Barcelona-in transfer window boruak reh lai takin bomb an rawn tipuak thut a ni ber e. Manchester City midfielder, Ballon d’Or winner Rodri chu camp Nou-a hruai luh tumin hma an la mek a, an indawr tawnna hian a vawrtawp a thleng tawh nia report a awm bawk.
Real Madrid hian Rodri hi kar tam tak chhung an lo be tawh a, an ta turah an dah fel diam tawh. Modric a upa tawh a, Kroos a chawl tawh a, Casemiro a awm tawh lo bawk. Tunah hian inkhel thunun thei defensive midfielder rintlak an nei lo a, chuvangin he summer-a an target lian ber a ni ta a ni.
Mahse Barça an lo inrawlh ta thut mai. Barça-in Rodri an la thei a nih chuan player ṭha tak an nei dawn a ni satliah ngawt lo a, an elpui ber Real Madrid mamawh ber an laksak tihna a ni dawn a, hei hi Madrid tan chuan a na dawn hle.
Rodri hian Manchester City-ah contract kum 1 chiah a nei tawh a; mahse a transfer fee hi €50m atanga €70m inkar nia sawi a ni. Kum 30 mi a ni tawh a, hliam na tak tuar hnu lawk a ni bawk. Mahse a khelh dan enin a theihna a la tla hniam dawn chuang lo. Sergio Busquets anga rilru fim tak hmanga khel thin, chakna chan ngei inring tlat mi a ni.
Buaithlak ber chu a hlawh tur hi a ni. Rodri hian Ballon d’Or winner phu tawk hlawh zat a beisei a, Barça nen hian kum khata €30m gross salary-in an inrem tawh nia thu thang a awm a, hei hi Barça squad-a hlawh sang ber a ni nghal ang.
He summer-ah hian Barça-in Lewandowski an chhuahtir a, a hlawh tur tam tak kha an save tawh a, tunah chuan Lewandowski hlawh kha Rodri-a’n a luahlan dawn a ang ta hle.
Zawhna lian tak chu: Barça hian hetiang zat sum hi midfield-ah a hmang zo vek dawn em ni? tih hi a ni. Team-ah striker leh defense lam hi siamṭhat a ngai ve tho si a; mahse Rodri ang player ṭha lutuk, Real-in an awh em em a lo awm a, Barça lamin an thlem thlu thei a nih chuan an bawh nghal dawn tih a chiang reng mai.
Hansi Flick leh Deco-te pawhin Rodri hi an be nasa tawh hle. Flick-a’n a game plan-ah Rodri a chhawr dan tur a sawi a, Rodri pawhin Barça khelh dan hian a lung a len thu te a sawi bawk.
Ngaihtuah ngai ber pakhat chu Pedri nena an inkawp dan tur hi a ni. World Cup-ah khan Spain tan an khel dun a, mahse an inman lo hle a, Pedri pawh starting XI aṭangin paihthlak a ni hial. Mahse kha chu Pedri a chauh tawh vang leh season chhunga a khelh nasat vang a ni thei. Flick hian plan fel tak a neih a ngai ang. Marc Bernal ang naupang talent ṭha takte khelhna hun a ei hek loh hram a pawimawh bawk.
Kum 30 mi, hliam na tak tuar tawh, hlawh sang leh man to Rodri quality hi chu rinhlelh rual a ni lo. Manchester City-ah a hlawhtling a, Spain tan World Cup-ah Player of the Tournament a ni a, Real Madrid-in an awt em em bawk. Hei vang hian a man a to lo thei lo.
Barça-in Rodri an la thei a nih chuan boruak a sang hluai ngei dawn a, Real Madrid rilru a na tel bawk ang. Mahse striker leh defender lam mamawhna a sang ve tho a, Rodri-a ah hian sum zawng zawng an hmang ral dawn nge, a dang tan an la khek dawn tih hi zawhna lian tak a ni.
Rodri hi Barça-in la lut ta se midfield-ah ro a rawn rel ang a, team pum a tiphuisui thei ngeiin a rinawm. Mahse a man leh hlawh sang lutuk hi kum 30 mi lakah chuan risk a awm ve deuh chu a ni. Real Madrid tihnat nan ringawta lei chhuah nge, team tana a ṭangkai dawn vang zawka lei chhuah tum a nih? A chhanna chu season lo awm turah kan hmu ang.
FIFA President Gianni Infantino-a'n World Cup chungchanga ruahmanna thar a siam- tun kar chhunga private investor-te hnena chanvo hralh a tumna a tihtawp leh tak avanga demna nasa tak a tawk mek chung pawhin ram panga-in an thlawp thu an puang chhuak ta hlawl mai.
Kum 2016-a Sepp Blatter-a thlak tura FIFA President lo ni ta Infantino-a hian private investor-te hnen atangin £15 billion man hu sum lak chhuah a tum a. Nakin zelah World Cup lo awm turah an tel ve theihna turin private investor-te chu billion tel pektir a tum a. Thlem lungawina atan FIFA member association 211-te chu a ruahmanna hi an pawmpui chuan £15 million ṭheuh pe nghal turin thu a tiam a. Tin, 2038 hma ngeiin association tin hnenah £50 million dang pek belh leh a tiam bawk.
A ruahmanna siam a tlawlh tak avang hian kum 56-a upa hian demna nasa tak a tawk mek a, UEFA chu a sawisel nasa ber pawl a ni. Aleksander Ceferin chuan European ramte chu football hruaitu lian ber thlawp tawh lo turin a ngen a. Hei hi a ban theih nan emaw, March thlaa inthlan lo awm tura a tlin tawh loh nan emaw a duh vang a ni. A tirah chuan Infantino hian inthlan lo awm leh turah hneh takin chakna a chang leh dawn emaw an ti ṭhin a nih kha.
CONMEBOL, CONCACAF leh AFC te pawhin demna thu an chhuah ve tawh bawk. Mahse nawrna a pun belh zel chung leh inthlak danglamna duhtu an tam zel chung hian Infantino hian amah thlawptu tlem a la nei ve tho.
Europe member 55 zingah ram pakhat chauhvin UEFA thutlukna rawn kalhin, Infantino-a hmathlir chu football infiamna thurin kalh a ni lo tiin a rawn thlawp. Czech Republic football association president David Trunda chuan FIFA President ruahmanna hian ramchhunga grassroot football leh hmunhma siam nan sum ṭangkai tak a thawh chhuah sak thei dawn niin a ring.
FIFA President hi ram pali dangin an rawn thlawp ve leh a, kum 2022 World Cup thlengtu Qatar ram pawhin thu mak tak a rawn chhuah a, "Infantino-a finna leh remhriatma a fak" thu leh "khawvel huapa game tihthan leh tihchak zel a tumna" chu an thlawp tlat thu a puang.
