CHRISTMAS DISEASE

Engnge a nih?

“Christmas Disease” hi inthlahchhawn chi natna chi khat, vang em em mai a ni a, he natna nei te chuan an taksaah hliam chhe te tak tak pawh nei sela a thi a tawp hlei thei lo thin a ni. Hei hi a chhan ber chu thisen tikhaltu factor IX tlakchham vang emaw, taksain a siam chhuah tlem vang a ni. Enkawl loh phei chuan awlsam taka nunna chan theih natna a ni ve tlat.

A hmingah Christmas a awm avang hian Kristian te’n Lal Isua piancham kan lawm thin Krismas nen hian a inlaichin hnai hran lo va, kum 1952-ah khan mi pakhat Stephen Christmas-a chu he natna vei an hmuh chhuah hmasa ber a nih avanga he hming hi lo pu chho ta zel a ni. England lalnu Queen Victoria-i thlah kal zel Spain, Germany leh Russia lal chhungkuaah he natna vei hi an awm duah avangin ‘Royal Disease’ tiin an ko bawk a, ‘Factor IX Deficiency Disease’ tiin an ko bawk. 

A lan chhuah dan:

·         Serhtan vang emaw, ha phawi vang emaw, taksa tih hliam vang leh inhliam hlek pawhin thi-put a tawp hlei thei lo.

·         Hnarthi tawp hlei thei lo emaw, taksa-a thi duk awm deuh reng.

·         Zun thi deuh reng.

·         Ruh chuktuah vung leh na.

He natna hmuh chhuah dan: 

·         Thisenah thisen tikhaltu eng zata tam nge a awm tih hre turin Factor IX Test.

·         Engtia rei nge thisen khal nan hun a duh tih hre turin Activated Partial Thromboplastin Time Test emaw Prothrombin Time Test.

·         Taksain thisen a tihkhal chak lam hriat nan Fibrinogen Test.

A enkawl dan:

Christmas Disease hi a tihdam theih loh a; amaherawhchu thunun theih a ni. Sawi tawh angin thisen tikhaltu Factor IX tlakchham natna a ni a,  factor IX injection hmangin an enkawl thin.  Factor IX injection hi laboratory-a siam chawp leh mihring thisen atanga siam a hman theih a; nimahsela mihring atanga siam chu natna hrik hlauhawm tak tak- HIV, Hepatitis te inkaichhawn a awlsam avangin laboratory atanga siam hi a him zawka ngaih a ni.

Taksaah hliam a awm chuan desmopressin ointment hi hliama hnawih atan doctor-te’n an chawh fo. Amaherawhchu hliam a nasat viau chuan doctor pan vat a him ber.

ZAN LAMA EI LOH TUR TE

Zanriah puar taka ei hnu pawha ei tur la dap ching i ni em? Lo lungngai bik lo phawt mai teh. A chhan chu hetiang mi hi tam tak an awm ve tho a nia!  Thil chin tha tak erawh chu a ni hauh lo. Mi thiamte chuan zanriah puar taka ei hnu pawha thil la ei vak vak hi taksa tan a hrisel lo hle an ti. Mut a tibuai thei a, taksain mut a hmuh that loh chuan hrisel lohna hrang hrangin taksa a tlakbuak awlsam ta thin a ni.  Mi thiamte’n zan lama ei miah loh tur an sawi te tawi tein i lo tarlang ang:-

[1]. Serthlum Tui: Serthlum hian thur  a pai tel avangin pumpui hnun lawng neih a awlsam a, pumpui chak lo benvawn a siam thei a ni. Serthlum ai chuan zan lama apple ei hi a tha zawk a ni.

[2]. Ice Cream: Ice cream hian thau leh thlum a pai tam a, zan mutnaah taksa a lo hahdam bawk si avangin thau chhia leh thlum te a lo kangral zung zung ta si lova, taksaah thau chhia a lo tam ta thin a ni.

[Zu]. : Zana zu in hian mut a tisukuk thei a, zan laiah thawh at a thlen awlsam em em bawk. Zing vartianah zun chhuakin mi a kaitho duh hle bawk.

[Chips]. : Chemical chi khat Monosodium glutamate a pai tam avangin mut chhuak tur a veng hlauh thin.

[Chocolate]. : Chocolate-ah hian chemical ‘Caffeine’ a tam avangin taksa a tiharhvang  thin a, mut tam duh chuan zan lama ei hauh loh tur a ni.

