmu chhuak.

Kum 2019-ah South Africa-a Stellenbosch-a uain siamna hmun ropui takah chuan grape sawrna khur lian tak, metre 12 a thukah hnathawk pahnih an lut a, grape rimtui tak a nam chem chem a, an tan chuan hnathawhna hmun pangngai ve mai a ni. Mahse an luh hnu minute hnih lekah pakhat zawk chu a tlu ta mai a. Pakhat zawk chu hmanhmawh takin a tlanchhuak thei hlauh a, a him ta hlauh mai. An han chhui chian chuan grape tawih khan Carbon Dioxide tam lutuk a lo siam a, Oxygen a lo awm lo tih an hmu chhuak. Boruak ṭha awm lohna hmunah chuan rimtui ber pawh thihna thlentu doral a lo ni thei tihna a nih chu.

Ram changkang apiangin “No Man Entry” dan an kalpui tawh a, mihring luh kher ngai lovin vacuum truck lian, camera nei robot leh remote control hmanrua hmangin tanky an tifai tawh a ni. America rama OSHA danah chuan boruakah hian Oxygen hi za zela 19.5 aia a tlem chuan tanky-ah luh phal a ni lo bur. Luh dawn chuan gas test hmasak te, boruak kah luhna khawl hman te, taksaa hrui zem te leh pawn lama lo vengtu dah te a ngai vek bawk.

India ramah pawh "The Prohibition of Employment as Manual Scavengers Act, 2013" chuan mihring chu fimkhur lo taka septic tank leh khuarkhurum ang chi reng reng-a luh a khap bur tawh a, tu pawh he dan bawhchhia chu kum hnih thleng lung in tantir emaw, cheng nuai hnih thleng chawi tir emaw theih a ni. Supreme Court meuh pawhin kum 2023-ah khan hetiang avanga thi chhungte hnenah zangna dawmna cheng nuai sawmthum pe turin state sorkar a hriattir tawh nghe nghe.

Tanky-ah luh kan ngai a nih chuan hetiang hi zawm tur a ni:-

1. Nangmahin lut ngai suh. Tanky tihfai a ngai a nih chuan professional ko la, anni chuan khawl nen an thawk thlap ang. “Ka ti ve mai ang, a har hleinem” tih rilru hi thihna bul a ni.

2. Tu emaw a chesual a nih chuan zuang lut ve nghal suh. I tlawmngaih vang pawh ni se, zuang lut nghal ngawt suh ang che. I tih theih awm chhun chu Fire & Emergency Services koh vat a ni. Anni chuan boruak thianghlim hipna khawl, hrui chak tak leh hmai tuamna bik an nei a, an kuta dah a him ber. Amaherawhchu hetiang koh mai tur an awm lo a nih chuan rilru chiai mai lovin, ngihtuahna fim tak hmangin hmanrua ruai la, midang pun nachang hre bawk ang che.

3. Mahni ngei i luh a ṭul a nih si chuan hei hi zawm ang che: I luh hmain a chhin hawng la, darkar khat tal hawng ang che. Blower hmangin a chhung boruak hip chhuak la, pawn boruak thar luhtir rawh. Gas Detector hmangin O₂, H₂S, LEL, CO test hmasa ngei ngei ang che. I kâwngah hrui hreng la, pawn lamah mi pahnih talin lo chelh bawk rawh se. A hranpaa siam hmui tuamna ‘Breathing Apparatus’ a awm loh chuan lut lui lo hram ang che. Puana siam hmui tuamna satliah ringawt kha H₂S lakah chuan engmah lo mai a ni.

Florida-a mi pathum thi te, Delhi-a chhungkaw pakhata mi pathum thi te, South Africa-a grape khura tlu ta te kha an vai khan inhmangaih tak an ni vek. Mahse hmangaihnaah finna a tel loh chuan thlanmual kawng a hnai ṭhin tih hi khawvel history hian a nemnghet chiang hle a ni.