Daily Mail tarlan danin Europe-in Swiss football administrator paihthlak an tumna chu Kuwait, Qatar, Sri Lanka leh Lebanon ten a kaihhruaina an la rin thu an sawi chhuah leh tak avangin thu a buai ta deuh nuaih a ni ber e.
UEFA leh CONCACAF hi FIFA member association 211 zinga 90 an ni. Hei hi vote of no confidence ko thei tur 20% chu a tling a, mahse Infantino paihthlakna tur majority erawh a tling phak lo thung.
AFC member association dang 40 te chuan an ngaihdan an la sawi chhuak lo va, hei hian an confederation dinna chu an pawm tih a entir a, Infantino-a president nihna chuhpui erawh an tum lo tihna a ni. AFC member ve tho Australia pawhin investment ruahmanna tihtawp a ni chu lawmawm an tih thu sawiin, "Tunah chuan hmalam hun thlir a hun ta" a ti.
UEFA leh CONCACAF te hian vote of no confidence ko thei turin thlawptu an ngah tawk a, mahse Infantino paihthlakna tur em chuan an la tam tawk lo. Tun dinhmunah hian vantlang hmaa dodalna lantirtu hi FIFA member zinga 43% chauh an ni a, paihthla tham ni turin majority an la tlin lo a ni.
Chutihrualin an dinna puang chhuak lem lo association-te hi an confederation-te thu zawm kher tura tih an ni lo. Ram 16 chauh pawh an hel a, dodalna lamah an ṭan chuan Infantino-a president nihna hi a derthawng nghal hle ang.
FIFA World Cup 2026-ah Argentina-in an khelh apiangin sawiselna leh demna nasa takin a umzui ngei ngei a ni ber e tih theih turin July 12, 202-a quarter final-a Argentina leh Switzerland inkhel chuan sawi zui a hlawh ve leh ta hle. Tum dang ang bawkin referee-te thutlukna, VAR leh inkhelh dan chungchangah inhnialna nasa tak a piang thar leh ta.
Lionel Messi-a hruai Argentina-in Switzerland laka 3-1 a hnehna changa semi-final an luh chian hma khan a tlu der ni-a hriat a nih avangin Breel Embolo-a chuan red card a hmu a, red card meuh hmuhna tham a tling lo e tiin sawi zui a hlawh hle. Switzerland tantute chuan referee-in khatiang thutlukna a siam kha a ti mah mah e an ti. Embolo-a a hnawh chhuah avangin Argentina-in inkhel boruak an thunun zui ta a ni ber. Referee erawh chuan dan ang taka kha red card kha pe a nih thu a sawi ve thung.
A tirah khan referee-in VAR-a en kher lovin Embolo-a hi Mistaken Identity dan hmanga tluk der phal a nih loh thu hrilhin vaukhan mai se la chu yellow card pahnihna kha a pe lo thei reng si a. Mahse Leandro Paredes-a lakah yellow card a lo phawrh tawh a, chu lah chu sut theih a ni tawh si lo a. FIFA dan tharah chuan cancel theih a ni bawk lo a, a aiah player dang hnenah phawrh chhuah ngei ngei a tul ta thung si a ni.
FIFA-in "mistaken identity" dan thar a hman avangin Embolo hnenah zawk yellow card a pe ta a. Switzerland striker hi a tlu der a; mahse hemi hma hian referee hian Argentinian midfielder Paredes-a lakah yellow card a lo phawrh hmasa thung si a nih kha.
Rei vak lo hnuah Video Assistant Referee (VAR) chuan referee chu field sir-a monitor-ah thil thleng chu en nawn turin a rawn hrilh a, Embolo-a a tlu der tih a hmuh hnuah referee chuan Paredes-a lakah card a pek tawh chu sutin Embolo-a zawk hi yellow card a pe ta a ni.
Tournament tan hma lawka IFAB-in dan an siam tharah chuan hetiang dinhmunah hi chuan yellow card hi cancel theih a ni lo a, player dang hnenah hlan chhawn theih a ni thung. Hei hi "mistaken identity" dan thar niin hremna pek tawh chu kaltlangpui tho tur tihna a ni.
Referee-in yellow card emaw red card emaw a phawrh a, card a pek player chuan tih dik loh a nei lo nia a lan leh hnuhnawh si chuan VAR hmanga ennawn theih a ni a, VAR-in foul a nei lo tih a hmuh chhuah chuan "mistaken identity" tih niin he dan tharah chuan card kha cancel leh theih a ni a;mahse player dang hnenah card kha pek ngei ngei tur a ni thung.
Embolo-a chunga thil thleng hi World Cup Football-ah a thlen vawi khatna a ni hran lo. Hman deuh khan group stage-a USA leh Paraguay inkhelh tumin American defender Tim Ream-a yellow card chu VAR-in a tlu der tih a hmuh chhuah hnuah Miguel Almiron-a hnenah hlan chhawn a lo ni tawh bawk.
Hetiang ang thutlukna hian sawisel a la hlawh chho zel lo ang tih pawh sawi theih a ni lo. Swiss-te kha defending champion te lakah rin aiin an che thei phian a, minute 67-naah Dan Ndoye-a'n mawi takin an si phurh a rawn sut a, anmahni tantute au thawm pawh a ring hle. Switzerland-te an chet that chhoh zel laiin minute 5 hnuah thil pawi tak a thleng ta tlat mai a nih kha.
A pawimawh ber chu Kansas City-a referee-te khan jersey number emaw player hming emaw an hai vang a ni lo. Embolo-a lemchan thiam avanga bum an ni zawk. Dive an hmuh chu "mistaken identity" ah an chantir avangin VAR chuan yellow card satliah mai thlengin a en thei ta a. Hei hian VAR technology duan chhan ber referee tana thutlukna siam harsa bik laka "chiang taka thil dik lo awm" siam that nan chauh hman tur tih chu a kalh ta a ni.
Inkhelh zawhah Switzerland coach Murat Yakin chuan he 'mistaken identity' dan hi nasa takin a sawisel a. Dan phuahchawp tak hian hnehna chan an tumna kawngah Argentina a tanpui ta hlauh zawk niin a sawi.
"Ka ngaihdanah chuan dan phuahchawp lutuk avangin hrem kan ni," tiin Swiss coach Murat Yakin chuan a sawi. "Hetiang avanga kan tlawm hi a na hle a, kan phu lo bawk. Ka player-te hi hero tak tak an ni. An thiamna leh theihna zawng zawng an hlan a, ka chhuang takzet a ni" a ti.