BRUCE LEE KHA ENG VANG CHIAHA THI NGE?

A pianpui hming dik tak “Lee Jun-fan” tih aia  “Bruce Lee” ti-a kan hriat lar zawk hi Kungfu style chi khat ‘jeet Kune Do’ hmu chhuaktu a ni.

Mi tam tak chuan Bruce Lee hming kan sawi  hian kan rilruah kungfu ringawt a rawn lang awm e. Mahni mihringpuite nena inrem taka awm duh mi leh chumi thu au puitu a nih thu te, kan chenna khawvel humhalh duhtu a nihna te hi kan hriatpui kher awm lo ve.

Chumai a la ni hleinem, hla phuah lamah a tui hle bawk. Amah hrechiangtute chuan- “Bruce Lee-a hian a ke a khai loh chuan hla thu hmangin remna thu a tlangaupui thin” an tih hial chu!

Heti khawpa mi hlu leh ngaihsanawm hian July ni 20, 1973 khan kum 32 leka upa niin lei dai a lo bel ta a, a uiawmin lainattu pawh vawiin thlengin mi tam tak a la nei cheu mai! A thihna chungchangah pawh hian thu leng-vak a tam thin hle a, thluaka thisen zam chat (Brain aneurysm) vanga thi a ni ti an awm laiin, China misual rual khat (Chinese gangsters) te thah a ni ti tawk an awm bawk.

Engtin nge Bruce Lee a thih?

Sawi tawh angin Bruce Lee thih danah ngaihdan lian tak pahnih a awm a. Khawi hi nge thu dik zawk ni ta le?

A thattu chu tu pawh lo nise, a thih pui ber chu thluak vung (Cerebral Oedema) vang a ni tho tho tih hi mi thiam tam zawk te ngaihdan a ni.  Cerebral Oedema chu thluak vung chi khat a ni a, chu chuanin thluak hnathawh tibuaiin nunphung maksak tak tak a thlen thei a,  thaw hah a thlen mai bakah thawchhamin awlsam takin a thih theih a ni.  Mi thiamte chuan Bruce Lee hian Cerebral Oedema a neih avangin film a siam changin a thaw a chham zauh zauh thin an tih chu!

A hrechiangte sawi dan chuan Bruce Lee hian a thih ni zing dar 4 khan a film siam tum mek ‘Game  of Death’ chungchangah film siamtu lar tak Raymond Cho chu Hongkong-ah a hmu a, an inkawmlai hian Bruce Lee hian a lu chu na a tih hle thu a sawi a, Bruce Lee-a thiannu  Betty Ting Pei chuan natchhawkna damdawi a pe a, he a damdawi pek hi chemical chi hnih - Aspirin leh Meprobamate pai a ni.

Hemi ni vek hi Bruce Lee leh filmstar ve bawk George Lazenby te’n film chungchang sawi paha zanriah ei tlan an tum ni a ni. Zanriah ei hunah pawh chuan a rawn lan tak loh avangin an ruahmanna siam hi a tlawlh a, a chhan pawh Bruce Lee-a luna khan reh lam pan lova a nat zual zel avangin Bruce Lee hi Queen Elizabeth Hospital-ah an hruai a lo ni a, he Hospital ngei hi kungfu star lar leh chuai tawh lo tur Bruce Lee-a’n a hringnun khawvel a zawh tawpna hmun a lo ni ta a ni.

Mi thiamte’n post-mortem an han tih chuan a luna damdawi atana a damdawi ei-a Aspirin leh Meprobamate te kha an inhal (allergic reaction) a, chu chuan Bruce Lee-a thluak kha tivungin 13% laiin a len phah a ni. Hei hian a thluaka tui (CSF) chu a tipung hluai a, hei hian kungfu legend chu a hringnun hlu tak a lo chhat ta a ni. Kungfu pasaltha ruang hi Seattle-ah an la a, an phum ta a ni.

Kan sawi tawh angin China misual pawl khatin Bruce Lee hi an that a ni tih thu a awm ve bawk a. Engpawhnise, a finfiahna leh hre chiangtu ni-a insawi fel fai tak an awm loh avangin misualin an that a ni tih thu chu a zuzi ta zawk a ni. Hetihlai hian Bruce Lee-a thih danah hian mi thiam tam takin zirchianna an nei mek zel bawk a ni tih kan hriat ve a tha awm e.     

