PATHIAN THUHRILTU ROPUI JOHN HARPER

April 14, 1912 zan a ni a, RMS Titanic lawng lian leh ropui, “Tuipui chunga Lal In” ti hiala an koh chu Atlantic tuifinriat vawt leh dam dup chungah chuan thalfang thlawk ang maiin a tawlh per per mai a, History phekah a hming a chuang dawn tih hrelawk zet se chuan chawpchilhin a ding duh mai awm asin. He lawng hi a hunlai mihring thilsiam zinga lian ber a nih mai bakah mi hausa tawntaw tam tak a phur mek a, khawvel hausakna a phur pawh kan tithei awm e. He zan tihbaiawm takah hian lungmuang taka an awm laiin, Southampton an chhuahsan dawna Pi Albert Carwell-i zawhna pawh, “He Lawng hi a pil thei lo,” tia lo chhangtute chuanna ngei chuan vur tlang a tai ta bur mai le! Watertight Compartment paruk lai chu tuiin a chim ta pung pung mai.

He lawng chapo takah hian Pathian thuhriltu thahnemngai tak John Harper leh a fanu duat em em kum ruk leka upa Nana chu Nana ni Jessie Leitch nen an pathumin second class-ah an chuang ve a. Nana hi a nausen laiin a nuin a lo boralsan tawh nghe nghe a ni. An chuanna chu a pil ngei dawn tih a chian hnuah chuan Harper-a chuan a fanu leh Jessie Leitch chu chhanchhuahna lawnglengah chuan a dah a, amah pawh chuang ve nghal tura lawng sipaite’n an tih pawhin a duh ve tlat lo! A fanu chu duat taka fawpin, nakin lawkah hlim takin an inhmu leh dawn tia a thlah hnu chuan he khawvela lei taksa pu-a intawng leh ngai tawh lo turin a kalsan ta a ni.

John Harper-a hian tuifinriat-ah hian an pil dawn tih a hrechiang kher mai. A fanu a mangtha hnu lawkah chuan thil ri ring tak lo chhuahna lam chu aan hawi thap a, lawng chu a lai takah a lo bung fel der tawh a. Lifeboat-a chuang ve lo mi 1528 zet chu Atlantic tuifinriat vawt em em leh rapawm zet chungah chuan mahni nunna hum tumin an talbuai kher mai. Pathian tana thahnemngai John Harper-a erawh a nun hum tuma buai a ni ve lo; midangte Isua ke bula thlen tuma buai a ni zawk asin!! A piah lawka lawng them chunga thlaphar leh ring taka lo au mek tlangval hnenah chuan, “Chhandam i ni tawh em?,” tiin a va zawt a. Chu tlangval chuan, “Aih, chhandam ka la ni lo,” tiin a lo chhang thuai a. Harper-a chuan zam hmel pu hauh lovin a pil tur insiamrem pahin Isua chanchin a hrilh mawlh mawlh a. A zawhna ngai bawk, “Chhandam i ni tawh em?,” tiin a zawt leh a, chu tlangval pawh chuan, “Aih, chhandam ka la ni lo,” tiin a lo chhang ve thuai bawk a. Harper-a chuan a life-jacket chu phelhin chu tlangval hnenah chuan, “Hei hi ha rawh, kei aiin i mamawh zawk e,” tia pek leh midang hnena kal chu a rual a. Rei vak lo hnuah chuan rawn let lehin Isua ke bulah a thlen thei ta nge nge a ni. Hemi zana mi 1528 phu suau suau zinga mi paruk chu chhanchhuah an ni a, heng zingah hian he tlangval piangthar pawh hi a telve nghe nghe a ni.

Lawng pil hnu kum liah chuan Canada ram Hamilton hmunah Titanic lawng atanga chhanchhuahhote an inhmu khawm a. Chutah chuan Scott tlangval a lo ding chhuak a, “Kha mi zan rapthlak takah khan Glasgow khuaa mi John Harper-a khan duhsak takin, ‘Chhandam i ni tawh em?’ tiin min zawt a, kei chuan, ‘Ni lo’ tiin ka chhang a. ‘Lalpa Isua ring rawh,’ tiin thaw hlawp hlawp chungin Lal Isua khawngaihna thu min hrilh a, ani chu a pil hlen ta a. Kei hi John Harper Crusade hnuhnung bera piangthar hnuhnung ber ka ni ang,” tiin a sawi a ni!!

• John Harper-a hi kristian tha tak nu leh pa karah kum 1872, May 29th khan a lo piang a, kum 13 lek a nihin Krisrian nghet tak ni turin a inpe a, kum 17 anih chuan rawngbawlin a chhuak der tawh a ni. Thahnemngai taka rawng a bawlna chuan mi tam tak piantharna a thlen thin a, Krista tana sengkhawmtu ropui tak a ni. Kum 1896 khan Harper-a chuan kohhran a lo nei hrang ta hial a, tunah chuan Herper Memorial Church tih a ni ta thung. Thilmak ve deuh chu- Herper-a hian tui lamah accident tum hnih a lo tawk tawh a, hei hi training a lo neihlawkna pawh a ni mahna le. A fanu Nana hian a pa a ngaih thu hi a sawi fo thin a, a lainatawm thei hle. Kum 1986 khan a nu leh pa lenna ram panin he khawvel hi a lo kalsan tawh a, a ni Jessie Leitch pawhin kum 1963 khan he khawvel hi a lo chhuahsan ve ta bawk.

Krista tana sengkhawmtu ropui Rev. John Harper chanchin hi he khawvel leh Van nunah pawh theihnghilh a ni tawh lo ngei ang.