"Referee-in thutlukna dik lo a siam a ni. Ka ngaihdanah chuan foul pawh a ni lo hial maithei. Foul lo ni ta pawh ni se foul ho lulai tak a ni. FIFA hian referee-te chu a humhim dawn tih chu a chiang sa; mahse he dan hian vawiina kan inkhelh a tichhia a, hetianga kan tlawm hi a na takzet a ni." a ti zui bawk.
FIFA World Cup 2026 group stage inkhel 3-a South Africa tana khel Jayden Adams chu kum 25 mi niin a boral tih South Africa Sports Ministry chuan Inrinni, July ni 11, 2026-ah khan a puang. A thih chhan erawh Minister hian a sawi lang lo thung.
Group A-ah Mexico leh Czech Republic te a hmachhawn a, starting 11-ah a khel a, South Korea laka 1-0 a hnehna an chan tum erawh kha chuan substitute atangin a lut thung. South Korea laka hnehna an chan avang khan South Africa chuan a vawi khatna atan knockout round an lut thei ta a nih kha.
Round of 32-ah Canada lakah South Africa chu a tlawm a, World Cup 2026 atangin an chhuak ta a ni. He midfielder hian South Africa-a club Mamelodi Sundowns tan a khel bawk a, 2025/26 season-ah African Champions League trophy a lakpui bawk.
Sports Minister Gayton McKenzie chuan thuchhuah siamin, Jayden Adams chu a ui thu a sawi a, a chhungte, a thawhpui te leh a fans-te a tawrhpui takzet thu a tarlang.
“Mamelodi Sundowns leh South Africa midfielder, kum 25 mi Jayden Adams-a boral thu ka hriatin min nghawng na hle a, ka rilru a na khawp mai,” tiin a sawi zui bawk.
“South African football-in talent êng ber pakhat a chan a ni. A chhungte, a thawhpui te leh academy atanga South Africa player hlawhtling tak ni tura kawng a zawh chhoh zel dan lo thlirtu mi maktaduai tel te nen kan tuar vek a ni,” a ti bawk.
South African Football Players Union pawhin thuchhuah siamin an player-pui thi chu an ui thu an sawi a, a chhungte, a thawhpui te leh a khelhna club-te an tawrhpui thu an tarlang.
“Jayden hian 2026 World Cup-ah hian South Africa ai a awh zo chauh a. Ram mipuite beiseina chu phur tak leh huaisen takin a hmachhawn a ni. A boralna hi a chhungte, a thawhpui te, a khelhna club te, football khawvel leh ram pum tan pawh channa nasa tak a ni” tiin SAFPU chuan an sawi.
Adams hian 2022-ah khan international match-a ram ai a awhna hmasa ber ni turin Mozambique lakah a ram tan a khel a, vawi 13 a khel tawh a. World Cup qualifying-ah goal 2 a khung tawh bawk.
World Cup 2026 neih mekah VAR chungchangah sawiselna leh inhnialna a tam mek laiin FIFA chuan quarter-final atangin VAR hman dan thar a hmang dawn tih a puang.
A bikin Argentina leh Egypt inkhelhah khan Egypt lam chuan VAR hman danah hleih neihna a awm ti-a an sawi nasat em avangin sawiselna a pung zual hle.
VAR hman dan thar tur chu hetiang hi a ni ang:-
Quarter-final atang chuan VAR official-te chu stadium chhungah an awm tawh ang. A hma zawng kha chuan Dallas, Texas-a International Broadcast Centre (IBC) chhunga FIFA Video Operation Room atangin match an lo vil thin a, July 10, 2026-a France leh Morocco inkhelh atang kha chuan VAR official zawng zawng chuan stadium chhung atangin an vil tawh a ni.
Kalphung tharah hian stadium tinah Primary VAR Official pakhat leh Reserve VAR Official pakhat dah an ni zel tawh dawn a, Dallas-a FIFA Video Operation Room erawh chu VAR kaihruaitu ber angin a la awm rih tho ang. Stadium-a VAR official awm tharte hian a hmunpui hi an lo pui char char tawh dawn tihna a nih chu.
Dallas nen inbiak pawhna a chhiat palh pawhin stadium chhung atangin match video enlet chu kalpui chhunzawm theih a la ni tho ang. FIFA danah chuan VAR technical problem avanga inkhel tihdanglam emaw, tihtawp emaw phal a ni lo.
Collina chuan Letexier a chhan
FIFA Referee hotupa Pierluigi Collina chuan referee François Letexier-a thlavang a rawn hauh na hle a, a ham danah khan sawisel tur a awm lo a ni' a ti. Letexier-a hian 2026 World Cup Round of 16-ah Argentina-in Egypt 3-2 a an hnehna match a ham tum khan uchuak takin Argentina a tan e tiin sawiselna nasa tak a tawk a nih kha.
An tlawm hnu lawkah Egypt Football Association chuan FIFA hnenah an lungawi loh thu hi an thlen a, Letexier-a chu World Cup tournament chhung zawng referee-a hmang chhunzawm tawh lo turin an ngen bawk.
French chanchinbu L'Équipe-in a tarlan dan chuan FIFA chuan Letexier-a'n match a kaihhruai dan kha an en let hmasa ang a, chumi hnuah tournament ham chhunzawm turin chhawr zui tlak a ni dawn nge dawn lo tih an rel dawn a ni.
Brazilian superstar Neymar Jr. chu hliam vanga a chawlh hnuah khelmualah a rawn kir leh ta. A kir leh hnu lawka a sawi hmasak ber pakhat chu Argentine football legend Lionel Messi fakna a ni.
June 24, 2026-a Miami Stadium-a Group C match pawimawhah Brazil chuan Scotland chu 3–0-in an hneh. He hnehna hian Brazil chu knockout round-ah a hruai lut a, group champion an nihna a nemnghet bawk. Inkhelh zawh veleh Neymar chuan media-te hmaah Messi chu a “thian ṭha ber” a nih thu a sawi.
He match hi kumin World Cup-ah Neymar-a’n match a khelhna hmasa ber a ni a, inhliam avanga taksa chak tawk lohna avangin Group match hmasa pahnihah khan a tel thei lo va, Scotland an hmachhawnnaah chiah hian a khel thei ta a ni.
Media-te’n an zawhna chhangin Neymar chuan:
“Messi hi ka thian tha ber a ni. Khelmual chhungah player ropui tak a ni a, khelmual pawnah phei chuan mi tha tak a ni. Ka thian kawmngeih a ni a, ka hmangaih leh ka ngaihsakzia pawh a hria,” tiin a sawi.