ARTUI CHHUM vs ARTUI KAN

Hriselna atan khawi hi nge ṭha zawk ang tih hi zawhna awm thei tak a ni âwm e. Tun ṭumah hian omelet leh boiled egg chungchanga mi thiamte sawi i lo zir ang u:-

Artui kan (omelet)-ah hian a chaw ṭha pai nutrient te kan tichhia a, thau chhia a pai tam bawk a. Chuvangin artui kan (omelet) ei ngun chuan BP sang neih a awlsam hle.

Artui chhumah hian a chaw ṭha pái te a chhiat ve loh mai bakah ruh tana vitamin ṭha a siam a, hriselna atan a ṭha em em a, mit khawhmuhah harsatna a siam ve lo bawk. Chuvangin artui chhum (boiled egg) ngei hi ei zawk tur a ni.

MUT DAN ŢHA

Pum lam tha lo, ek hunbi mumal thei lo leh ulcer (Gastric & Duodenal Ulcer) nei tan chuan zan mutnaah pang veilam delha mut hi a tha an tih tlat chu!

Pang dinglam delha mu tan chaw kawng lawng leh pumpui hnun lawng neih a awlsam bakah a nei tawh tan a zual duh a, pum khing el ul neih pawh a awlsam bik.

Thil harsa lem lo tak a nih avangin zawm ngei chi a nih hmel e.

V-E DAY

When, after World War II, Europe celebrated victory over the Nazis, they called it VE Day - Victory in Europe. 

Some years later, a boy was asked by his history teacher what VE day stood for. He replied: "Victory every day". Well, that is not what it means, but it is certainly what it can mean.

In the light of God's sovereignty and love, we, who are His redeemed children can live out our lives in full assurance of certain victory - this day and every day.

TIAL TIAL

Mahni neiha lungawi lohna avangin hlemhletna a pung tial tial a;

Hlemhletna avangin kan hausa tial tial a.

Chutih laiin kan duhamna a zual tial tial bawk a;

Duhamna chuan mi hlim thei tak kha mi lungngaiah min chantir tial tial bawk a.

RIHNA HLOH DAN ŢHA

Thâu duh leh chêr duh kan inpel suau suau a ni ta ber e. Thau dan kawng chu dah țha phawt ila.

'Intihcher nan dieting, taksa sawizawi, cherna damdawi ei' tiin kawng kan dap nasa hlawm hle.

Mithiamte chuan purunsen hi engtikawng pawhin- a hlanga ei, bâwl, a tui in te hi rihna tihhniam/intihcher nan a țha lâwt-lak e an tih chu.

ŢHUT DAN FIMKHUR A ŢUL

Mithiamte chuan kan țhut dan hian kan hriselna kawngah nghawng thui tak a nei an tih tlat chu!

Bawp khawkherh emaw, khûp-a malpui lehlam nghata țhut fo te hian BP sang te, thisenzam puar (varicose vein) te, tha khûr te a thlen thei a nih chu.

A țha berah chuan engtiang pawha kan țhu a nih pawhin țhut dan ngaia rei tak țhu lovin, țhut dan thlâk chhèn tur a ni.

MOTOR LUANKAWR!

Thangkhat lian zet liam taah khan sikul chawlh laiin mi aiah PWD labourer-ah ka tang ve zawk a.  Khawchhak tlangdung kawng pawimawh tak pakhat  kan metal a (road metal).  Alkatra thehtu-ah ka tang ve kha a nia. PWD SDO, a Gypsy-a Daduhi zai, “Ka tan i chuai ta maw” tih ngei mai ngaithla mek chuan, “Nang kha, alkatra kha i theh uar lutuk, a hek lutuk ang asin,…” tiin mi rawn hau a. Ka va phu chiang tehlul em. Ka post chelh, alkatra thehtu atang chuan kawng metal tur phiatfaitu-ah ka tla thla nghal  a nih chu. Hairehai. J

Alkatra kha hmang hek viau-ah min ngai a ni a; ngaihtuah chian chuan a thehna lah kha tel tin ruak, a pang pakhat perek-a verh kuak chawp, lehlam a khaina hmanga hnunglam leh hmalamah then tawn hnua sin te te-a far chauh kha a ni lek fang a, han hek viau tham a ni lo reng reng a. A pawimawh ber tih hial tur alkatra berin balu leh lung, rora a chiah hneh loh chuan kan kawng siam hi tlo ngaihna a awm lo ang chu aw ti-a ngaihtuah chungin kawng chu  ka phiat fai ta sur sur a.