Thufingte 22:3 chuan "Mi hmanghria chuan thil ṭha lo chu a hmuhin a biru ṭhîn a; Mi mâwl erawh chuan a tâwn mai ṭhîn a, a tuar phah thin” tih min hrilh. Tanky chhung boruak hi mita hmuh theih loh kan doral lian tak chu a lo ni. Tunah chuan a hlauhawm dan kan hre ta a, kan zawm dawn em le?

I fa, i kawppui, i thian, i ṭhenawmte hnenah “Tanky-ah lut suh, mitkhap kar leka nunna chan theihna a ni” tiin hrilh thin ang che. Fimkhurna thu sawia i ṭawng chhuah khan nunna i chhanhim tihna a ni. Nunna hi lei theih a ni lo a; mahse second khat lek chhungin a ral thei tlat si.

𝗦𝗰𝗼𝗿𝗽𝗶𝗼 𝗡 𝗣𝗶𝗰𝗸𝘂𝗽 𝗮 𝗽𝗶𝗮𝗻𝗴 𝘁𝗮! | 𝗛𝗶𝗹𝘂𝘅 𝘁𝗮𝗻𝗮 𝗵𝗺𝗲𝗹𝗺𝗮 𝗹𝗶𝗮𝗻 𝘁𝘂𝗿 𝗰𝗵𝘂!

- Joel Lairemsanga

     Mahindra hian a SUV lar ber pakhat Scorpio N behchhanin pickup truck thar a siam mek a, tunah hian “Global Pik Up Concept” tia an koh lai a la ni rih. He pickup hi Scorpio Getaway hlui thlaktu tur leh Toyota Hilux, Isuzu D-Max te rawn khing phak tura duan a ni.

     A concept chu kum 2023 August ni 15 khan South Africa ram Cape Town-ah pho chhuah hmasak ber a ni a, production version tak tak erawh kum 2027-ah Australia, South Africa leh New Zealand-ah te hralh hmasak ber a ni ang. India ramah chuan kum 2027 hnu lam emaw, 2028 kum tir lamah emaw a lo luh beisei a ni a, tunah hian Nashik bula kawngpuiah camouflage belin an test mek a ni.  Mahindra hian kum 2028 aṭangin Nagpur-ah Left Hand Drive model pawh siam ṭanin Gulf leh Europe ramah te thawn chhuah a tum bawk.

     Scorpio N Pikup hian Scorpio N leh Thar Roxx  ruhrel ang thoin ladder-frame chassis a hmang dawn a; mahse a ke hma leh hnung inkar wheelbase chu a thui bik dawn a ni. Scorpio N SUV wheelbase 2750mm aiin a thui zawk ang a, 3000mm a pelh dawn avangin a hnunga bungraw phurhna load bed pawh a lian ṭha dawn hle. A sei zawng pumpui hi 5.3 meter vel, a vang 1.9 meter, a san zawng 1.85 meter vel ni turah ngaih a ni a, ground clearance pawh 225mm chuang a neih hmel a, a ruak lai kerb weight erawh 2100kg vel, a rih zawng pumpui GVW chu 3200kg vel a nih hmel. Mizoram ang-a kawng chhia leh lui-a kal vel nan a tawk viau ang.

     Engine leh performance lamah chuan duhthlan tur chi hnih a awm rin a ni. A lar ber tur chu 2.2-litre mHawk Gen-2 turbo diesel engine a ni a, hei hi Scorpio N-a hman mek ang tho a ni. Hei hian RPM 3500-ah horsepower 175PS a pe chhuak a, torque 400Nm chu RPM 1750 leh 2750 inkarah a nei thei. Petrol duh tan 2.0-litre mStallion turbo petrol engine 203PS leh 380Nm pe chhuak thei a awm tel bawk ang. Gearbox-ah 6-speed manual leh 6-speed torque converter automatic thlan tur a awm ang a, 4x4 system a nei ngei ngei dawn bawk. Shift-on-fly 4x4 a nih bakah kawng harsa paltlangna tur low range gear te, a ke tang leh vir thlawn tur venna tur mechanical locking rear differential te, chirh, ṭiau vut leh vûr-a tlan tura duh thlan theih tur terrain modes hran theuh a nei thlap bawk ang.