Messi leh Neymar inthian thatna hi football khawvelah a lar hle a, an pahnih hian Barcelona-ah kum li chhung, 2013 atanga 2017 thleng khan an khel dun a, hemi chhung hian trophy lian tak tak tam tak an chawi dun bawk.
Barcelona-ah khan La Liga title pahnih, Copa del Rey vawi thum, UEFA Champions League, UEFA Super Cup leh FIFA Club World Cup vawi khat theuh an la. Kum 2021-ah PSG-ah an kheldun leh a, Paris-ah kum hnih an khelh dun chhungin Ligue 1 title vawi hnih leh Trophée des Champions pawh an la bawk.
June 24, 2026-a Miami Stadium-a Group C match hnuhnung berah Brazil chuan Scotland chu 3–0-in an hneh a, he hnehna avang hian group champion nihna nen Round of 32 (Pre-quarterfinals) an tlang ta a ni.
Morocco pawh he group atang hian knockout round-ah a lut ve bawk.
Brazil-in Scotland an hnehnaah hian Vinícius Júnior chu a langsar hle a, minute 7-naah goal hmasa ber a thun a, first-half injury time-ah a lu hmangin a goal hnihna a thun leh. Brazil goal thumna chu minute 60-naah Matheus Cunha-a’n a thun thung.
Goal hnih a thun avangin Vinícius Júnior chuan history a siam a, kum 2002 World Cup hnulama Brazilian player zingah World Cup match hmasa pathuma goal thun vek thei hmasa ber a ni. Vinícius Junior hma hian Jairzinho, Romário, Ronaldo Nazário leh Rivaldo te'n hetiang record hi an lo siam ve tawh a, Vinicious Junior hi a pangana a ni ta a ni.
Brazil hian point 7 neiin Group C-a pakhatna a ni mek a, Scotland erawhin point 3 chauh an nei a, third-place team tha berte zinga an tel theih leh theih loh chu group dangte result-ah a innghat thung ang.
Neymar-a’n Messi a fakna thu leh Brazil-in knockout round an thleng ta hian football khawvelah titi a siam mek a, World Cup champion nih tuma ke an pen kawngah beiseina sang tak nen Brazil hian hmalam an pan mek ni te pawhin a lang e.
June 15, 2026-a Atlanta Stadium-a inkhel tihtawpna hamrik a rik rual chiah chuan cameraman- te chuan Cape Verde goalkeeper Vozinha lam an pan nghal hum hum mai.
Kum 40 mi goalkeeper hi a tap a, a hringnun zinkawnga hun harsa a lo paltlang tawh te chu a rilruah a lo lang chhuak zut zut mai a lo ni. He thil hi World Cup-a champion tura rin kai Spain nen goal lut awm lova an inhnehtawk hnua thil thleng a ni.
Cape Verde tantu mipui sang tam tak, minute 90 chhung tawp lova au te chu an phur em em a, an inpawm a, an lam a, result an hlimpui takzet. Khelmualah pawh player-te chu an hlimzia lantirin an inkuah chuk chuk a, neutral mi tam tak te pawh inkhel ropui en hian an lo phur ve em em a, game a tawp hma hauhvin Cape Verde hi an lo lawmpui ve hial mai.
European champion Spain lakah goalkeeper Vozinha chuan goal ven a thiamzia a lantir a, goal a chhuah duh tlat loh avangin a ram tana World Cup-a result hriatrengtlak a hlawh chhuak ta a ni.
“Ka tap lo thei lo a ni. Ka pi leh ka pu te bula seilian ka ni a, anni erawh chu khawvelah hian an awm ve tawh lo. Kum tam tak liam taah khan an boral tawh a ni. Anni kha ka tan chuan engkim an ni a, min chawi liantute an ni” tiin player of the match-a thlan a nih hnuah Vozinha chuan a sawi.
“Ka nu vang pawhin ka hnuk a ulh a ni. Visa man a to em avangin a hun takah kan inbuatsaih hman lo a, visa vangin hetah a lo kal thei si lo a ni. A hmunah lo kal ve se ka ti khawp mai.”
Vozinha chuan sawi belh zelin, “Kan team ka chhuanna ber chu kan inlungrualna hi a ni. Player tupawh lo tel se, chhungkua ang maiin kan inen thei vek a, hei hi kan chakna thuruk chu a ni. Mi thenkhat chuan nuam chen mai mai turin World Cup hi khel satliah turah min ngai a, mahse a ni lo. Team zahpuiawm loh ber kan ni tih kan hria a, hei hi kan World Cup khelh vawi khatna a ni bawk. Kan ram tana theihtawp chhuaha khel tura thawk chhuak te kan ni." a ti.
Vozinha chuan World Cup khelh hi a naupan lai atang tawha a duhthusam leh a lo thlir thin a nih thu a sawi. Josimar Dias-a piang Cape Verde goalkeeper hian World Cup khelh chu a duhthusam leh mitthla a nih reng thu a sawi a, a tak takin a khel ta mai pawh ni lovin, khawvelin a mi chhinchhiah a lo ni ta a, an ram tan history a siam ta hial chu a nih hi.
Vozinha hi tunah hian kum 40-a upa a ni a, Cape Verde international team-ah upa ber a ni bawk. World Cup khelh laia upa ber record chelhtu chu Egypt mi Essam El Hadary a ni a, kum 2018-a World Cup a khelh lai khan kum 45-a upa a ni.
“Kum 25 ka nih hnuah kum 2012 khan professional football ka khel tan chauh a, ka tan chuan a tlai lutuk tawh,” tiin Vozinha chuan a sawi. “National team hi bansan ka tum tawh a; mahse he ka dream vang hian ka chhunzawm leh ta zawk a ni.
“Kan thawhrimna zawng zawng hi kan zavaia ta a ni. Kei hi Man of the Match-a thlan ka ni a; mahse he award hi ka team-puite zawng zawng ta a ni. An tel lo chuan engmah ka ni lo. Ka team leh ram mipuite tan ka thawk zel ang.” a ti bawk.
Cape Verde hi Africa khawthlang tuipui kam aṭanga mel 600 zeta hla, tuipui zau laili taka awm, thliarkar sawm leh pakhat inkawp khawm, arkipelago mawi tak a ni a; nimahsela khawvel ram dang lakah erawh a mal hle si. Football tuipui naupang tan phei chuan eizawnna kawng a inhawng zau lo kher mai.