Rin ang ngeiin kan kawng siam kha a hnuah thawm that ngai, motor kalkawng pawh ni lova motor luankawr a nih zawk chang a awm ta zauh zauh reng a ni. 

THO BAWM KHER SANGHA ZAWRH LEI A THA !

Kan State hi sangha sa lamah pawh kan la intodelh loh avangin State dang atangin kan la chaw lut nasa hle a. Chuvangin kan Bazar-a sangha zawrh tam tak chu hmun hla leh boruak lum atanga rawn thleng a nih avangin a vawn that kawngah helama eizawngtute lu chu a hai fo awm e.

Tlangkam titi-a kan hriat fo chu- Phai sangha lian chi rawn thlengte hi mitthi ruang tawih harna atana hman- Formalin hmanga rawn jection a ni tih thu hi. Hei hian sangha sa ngaina tak tak te a tiralkhel a, an ei loh phah nasa hle a, tualchhung thar lah a lo tam tawk si lo a.

Bazar-a sangha zuartu nu pakhat ka kawm pawhin sangha sa chu a sa ngainat a nih thu leh, ama zawrh ngei erawh chu a ei duh loh thu te, Silchar atanga an lakluh a nih thu te min hrilh a; chutia mahni zawrh ngei pawh a ei duh loh chhan ka zawhna chu nui ringawtin min chhang! Hemi hnu atang hi chuan phai sangha hi ka la ei ta rih lo.

Hetiang hi a nih teh nuaih avang hian mithiam te’n mi nawlpuiin awlsam taka formalin hmanga sangha vawn that a nih leh nih loh hriat dan mawlmang leh awlsam tak an sawi hi chhinchhiah a tha awm e:-

Bazar-a sangha zawrh hi Tho rualin an lo vir laih laih chuan ngaih tha takin a lei ngam a;

Tho hmel hmuh tur a awm miah loh erawh chuan mitthi ruang tawih harna ti-a kan hriat lar 'Formalin' hmanga vawn that a ni thei.

Formalin hi Tho hian an bawm ngai lo!

THU UAR LEH MIZOTE

Dawt sawi lo tura zirtirna dawng Mizo Kristian-te zingah hian dawt ka sawi a ni tih in-hre lo khawpa dawt sawi fo hi kan tam awm e. A chhan chu- uar taka thil sawi thin kan nih vang a ni awm e.

Tawng Upa kan neih tam tak hi han ngaihtuah ila, thil sawi uarna a tam hle tih kan hria ang. Entirnan:- Thil hnai te sawi nan, “Tuibur hmuam da”, tih te,; “Chil chhak phak” tih te, “Lung vawm phak”, tih te leh a dang tam tak sawi tur a awm a ni.

Heng kan Tawng Upate hi kan hnual suat tur a ni tihna erawh a ni hauh lova, thiam tumin kan zir ang a, kan humhalh zawk tur a ni ang.

Ka’n sawi duh erawh chu- tunlai thangtharte hian thu kan uar nasa zual hle niin a lang. Sermon sawi thenkhat hian a eng-a-mah hmain, “Za-a za Kristian ramah hian…” te an han ti ngawt zel a, khawi zirchianna nge an hma theh ang aw ka ti thin. Kei mai pawhin-a ka hriat ve-ah chuan Za-a za kristian ram ni tawh lovin, za-a sawmriat tha emaw vel chauh kristian awmna ram kan ni tawh zawk reng si a. Tin, Mizo chhul chhuak zinga mi ropui thenkhat, tu leh fa nei duah tawhte kan fakna tawngkamah, “ Mizo nula/tlangval ngat” kan han ti thlazen bawk a, tu leh fa nei duah tawh a ni tih lam kan bengkhawn tawh lo niin a lang.