     Hnathawh nana duan a nih avangin thil a phur thei hle dawn a, a load bed-ah hian 1200kg vel thlenga rit a phur thei dawn a, bungraw phurhna trailer-a hnuh dawn chuan 3500kg lai a hnuk thei dawn bawk. Fuel tank pawh 57 litre leng a ni dawn a, a tlan thui thei hle ang. Suspension lamah chuan a hma lamah independent double wishbone leh coil spring a hmang ang a, a hnungah erawh rit phurh ngam turin leaf spring emaw 5-link setup a hman rin a ni. A ke hman tur hi 17-inch emaw 18-inch alloy wheels a ni ang a, off-road AT tyre 265/60 R18 vel vuah a ni ang. Braking system atan a hma lamah disc brake a hmang a, a hnung lamah drum brake a hmang thung ang.

     A chhung lam chei dan leh features-ah chuan Thar Roxx leh Scorpio N chhung ang chiah a nei dawn a, dashboard-ah 10.25-inch touchscreen pahnih a awm ang a, pakhat chu driver hmaa meter atan, pakhat chu infotainment atan hman a ni ang. 5G sim-based connectivity a neih dawn avangin internet a chak ang a, wireless Android Auto leh Apple CarPlay a support vek bawk ang. Boruak vawn daihna atan sunroof, dual-zone automatic AC, a hma seat atan tihvawh leh tih-lum theih ventilated seats, phone charger wireless, Type-C charging port leh 12V socket a awm thlap dawn bawk. Steering pawh tilt and telescopic adjust theih a ni ang a, leather wrap a ni ang.

     Safety leh technology lamah pawh a rintlak hle dawn a, airbag paruk aia tam a awm dawn a, 360-degree camera, tyre pressure monitor system, hill hold, hill descent control leh traction control a nei vek ang. A bik takin Level-2 ADAS a awm dawn a, hei hian adaptive cruise control, lane keep assist, auto emergency braking leh traffic sign recognition a keng tel ang. Mahnia parking tih theih turin semi-automatic parking feature pawh a nei dawn a, pickup-ah chuan a changkang ber pawl a ni ang. A platform hi Global NCAP 5-star rating hmu thei tura duan a ni bawk.

     Mahindra hian chi thum vel a siam rin a ni. A hniam ber Z4 chu hnathawhna atan bika duan niin 4x2 leh 4x4 option a awm ang a, features a nei tlem bawk ang. A laihawl Z8 chu chhungkaw hman atana duan niin 10-inch screen leh ADAS a awm ang. A sang ber Z8L chu lifestyle pickup full option, sunroof, leather seat, 4x4 AT nen a ni ang. Single-cab version pawh sumdawnna lam atan an siam tel a rinawm bawk.

     A man tur beisei hi ex-showroom-ah ₹ nuai 22 aṭanga ₹ nuai 28 inkar ni turah ngaih a ni. A base model 4x2 manual chu ₹ nuai 22 vel, a top 4x4 automatic chu ₹ nuai 28 vel a nih a rinawm. On-road hisapin Mizoram-ah chuan ₹ nuai 26 aṭanga ₹ nuai 33 inkar a ni ang a, Toyota Hilux ₹ nuai 35 aiin ₹ nuai 5-7 velin a tlawm zawk ang.

     Scorpio N Pikup hi "SUV Pickup lirthei chuan nuam leh tangkai ni kawp tura duan a ni a, kum 2027-ah ram dangah hralh chhuah a ni hmasa ang a, India leh Mizoramah chuan kum 2028 tawp lam emaw 2029 tir lamah kan hmu ve thei chauh ang. Off-road ngaina, bungraw phurh ngai bawk si te, chhungkaw zinna atan motor chuan nuam leh him duh tan chuan nghah chhuah man hla tak a ni ngei ang. Tunah rih chuan test mek a ni a, official specification kimchang zawk chu tlangzarh dawn hnaihah chauh puanzar a ni ang.

     Heng hi tun dinhmuna hriat theih chin a ni a, a lo chhuah tak tak hunah tlem a danglam thei tho bawk.