Mindelo khuaa sei lian Vozinha pawh hian harsatna a pal tlang hnem ve hle. “Kan ramah hian goalkeeper ṭha ber pawl ka ni ve a; nimahsela, ka pian a tawi avangin ṭhahnemngai taka ka khelh pawhin min thlan phah ngai meuh lo,” tiin a sawi. Mi tam tak tih dan ang bawkin an ram lo awp tawhtu Portugal-ah beiseina thar zawngin a pen chhuak a, chu chu a eizawnna kawng inṭanna bulpui a lo ni ta a. Hemi hnu hian Slovakia, Angola, Moldova leh Cyprus ramah te a pen chhuak zui ta zel a, tunah hian Portugal second-tier club, Chaves tan a la khel mek a ni.
Vozinha hming hrim hrim pawh hian football chanchin a keng tel ve reng reng. A pa chuan Argentina leh Real Madrid player ropui Jorge Valdano hming chawia ‘Valdano’ tiin a fapa hming hi phuah a tum a; mahse Cape Verde thuneituten an phal tlat lo. A tawpah chuan kum 1986 World Cup-a langsar ve tak Brazil defender Josimar hming chawiin a fap hming hi a phuah ta a ni. Kum tam a liam hnuah World Cup khelmualah tho Vozinha hian history rawn a siam ve ta a ni.
Spain mipui sing tam takte an ram tana an au hulh hulh lai leh Spain-in na tak taka an nawr laiin Cape Verde team goal-keeper hi a ding nghet hle a, save pawimawh tak tak pariat a nei hial mai.
Kum 40 chunglam goalkeeper zinga World Cup-a save nei tam ber chu Pat Jennings a ni a, a piancham vawi 41-naah Northern Ireland tan Brazil lakah save vawi 10 a lo nei tawh a, a hun lai kha chuan Cape Verde goal-keeper ang maiin khawvel lawm a hlawh ve hle a ni.
Vozinha hi khelmual pawn lamah pawh a lar nghal hluai a, instagram-a amah zuitu pawh 50,000 aṭangin maktaduai 13 chuang an tling ta hial mai! Hei hi a chhan ber chu - Brazil rama World Cup inkhel thlir theihna YouTube channel lian ber CazeTV-in an channel entute hnenah Cape Verde keeper instagram page hi follow ngei tura a ngen vang ni-a sawi a ni. “Hetiang thil mak hi a thleng thei ang tih ka ring pha ngai lo,” tiin Vozinha hian thuthar theh darhtute hnenah a sawi a, a hlim hle.
Scotland winger hlui Pat Nevin chuan "Cape Verde goalkeeper hian he game hi a ti hmuhnawm takzet. Kum 40 mi a ni tawh naa a khel tha tak zet a ni,” tiin 5 Live-ah a sawi. “Camera zawng zawngin an tin a, a teammate-te pawhin an kawk vek a, hun duhawm tak a ni.
Cape Verde hian minute 90 chhung zawng khan anmahni lama yard 18 chhungah an khel a ni ber. Chutiang chu nimahse theihtawpin an bei zel a, mahni thu duh mi chu ni se khatiang khan an khel thei lo ang. Team inpawh leh tangrual, tumruh an nih avang chauhin khatiang khan an khel tluan thei a nih kha.” tiin a sawi zui bawk.
ITV sports-a commentator Lee Dixon chuan: “A mak tak zet a ni. Inkhel ropui a ni. Cape Verde khan fak an phu thlawt a, Spain erawh chu han fakna tur a awm hran lo. An duhthusam chu ni bik lo mahse Cape Verde tan chuan zan chhinchhiahtlak tak a ni. An theihna zawng zawngin an khel a, centre half-te, full-back-te an fakawm tak zet. An goalkeeper mittui tla ka hmuh khan kei pawh ka tap lo chauh a ni.” a ti.
Mipui nuai 5 chauh awmna ram ni-a, World Cup-a qualifying ram zingah ram te ber pathumna ni bawk tan chuan mi thahnem takin kumin World Cup-a champion tura an ngaih Spain ram meuh inhnehtawkpui hi result pawimawh tak a tling.
Cape Verde ram mipuite chuan an ram football team-te hi an lawm tak zet a, an jersey rawng inbelin flag sen, var leh dum an keng a, an zai a, an lam a, an player-te hi an chawk phur thiam hle. Game a tawp hma hauhvin neutral mi te pawhin an lo tan ve a. Cape Verde international football team chanchin chu mi zawng zawng thawnthu sawi nuam tih a lo ni ta a ni ber e.
Mizoram ai pawha te zawk thliarkar ram chuan football khawvel mit a la ta em em mek chu a nih hi.
2026 FIFA World Cup khelh mekah hian football chanchina inhnialna nasa tak pakhat a thleng mek. Paraguay midfielder Miguel Almirón chu FIFA-in dan thar a siam - "ka hup khapna dan" hmanga red card hmu hmasa ber a ni a, hei hian FIFA-in dan thar a siam a khirh lutuk em tih sawizuina nasa tak a chawk chhuak mek a ni.
He thil hi Santa Clara, California-a June 20, 2026-a Group D-a awm Paraguay leh Turkey inkhelhnaa thleng a ni. Player pahnih inkara inhnialna pangngai nia lang kha rei lo teah football chanchina thil thleng dangdai leh sawi zui hlawh takah a chang ta a ni.
Red Card-in sawi a hlawh hle
First-half tawp dawn hnaihah midfield bulah foul pakhat a awm hnuin boruak a sosang tan a, Almirón chu Turkey defender Mert Müldür nen an inhnial a, hetia an buai lai hian Almirón chuan a kutin a ka a hup hlauh mai.
Müldür chuan referee Iván Barton chu a hrilh nghal a, referee chuan inkhel a titawp a, VAR (Video Assistant Referee)-in video a en chiang phawt a, chumi hnuah chuan field-ah a let leh a, Almirón chu direct red card a pe ta a ni.
Hei hi ka hup khapna dan thar FIFA-in a hman hnua red card pek hmasak ber a ni a, chutih rualin World Cup chanchina he dan avanga hnawhchhuah hmasak ber pawh Almirón hi a lo ni ta bawk.
Stadium chhunga player awm te, coach-te leh Paraguay tantu zawng zawng pawhin mak an ti hle a, eng vangin nge Paraguay midfielder chu red card hmuhtir a nih tiin an inzawt sup sup mai a ni.
Second half khelh chhung zawngin Paraguay chuan player 10 chauhvin an khel a, an ṭang tluan parh a ni ber e.
Midfielder Matías Galarza chuan inkhel tan atanga second 65-na velah goal mawi tak a thun a, hei hi kumin 2026 World Cup-a goal lut rang berte zinga pakhat a ni.
Almirón-a'n red card a hmuh hnuah Turkey-in ball an chang tam zawk hle a, goal thun pawh an tum ruh hle. Müldür-a'n a tauh pakhat chuan crossbar leh goal ban a per nghe nghe.