Vawikhat phei chu hetia kan mizo officer pakhat facebook lama an faknaah “Mizo tlangval ngat” tih an lo hmang a, a nupui chu a lawm loh hle nghe nghe kha. Kelkang harhna chhima kal zawng zawngte deusawhnaa ngaihtheih tura, “Kelkang Harhna chhima kal zawng zawngte leh a kal ve lote thlarau chan chu a inang leh ta vek mai,” han ti duh lah bo hek suh. Hetianga sawi ngam te hian a kal zawng zawngte thlarau nun hi an zir vek a nih loh phei chuan huai taka Thlarau Thianghlim sawichhiatna a ni lovang tih a har hle. Heng lo pawh hi sawi tur tam tak a awm nghe nghe. Duhtawk mai ila.

Kan Pi leh Pute atanga kan thu leh hla inrochun thenkhat atang pawh hian thu uar hnam kan ni lawmni a tih theihin a lang. Thil nihna tak sawi lova thu khuh tak hnam kan nih thu sawi ila tumahin kan hnial awm lo ve. Kan lum a nih leh lum a, kan vawt a nih leh vawt law law ngama nung tura zirtir kan nihna angin mizo kristian-te hian thil hi a nihna ang tak hian sawi ta mai ila, kan sawi uar luattuk avang hian dawt them hi kan sawi zel thei a ni tih hi hriat a hun ta hle. Uar lo taka thil sawi kan thiam lo a nih erawh chuan a ngawih lam chuh ta thung ila. Chu chu kan thlarau nun tan pawh a sawt zawk awm e. 

PU LALLIANSAWMA, R.I.P.

- Joel Lairemsanga

"Lal lenna Zion khawpui tual nuam" tih leh kristian hla dang tam tak phuahtu Pu Lalliansawma chu nizan 7:10 p.m. (08/02/2017) khan Chuap Cancer avangin Grace Nursing Home-ah boralin chatuan atan a chawl hlen ta. Ka ui kher mai.

Nikum November Ni 3-a Aizawl Civil Hospital-a ultrasound a rawn tih trum khan kan lo titipui hlut a, amah pawh khan,"In bula awm chu a nuam barh barh hle mai," a ti ve hial asin le!

Lawng chawlhna chunglam Jerusalem-ah chuan muangte'n han chawl teh le.

A Chanchin Tawi:-

Lalliansawma hi October ni 10, 1942-ah Laldanga leh Zachhungi te inkarah a piang a, nupuiah Déngziki neiin fa paruk an nei a. Primary School Zirtirtu niin Darlung khuaah a khawsa a; Presbyterian Kohhranah Tual Upa a ni bawk. Hla 90 zet a phuah. 'Lal lenna Zion khawpui tual nuam' tih hi August ni 1, 1983-a a phuah a ni.

A hla phuah a lar hlawm viau; hriat hlawh zualte:

1. Muhilte tho turin tawtawrawt a lo ri e

2. Van boruak zau takah khian

3. Beramno hnehna van hla mawi ropui ber chu

THAKTHING LEH PATIL

Thakthing hi a tui intih ve ngei ka ring. Tunlaiah chuan thil rimtui atan leh damdawi atan an hmang nasa tawh hle a ni. A hmanna hrang hrang awm zingah chi khat chauh lo sawi ila:-

Thakthing hian chemical chi khat “Cinnamaldehyde” a siam chhuak a, chu chuan Progesterone a tichhuak a, Testosterone insiam tur erawh a dang thung. Progesterone hi hmeichhia tinutu hormone a ni a, Testosterone hi chu mipa timipatu a ni thung.

Chuvangin hmeichhe pian ni si, inla mipa tlat thin “Patil” ho hian Thakthing hi ei tam ta se an inla mipa hauh awm lo asin mawle!

In veng/khuaah patil an awm chuan Thakthing hi lo eitir fo ta che.  Hairehai... :-)

UFO / ALIENS..etc..

(Bible atanga thlirna)

Setana thiltihtheihna leh ramhuai lam uar tharnaah hian thleng thlawk thei (Unidentified Flying Objects- UFO) hi Setana hmanruate zinga telve  ngei niin a lang.

Scientist hmingthang tam takin thleng thlawk thei hi van atanga khualzin lo kal, thil awm tak tak niin an hria a, mi thiam dang tam tak erawh chuan chutiang chu ni theiin an ring lo va. Kristian hruaitu thenkhat erawh chuan thleng thlawk theite chu khawvel zawng zawng chunga vak vel tura Pathian tirh, van mite niin an ring a. Heng ngaihdante hi pawmpui kher lo mah ila mi tam takin van lam thiltihah an ngai a ni. Tunlai hian hetiang thil hi a tam tulh tulh ta tih chu hnial rual a ni lo.

Japan ramah pawh January ni 15, 1975 zan khan an khawpui chungah thleng thawk thei tam tak an hmu a. Sorkar hruaitute leh mipui sang tam takin mak ti taka an thlir thuap lai chuan, thil eng tak, thleng anga bial sawmhnih vel chum karah an thlawk kual vel chhen a. Mel 700 laia hlaa awmte pawhin darkar khat chhunglai an lo hmu a ni.

Chung thil eng (glow)-te chu chhimlam pana an thlawh laiin Police Station leh Sorkar Office tam tak chu biak hlatnain an inbe reng a. Chhum chhah tak chungah an hmuh ngai miah loh thil tam tak thlawk kual vel chhen an hmuh thu an inhrilh a. Chu mi zan chuan khua a thiang hle a, boruak thlirna khawla (radar) lang thei thlawhna thlawk engmah a awm lo va. Van lam thlirna khawl vuntu officer pahnih, Takeo Ohira leh Hiroshi Masazawa chuan hriatphak loh thilmak danglam tak mai a nihzia an sawi.

Tokyo airport bula arsi thlawk lam enfiahtu, Professor Masatoshi Kitamura chuan van sanga thil mak tak thlawk kual vel chhen chu a lo hmu ve a. “Ka khawthlirna khawlah engmah a lang si lo va, ka hmu teuh si a, hriatchian phak loh thilmak tak zawng a ni,” a ti.

Hetiang thil mak za tam tak hi ram tinah an hmu a. Los Alamosa atom siamnaa thawk mithiam pakhat chuan thleng thlawk thei chu mihring hriatchian phak loh thil a nihzia a sawi a. Hriat phak chin nei mihring ngaihtuahna chuan a awmze dik tak kan fiah thei rih dawn lo niin a lang.

Hrilhfiahna dangte:

Erich van Daniken chuan mihringte hriat phak loh thilnung van sanga thlawk thin chungchang sawina lehkhaabu lar tak, ‘Chariots of God’ a ziak a. Hman laiin van mite chu kan chenna leiah hian boruak lawngin an lo zin thin a. An chanchin an hriatna atangin mihringin Pathian lama ngaihdan thar tam tak an nei tih a sawi.

Emmanuel Velikovsky pawhin a lehkhabuah: “B.C. 1000 tawp lama Arab rama sik leh sa lam hnawk leh pik luih thinna kha ni leh a kianga her velte an darh sarh lutuk vanga lo awm,” niin a ngai a. Chung laia an tuarna nasa tak chu thangtharte’n hre reng lo mah sela, tun laia mihring nun kal zelah a tha lo zawngin nghawng a la nei zel niin a lang.

Hetianga van lam leh lei lam thil inkungkaihna hi miten vawi tam tak sawiin lo ziak thin lo se chuan tumahin bengkhawn tlakah an ngai lo ang. Tunah chuan University tam takah tih tak meuhin mi thiamte’n an lo ngaihven thar ta a. Daniken-a leh Velikovsky-a ngaihdan hi finfiah nan an la hmang lar hle zel a ni.

Bible-a thuziak a ngial-a-ngana ringtu Kristian thenkhat chuan UFO chu vantirhkohte ni ngeiin an ring a. Nimahsela an ni tak meuh em? An rin theihna chu Isaia, Ezekiela, Zakaria leh Thu Puana van lam thil thlawk thei ziakte an tanchhan a ni. Thlawhna khalhtuten boruakah thil tam tak an hmu a, an sawifiahna chu Ezekiela ziak nen an hmehbel a. Ezekiela ziak an tanchhan bikna chang lo chhiar teh ang:-

“Ka han en a, ngai teh, cherub-ho sirah chuan tawlailir ke pali, cherub pakhat kiangah, tawlailir ke pakhat, cherub dang kiangah tawlailir ke dang ka hmu a; tawlailir ke land an chu Tarsis lung zia ang hi a ni a. An lan ziaah chuan an paliin angkhat an ni a, tawlailir ke pakhat chhunga tawlailir ke dang awm ang mai hi a ni.