Turkey hian nawr na hle mahse Paraguay defense a khawng hle a, hun tawpah meuh chuan Paraguay-in 1–0-in hnehna ropui tak an chang ta tho a ni.
Inkhelh zawhah Paraguay head coach Gustavo Alfaro chuan referee thutlukna chu dan anga tih a ni tih a pawm thu a sawi. "I ka i hup chuan red card i hmu dawn tih chu dan zam sa atang chuan thil dik tak a ni a, kan tihdanglam theih pawh a ni lo. Mahse, he dan thar hi a khirh lutuk em aw..." tiin zawhna a zawt let thung.
"Football-ah hian lungawi lohna leh inhnialna te a awm ve reng a, kan khirh lutuk ang tih ka hlau. Football nihna tak pawh kan hloh phah ang tih a hlauhawm ta e." a ti zui bawk.
Alfaro chuan Almirón-a'n a teammate-te hnenah ngaihdam a dil tawh thu a sawi bawk. A thiltih avangin team tan harsatna a thlen tih a inhrethiam a, pawi a ti hle tih pawh coach chuan a sawi.
Engvangin nge FIFA hian he dan thar hi a siam?
He dan thar hi World Cup hma lawka UEFA Champions League-a Benfica winger Gianluca Prestianni leh Real Madrid star Vinícius Júnior inkara buaina thleng avanga lo piang a ni.
Footballer pahnih hi an inhnial laiin Prestianni chuan a ka a hup a, Vinícius hnenah thu mawi lo tak a sawi nia puh a ni zui bawk. A ka a hup avangin official-ten eng nge a sawi tih an hre chiang thei lo va, buaina nasa tak a chhuak zui ta hat mai a nih kha.
UEFA-in an chhui zui hnuah Prestianni chuan inhmuhsitna thu a sawi ngei a ni tih an hmuchhuak a, match paruk khel thei lo tura hrem a ni zui bawk.
Hetiang thil hi kumin World Cup-ah a thlen ve leh loh nan FIFA chuan player-in inhnial laia a ka a hup chuan referee-in direct red card a pe thei ang tiin dan thar a siam ta a. He dan thar hian a tum ber chu match official leh television camera laka player-ten thu mawi lo emaw hnam inhmusitna emaw an thup theih loh nan a ni.
Football khawvelah ngaihdan a phir hlawk
He dan thar ṭantu lam chuan player-te chetna tha lo a tlem phah dawn niin an sawi a, a sawiseltu lam erawh chuan referee-te kutah thuneihna a tam ta lutuk a, fel-hlel takin player an hrem thei mai dawn alawm le tiin an sawi ve thung.
Player hlui tam tak pawhin football hi rilru leh thahrui hmanga infiamna a nih avangin inhnial chang pawh awm lo thei lo a ni a, FIFA dan thar hian ṭul mang lova red card inpek a thlen mawlh mawlh ang tih an hlauh thu an sawi.
Almirón-a red card hmuh hi a tak taka he dan thar hmanna hmasa ber a ni ta a ni.
UEFA-in FIFA dan thar hi a hmang ve dawn rih lo
Football ngainatute bengverh tak chu UEFA chuan he dan thar hi an tournament-ah an hmang ve dawn rih lo tih hi a ni. UEFA official-te chuan ka hup avanga red card pek nghalna dan leh player-in referee thutlukna a duh lohzia tihlanna atana pitch a chhuahsan avanga red card pekna dan te hi UEFA Champions League leh Europe tournament dangah an hmang rih lo ang tih an sawi.
World Cup-ah he dan thar hian engnge a an tih an en phawt ang a, chumi hnuah chuan season lo awm turah hman ve chi a ni em tih an ngaihtuah chauh ang. League tam zawk pawhin FIFA ke pen hnu leh kalsiam an nghah phawt a rinawm.
2026 World Cup-a dan thar hman dangte han tarlang ve ila:
Ka hup khapna dan bakah FIFA-in dan thar a hman te chu-
- Throw-in leh goal kick-a hun khawhral venna atan five-second restart countdown hman a ni.
- Ten-second substitution rule: Player thlak chuan field a chhuahsan vat a ngai. A nih loh chuan a team-te chuan rei lo te chhung player 10 chauhvin an khel ang.
- VAR thuneihna tihpun a ni: Video official-ten thil tam zawk an en thei tawh ang. Player hming hriat sual, yellow card pek dik loh leh attacking foul ṭhenkhat te pawh an ennawn thei ang.
- Hydration break: United States, Canada leh Mexico te hi ram lum a nih avangin match tinah tui in chawlh a awm zel ang.
- Goalkeeper injury delay khapna: Coach-ten injury chawlh hmanga timeout an neih ṭhin chu tih tawp a ni.
- Referee thutluknaah a lawm loh avanga player-in pitch a chhuahsan chuan direct red card a hmu ang. Team-in match an tihtawp chuan an chak lo nghal ang.
FIFA-in a tum ber chu football hmuhnawm leh changkang, dik zawk leh hlu zawk chhawp chhuah a ni.
Almirón-a'n eng nge a hmachhawn ang?
Red card a hmuh avangin Almirón hian Paraguay Group D match hnuhnung ber tura Australia an khelh hunah a khel thei dawn lo. He match hian knockout stage an pal tlang dawn nge dawn lo tih a hril tawh ang. FIFA-in an endikna azirin hremna dang pawh a tawh belh thei bawk.
Goal mawi tak thun avang ni lova World Cup-a sawisel hlawh tak dan thar hmanga red card hmu hmasa ber a nih avang zawkin Almiron-a hming chu football chanchinah ziah lan a ni reng tawh ang.
June 20, 2026-a Paraguay leh Turkey inkhelhnaa Miguel Almirón-a red card hmuh hi World Cup-a dan thar hman ṭan a nihzia lantirtu langsar tak a ni. Dan khirh zawk, VAR thuneihna zau zawk leh player-te chetna chungchanga kaihhruaina thar hmangin FIFA chuan football a siam danglam mek a ni.
Miguel Almirón-a red card hmuh hi red card dang ang mai mai a ni lo. Football khawvelin dan thar leh hun thar a luh tak takna chhinchhiahna a ni kumkhua tawh ngei ang.
Barcelona-in la Liga title an hlawh chhuah ann lawmnaah footballer naupang leh tha za tak Lamine Yamal-a'n Palestina hnam puanzar a vai a, hei hian nghawng a nei thui hle a, Israel Defence Minister chuan he footballer hian Israel mite rilru a tina takzet a, thinurna chi a tuh thar a ni, tiin a sawisel nasa hle.