“An kal chuan sir liah an kal thei a, an kal pawhin an her ngai lo; amaherawhchu a hmasa hawi lampang apiang an zui a ni, an kalin an her chuang lo. An taksa pum chu an hnungte, an velin mitin a khat a, an palia tawlailir kete pawh kha. A tawlailir kete kha chu ka beng hriat ngeiah ‘tawlailir ke vir’ tih a ni.

“Cherub-ho an kal chuan tawlailir kete chu an kiangah a kal ve a; cherub-ho khan lei ata chho tura thlate an zar chuan tawlailir kete chuan a hransan ngai lo va. An din chuan hengte hi an ding ve a, an chhoh chuan hengte hi an chho ve thin a, thilnung thlarau chu anmahniah a awm si a,” (Ezekiela 10:9-13, 16, 17).

Boruaka thil thlawk vel vantirhkoh nia lo puh mai hi mi thenkhat suangtuahna, thu dik a nihzia fiah theih loh niin a lang. Mahse Pathian ring lotute meuh pawhin chutiang thu chu tih tak meuhvin an lo ngaihven ta a ni.

Mihringte sawifiah phak loh thil ni si mite’n an ngaihsak zual zelna chhan tilangtu chu- mihringin na kan hriatna, mit, beng leh hnar atanga hriatna ni lo, hriatna dang, tisa khawvel piah lam thil (Extrasensory Perception-ESP) hmuh chhuah tharna hi a ni a. Tun laia kan zirna sikul sang (University) tam takah rilru nena inzawm hriatna hmuh chhuah hi an uar nasa a ni.

Kum 1930 hnu lam khan Duke University-a thawk, Dr. Joseph B. Rhine chuan he science thiamna thar, ESP hi a ngaihven nasat avangin parapsychology department an hawn phah hial a. Professor hmasa berah a tang nghe nghe a. A ngaihventute hi mi chhuanvawr tling hlir an ni a. Sakhaw ngaihthahtute zingah a lar zual a. America ram aiin Russia leh a deptuten an ngaihven nasa zual zawk. Mihring rilru hipna leh thunun nana hman ni mahsela mi tam tak chuan sakhuana chi khat ang hialah an ngai a ni.

A chunga kan han sawi tawi te atang pawh khian UFO chungchanga Bible thlirna chu kan hmu thiam tawh awm e. Bible sawi dan chinah kan duhtawk dawn nge science thiamna kan ngaihlu zawk ang tih chu kan kutah dahin a awm ta.

Science leh Technology lama mihringte finna sang chho zel hian Pathian hmel a hliah thei a, a tiropui thei bawk a. Kan Bible chuan, “Mihring rilruah chuan chatuan a dah a, mahse chuti chung pawhin anni chuan Pathianin a tir ata a tawp thlenga a thiltih chu an hmuchhuak thei chuang lo,” tiin min hrilh a (Thuh. 3:11). Bible hian Scientist-te finna hi a lo lehkhalh daih tawh a, Bible-in a sawi ang zelin mi fingte hian thil an hmu chhuak zawk thin a, Bible kal pelin finna an nei lo a ni. Kum 1969-a Neil Armstronga leh a thian pahnihte thlaa an lawn dawn khan Pathian ropuizia an hmuchhuak nasa hle a, “Lalpa, i thil siam awmzia kan lo hriat phak loh lutuk avangin min ngaidam ang che,” tiin an tawngtai hial a ni. Russia-ho van sang lawn ve thung chuan, “Pathian awmna reng reng kan hmu lo,” an ti thung a. Charles Darwin-a chuan mihring tobul a chhui a chhuina lamah mihringte hi Zawng thlah kan nih theih dan a hmuchhuak a.

Khawvel finna hmangin Pathian thu hi hriat fuh theih a ni lo va, Pathian thu atang erawh chuan khawvel finna hi a thlir thiam theih thung a. Chu chu sawiin Paula chuan, “Pathian finnaah chuan khawvelin finna hmanga Pathian an hriat theih loh hnuin, thu hril âtthlak hmanga a ringtute chhandam chu Pathianin tha a ti hle si a,” tiin min hrilh a (1.Kor. 1:21). Scientist-te zingah pawh mihring finna ringawta thil chhut mi an awm a, Pathian finna hmanga thil zir chhuak an awm bawk

A tawp berah chuan kan sawi tum ber chu thil engkim hi Pathian hriatna tel lo chuan engmah lo mai a ni tih hi a ni. Mi thenkhatten Science subject kan han zir ve dek dek a, Bible aiin scientist-te theory eng emaw kan ring zawk mah a. Chutiang mite thiamna chu ‘thiamna kebai’ a ni lo thei lo vang. Scientist-te thil thlir dan chu a nghet lo va, a danglam leh mai thin a, Bible erawh chu kum sang tam tak kal liam hnuah pawh a ding nghet a, a la danglam ve lo va, a zirtirna hi a thar deuh deuh zawk a ni.

A thukin a va sang em!

Khawvel fin zawng aiin;

Pathian hmangaihna thu hi,

Van leh khawvela’n a khat e.

******************************************************

Compiled from- 

1. Holy Bible

2. Angels : Billy Graham, Dr. ( Translated into Mizo by Rev. L. Sawithanga )

3. Science leh Pathian Thu : Vanlalzuata, Rev.

4. Google & Image

THIH HUN HRIATNA FORMULA!

Gifu University-a Japan researcher-te’n formula an duan chhuah ‘TIAL’ hi i lo hre ve tawh em? A awmzia ber chu engtia rei nge i dam ang a, engtik hunah nge i thih dawn tih chhutchhuahna a nih chu! A pui hem hem khawp mai.

‘TIAL’ chu thu lamtawi niin, a full form chu “Total Immediate Ancestral Longevity” tihna mai a ni.

I awih emaw awih lo emaw, he formula hmang hian engtia rei nge i dam dawn tih lo inchhut ve chhin ta che.  

A chhut dan: Nangmah thlahtute zinga mi paruk (entirnan- I pi, I pu, I nu, I pa, etc.) dam rei zawng kum belhkhawm kha parukin sem mai rawh. Chuta lo chhuak chu i damrei zawng kum a ni ang an tihna a ni.

Hei hi dik chiah chiah dawn lo mahse thlahtute atanga hriselna lama inthlahchhawng zel atanga chhut a nih avangin a dik hlel nasa lutuk lo tura ngaih a ni nghe nghe asin! Natna tam tak chu inthlahchhawn theih a ni hlawm a, mi hrisel chhungkua chu an hrisel deuh bik tura ngaih zel a ni. Amaherawhchu nangmah thlahtute kha lo hriselin dam rei viau pawh nise, i hriselna i ngaihpawimawh loh va, taksa tichhe thei thil tam tak i khawih si chuan i dam hun tura beisei pawh i dam thleng lo hial dawn tihna a ni ang.

TIAL = Sum of longevity of six members of your ancestors / 6

ZU LEH ZU RUIH

( Bible sawi dan )

1. Uain hi Israel ramah khap a ni lo va. Mihring thinlung tilawmtu leh lungngaihna chhawktu anga ngaih a ni (Ror.9:13; Sam 104:15; Thuf.31:6-7).

2. Inthawina thil hlanah pawh an telh (Deut.14:26).

3.  Rui khawpa uain in erawh chu hmingchhiatna a ni a. Zu ruih chungchanga mualphona entirna tur pakhat chu Nova leh Lota-te kha an ni (Gen.9:20-27; 19:31-38). Zu ruih avangin chhungkuaah anchhe inlawhna leh pafa inngaihna a thleng a nih kha.

4. Zu ruih chu hurna leh nawhchi zawrhna nen ang khata ngaih a ni (Hos.4:11,18).

5. Zu ruih chu nuihzatbura min siamtu a ni (Thuf.20:1).

6. Zu ngaina mi chu a hausa lo vang (Thuf.21:17).

7. Zu heh mi zingah chuan tel loh tur a ni a, retheih hmabak an ni (Thuf.23:20-21).

8. Puithiamte chu an duty laiin zu an in tur a ni lo (Lev.10:8-9).

9. Thuthlung Tharah pawh zu ruia awm lo tura hrilh kan ni (Rom.13:13).

10. Zu ruih chu Jentail-te awm dan a ni (IPet.4:3).

11. Kohhran hotu chu zu ruih hmang lo a ni tur a ni (I Tim.3:3; Tit.1:7).

12. Zu ruih hmangte chuan Pathian ram an luah lo vang (I Kor.6:10; Gal.5:21).

13. Zu ruih chingte chu kawp loh tur a ni (I Kor.5:11-13).

***********************************************

Source : Bible Thu Mal Hrilhfiahna : Revd Chuauthuama, p.863.