Spanish league title inchuha hnehna an chan avangin Barcelona team-te chuan May 11, 2026-ah khan an chakna lawmin Bus thaw-rawng hmangin khawpui chhungah kawng an zawh a, Barcelona tualchhung sanaa tlai dar 5:00-ah a lawmna an tan a, India sana chuan zan dar 8:30pm a ni. Tualchhung thuneitute sawi danin mi nuai sarih leh singnga zet an pungkhawm a, Barcelona chakna hi an lawm ta a ni.
A lawmna kawngzawhah hian kum 18-a upa Yamal-a chuan bus chung atangin Palestina flag hlai tha tak chu uar takin a vai a, hei hi social media hrang hrangah a darh nghal a, khawvel a al chhuak rang hle. Amah ngei pawh hian a thlalak hi a instagram account-ah a post zui ve bawk a, faktu leh seltu a ngah hle.
A tuk thumna, May 14, 2026-ah chuan Israel Defence Minister Israel Katz chuan social media X kaltlangin footballer la naupang tak hi a dem thu a rawn chhakchhuak a, October ni 7, 2023-a Israel chunga thil thleng rapthlak tak phuba lakna atana Israel-in Hamas laka chet a lak mek laia hetiang thil a thleng hi a pawi takzet a, Israel mite thinlungah thinurna a tisosang zual sawt a ni a ti.
Katz hian mipui pawisawi lo thah hreh lo leh Israel chhiatna duh rengtu chu Hamas te hi an ni a, October 7, 2023-a thil thleng khan hei hi a tichiang hle a ni. Hamas tan zawnga chet lakna leh intarlanna reng reng chu mihring nunna zah lohna entirna a ni a ti bawk.
Israel minister hian FC Barcelona pawh Yamal-a chet dan hi pawmpui lo turin a ngen a, tharum thawhna leh rawlrala chetna reng reng an thlawp lo a ni tih lantirna atana thuchhuah siam turin a phut bawk.
Sawiselna tam tak awm mah se report tam tak chuan Yamal-a hian vantlang hmaah Israel kalh zawngin emaw, huatna thlen zawngin emaw thusawi a nei lem lo bawk alawm mawle tiin an tan ve thung. A pawi ta ber zawk chu Palestinian flag a vai kha a ni a, Israel leh Gaza inkar buaina awm mek kara khatiang thil a thleng kha chu a fuh lem lo hle a ni.
Kan sawi tawh angin a thiltih avang hian ngaihdan a phir hlawk a, Palestina tantute chuan Yamal-a thiltih kha thil dik tak, Gaza-a neksawrna tuar mekte inzawm khawm tura infuihna tha tak a ni an ti. A sawiseltute ve thung erawh chuan indo mek laia khatianga chetna khan inthendarh lehzualna leh inhuat zualna bak a thlen lo ang an ti ve bawk. Infiamna ngainatu mi tam tak chuan infiamna huangah politics tui-nu a lut tur a ni lo a, infiamna tualzawl hi politics thila hamthat lakna atan leh remchang zawnna atan hman zui zel a ni tawh tur a ni lo an ti.
Barcelona manager Hansi Flick pawhin a ngaihdan a sawi a, "Hetiang thil a thleng hi ka duh lo takzet" a ti. Flick-a hian sawi zelin, "A hma pawhin Yamal-a hnenah chak kan lawm a nih chuan politics a tel tur a ni lo va, football chauh kan ngaihtuah tur a ni tih ka sawi lawk tawh. Engpawhnisela, winger Yamal-a hi a duh dana che tura thu tlukna siam turin a naupang chhia tawh bik lo a, a thutlukna chu ama kuta innghat liau liau a ni e" a ti bawk.
Chak an lawmnaah vek hian Barcelona striker Robert Lewandowski pawhin Catalan independence a thlawpzia entirna atan flag chi khat - 'Estelada' a vai ve tho a; nimahsela ani erawh chuan sawiselna a tawk nasa ve lem lo thung.
Tun hnaia thil thleng hian a kang kai zau hle a, Gaza-a Israel chet dan duh lohna lantirna Europe leh khawmualpui hrang hrangah huaihawt a nih phah a, sports huang mai bakah hnam thil entirnaah te pawh lantir a ni hial bawk. Report thenkhatin an tarlan danin tun hnaiah mai pawh khan Spain ram bikah chauh pawh Palestina thlawpna tum engemaw zat lantirin kawngzawh huaihawt a ni tawh a, buaina tenau pawh a chhuak fo a ni awm e. Israel chet dan a duh lohzia lantirna atan Spain hian Europe ram dang tam takte ang bawkin kumina neih tur Eurovision Song Contest-ah pawh tel loh tlang a tum nghe nghe a ni awm e.
Lamine Yamal-a hi footballer lar mek tam tak zingah a thiamna leh theihnate thlirin hma hun eng tak nei zingah a langsar hle. Kum 18 leka upa a ni chungin Barcelona winger hi club tan leh a ram tana innghahna kulhpui a tling der tawh a ni.
Kum 2024-a UEFA Euro-a Spain an champion theihna atan Yamal-a hian a thawh hlawk hle a nih kha. Kum 19 a tlin hma hauhin Spain tan international cap 25 leh goal 6 a hlawh chhuak der tawh.
Tunah chuan FIFA World Cup 2026 hian football ngainatute rilru a luah lian hle a, Yamal-a hi Spain tana player thawhhlawk tak a nih a rinawm leh hle. Spain hian June 15-ah Cape Verde an tum dawn a, June 21-ah Saudi Arabia niin June 27-ah Uruguay an tum bawk ang.
Tun thlengin Lamine Yamal-a leh FC Barcelona atangin Israel laka insawifiahna leh thupha chawina siam a la ni lo. Infiamna chanchin ziahna chanchinbu lian tak takah chuan sawi zui a la hlawh hle a, khawvela buaina lian thlengin football thlenga nghawng a neih nasat theihzia sawina thuziak chhiar tur tam tak a pun phah hluai mai a ni.
Tun thla October 22-ah hian AFC Champions League 2 group stage pualin Al Nassr leh FC Goa chu India ramah an inkhel dawn a, a khelhna Club berin India Club an tum dawn avangin football pasaltha Cristiano Ronaldo chu India ramah an club tan a rawn inlan ve dawn em tih chu Football tuipuitu mi tam tak te ngaihven ber pakhat a ni mek.
Goa CEO Ravi Puskur chuan mi tam takin Portuguese star hian a club tan India ramah football a rawn pet dawn e tiin thu a chiang ta niin an sawi a; nimahsela a rawn khel ngei ngei dawn tih hi thu chiang a la ni lo a, a khelhna Club ber pawhin official takin thupuan an la nei lo a ni a ti. Al Nassr Club-a player zawng zawngte India-ah an lo thlen theihna turin visa an buaipui mek a, an zavaia an lo luh hi remtihsak an ni dawn em tih hi a la hriat chian theih loh a ni a ti bawk.
Puskur sawi zel danin India ram leilung ngeiah Cristiano Ronaldo hian a thiam thil a rawn lantir dawn a nih ngat chuan khawvel huap pawha Company lian ber berin an Company fakna atan sum tam tak senga sponsorship rawn tih an duh thu an rawn thlen nasa tawh hle a ni awm e.
Ronaldo hi a rawn kal a nih ngat chuan India ram Football History ropui ber a ni nghal dawn a, an Club tan pawh sum leh paiah dinhmun sawhngheh lehzualna remchang tak a ni bawk ang a ti. Chutih rual chuan Ronaldo an rawn hruai ngei theih nan FC Goa-in Al Nassr Club hi sum engemaw zat pek an tum tih thu thang awm chu thu belhchian dawl lo a nih thu a tarlang nghal bawk.
Goa CEO chuan - ''Club te leh rethei kan ni a, player pakhat a lo tel theih dawn chuan pawisa kan pe ang che u ti tur khawpin sum lamah kan lian lem lo bawk. Amah Ronaldo zawk hian kan Club hi lei duh ni sela chu sum lamah a buai loh em avangin minute 5 chhung lekin min lei thei zawk ang chu'' a ti zui nghe nghe.
Kum 40 laia upa ni ta Ronaldo hian kum 2023 January thlaah khan Al Nassr Club hi a zawm a, an Club tan goal 98 a thun tawh a, asisst 20 a nei tawh bawk. Kum 2023 leh 2024-ah Saudi Pro League Golden Boot lawmman a dawng a, season khatah goal 35 a thun hman a, Al Nassr Club tan chuan tuma han er phak loh khawpin dinhmun chungnung berah a thu mek a ni.
Liverpool leh Portugal forward Diogo Jota chu an ram Spain sanaa zanlai dar 12:30-ah khan Car accident avangin Spain-ah a thi. Keini India sanaah chuan July 3, 2025 zing 4:00am vela thleng ang a ni.
Diogo Jota hian June 22, 2025-ah khan nupui a nei a, nupui neih chawlh a hman mek lai a ni nghe nghe.
Kum 28-a upa Jota leh kum 26-a upa a nau Andre Silva te chu Spain-a Zamora kawngpui A-52-ah Lamborghini car-a an chuan laiin car ke hi a puak a, car hi thunun theih loh ni nghalin a let a, a kang zui ta nghal ni-a sawi a ni. He car accident-ah hian Jota leh a nau hian vanduaithlak takin nunna an chan ta a ni.
• A khelh mekna Liverpool FC chuan an player thihna hian a thawn takzet thu leh pawi an tih thu an chhuah nghal a, Jota chhungte chu an mangan laia be buai rih lo tura ngenna mipui hnenah an siam bawk.
• Cristiano Ronaldo pawhin pawi a tihzia sawiin - "Thil thleng hi pawm thiam a harin awih harsa ka ti hle mai. Mumal ka nei lo a ni ber e. Ram tana football kan khelh dunna a la rei loh tehlul nen....muangte'n chawl ang che u aw Diogo, Andre...in chhungte zawng zawng tan thlamuanna ka dil e" tiin.
• Liverpool manager Jurgen Klopp chuan - "Ka rilru a na takzet. A na ka va ti tehlul em. Diogo hi player ropui a ni ngawt lo, pasal tha tak leh chhungkaw pa nih tling tak a ni" a ti.
• Portugal-a a khelhpui Ruben Neves chuan - "Mi kan theihnghilh rual rual hian kan chân hlen nghal tihna a ni an ti thin, ani erawh ka theihnghilh ngai dawn lo" a ti.
• Liverpool-a a khelhpui Darwin Nunez chuan - "Ka rilru natzia hi ka sawi chhuak thiam lo. I nui hmel kha a châm reng dawn a nih hi. Muang takin chawl ang che" a ti.
• Steven Gerrard (stiven gerrard) leh Jamie Carragher (jeimi karraghar) te pawhin- "A va lungchhiatthlak tak em aw. A nupui leh a fate kan rilruah an cham reng mai. Muang takin chawl ang che aw Diogo" tiin.
• NBA star LeBron James chuan - "A kalsan a chhungte tan ka tawngtai e. Mahniin i awm lo va, thlaphang suh aw Jota" a ti.
• Portuguesse Football President chuan - "Mi hlim thei tak leh ngilnei tak a ni. A thihna hi kan zavai tan channa nasa tak a ni" a ti.
• Portugal Prime Minister chuan - "Kan ram tan leh football tan vawiin hi ni lungchhiatthlak tak a ni" a ti.
• Football fans tam takin an ui thu leh pawi an tihzia thu an puang chhuak nasa hle a, Jota leh a unaupa thihna an tuarzia lantir nan Anfield-ah pangpar kengin an kal a, an tap a, an tawngtai chuah chuah bawk a ni.
• Portuguess Football Federation chuan - "Diogo Jota te unau thihna hi channa nasa tak a ni" ti-a thu chhuahin "Diogo Jota hi mi bik tak a ni a, mi hlim thei leh nui peih tak niin a bula mite chawk hlim thintu a ni" an ti.
Jota hian kum 2020-ah Liverpool FC a zawm a, vawi 183 inlan tawhin goal 65 a thun tawh. Premier League leh FA Cup leh League Cup no mawi a lo chawipui tawh a ni.
Portugal tan vawi 49 a inlan tawh a, goal 14 a thun tawh bawk. Kumin 2025 UEFA Nations League-a Portugal champion theihna tura a kila tangkai tak pakhat a ni nghe nghe.
Hun rei tak a lo kawp tawh a bialnu Rute Cardoso nen June 22, 2025-ah khan hlim takin tiam tlat e an ti ta nge nge a, fa pathum an nei tawh bawk.
Diogo Jota hi mi hlim thei tak a ni a, a thiante tihlimtu a nihna leh a inngaihtlawmna avang hian Football Team-a a khelhpuite hian an hmangaih em vek mai a ni.
Footballer rintlak leh thiam tak a nih piah lamah a chhungkua ngaihsak em emtu a nihna hi mi tam takin an ngaihsan chhan lian tak pakhat a ni a, hetia a vul lai a tawi ta lutuk hian khawvel dapin mi tam tak a vel tap mek a ni.
