RUL CHUK CHUNGCHANG (Medical Science atangin)

RUL TUR: ’Rul tur’ kan tih hi a nihna takah chuan rul chil hi a ni. Chawngkawr lehRulngan tur hi a fim kak mai a, rawng eng langtlang thei niin, a ban deuh bawk a. Ni saa pho hian a phuan deuh thin. Russell’s viper tur te erawh chu a var emaw a eng emaw ve thung a ni. Rul tur te hi thil chi hrang infinkhawm a ni a, protein a tam a,enzyme pawh a awm nual bawk.

Enzyme hnathawh dan nen pawh a inang hle. Protein te chu- coagulant, fibrinolytic,proteolytic leh neurotoxic te an ni. Enzyme te chu- Proteinases, L.arginine ester hydrolases, transaminase, hyaluronidase, phospholipaser A, B, C,D, ribonuclease, deoxyribonuclease, phosphomonoesterase, phosphodiesterase, 5-nucleotidase, adenosinetriphosphatase, alkaline phosphatase, acid phosphatase, NAD nucleosidase leh endonucleases te an ni.

Tin, acetylcholine leh 5-hydroxytryptamine te a pai bawk. Proteolytic enzyme hian tissue a tichhia a; phosphatase hian lung hnathawh a tibuai a; neurotoxins hian zenna a thlen thin a; hyaluronidase hian rul tur a semdarh thin a; lecithinase hian endothelial cell a tichhe thung thin. Rul tur te hi vein pawnlang leh lymphatics hmangin taksaah a taidarh thin.

SIGNS & SYMPTOMS :  Tur nei lemlo pawhin mi an chuk ve fo thin. Rul chuk tam zawkah hian rul hian tur tlemte an thun chauh zawk a;chuvang chuan an tur hlauhawm dan atanga chhut chuan a symptom te hi a nasa lem lo hle. A symptoms langsar ber chu hlauhna hi a ni. Hlauh lutukna avangin damlo chu a taksa a lo vawt a, a thidang thei a, a pulse hmuh loh palh te pawh a awm thei bawk. Tin, a thaw a lo rang em em thei bawk. A chang chuan psychological shock leh thihna hial pawh a thleng thin. 

Signs & symptoms hi a hnuaia point a zir hian a nasain a nep thei bawk:-

(a) Rulin taksaa a chukna hmun, a thuk zawng leh a chuk tam dan a zirin.

(b) Rulin a chuk rei zawng.

(c) Rul thinrim dan a zirin. Zana chuk leh a muhil lai tihharh avanga a chuk hi a hlauhawm bik em em.

(d) Taksaa tur a luh tam dan a zirin.

(e) Rul species leh a len zawng.

(f) A ha uingho(fangs) awmdan a zirin.

(g) Damlo upat leh len zawng a zirin.

(h) Rul hriselna dinhmun.

(i) First aid leh medical care.

    
* Rul tlemte ka rawn thailang e-

@ Chawngkawr& Rulngan : A chuk atanga minute 6- 8 ah a symptoms a lang tan thin. A chukna hmuamhmaah vual ang mai hian a rawn sen tut thin. A hmuamhma hi rawn na tanin, sa deuh hut hut hian a taidarh thin a; tin, a hmuamhma atangin tuihnang, thisen nena inpawlh a rawn chhuak bawk. Taksa vung hi a nasa lem lova,; a awm lo thei bawk. Dam lo chu a mut a lo chhuak a, a rui deuh chhalh a, a kut leh ke te chu a zawi em em a, din leh kal a harsat hle. 

A chuk hlimchhawnah chuan luakchhuak leh luak hi a awm ve thin bawk. Tihrawl te lo chak lo zual zelin, a tawpah phei chuan ke te a lo zeng ta thin a. Dul leh awm lamah darh chho zelin lu pawh hmalamah a lo thlep hnawk tawh thin. Mitvun pawh a lo inkharping bawk. Darkar chanve atanga darkar 1 hnuah chuan chil chu a far hian a far zawih zawih tawh a, a luak deuh reng bawk. Hemi hnuah hian lei(tongue) leh hrawkhrawl chu vungin a lo zeng ta a, chuvamg chuan thil ei leh tawng a lo harsa ta hle bawk.

Darkar 2 hnuah chuan taksa zeng tur ang zawng zawng te chu a lo zeng ta a, thaw a lo muang tain, lungphu erawh a lo rang ta hle thung. Damlo chuan chhia leh tha hre vek mahsela, a tawng thei tawh lo thung.

@ Tui rul( Sea snakes) : A chuk atanga darkar 1 velah dam lo chuan na a hre tan a, taksa lo khawngin, skeletal muscle te a lo zawi ngawih ngawih thin. Kut leh ke a zawi a, thil ei leh lem a harsa a, thawk a buaiin, taksa pum zawi ngawih ngawih leh khawsik sang tak a lo awm thin. Kal hnathawh a buai thei bawk.

FATAL DOSE : Chawngkawr & Rulngan tur 12 mg. lek pawh hi thihpui tham a ni. Russell’s viper- 15mg; Echis- 8mg; Krait- 6mg. Chawngkawr leh Rulngan hian an vawi khat chuk hian dan naranin tur 170-325 mg vel taksaah an thun hman thin.

FATAL PERIOD : Chawngkawr chuk atanga darkar 6 chhung hian thìhna a thleng hman thin. Viper(note hring chi rul) ah erawh ni 2 chhungin a thleng thung.

DIAGNOSIS : Radioimmunoassay method hmangin awlsam takin a hmuhchhuah (diagnose) theih.(USA ah chuan). Tin, damlo zunah a hmuh theih bawk.

FIRST AID :

1. Damlo chu tawng thlamuan rawh.

2. A chukna hmuamhma bulah bandage hmangin tuam tlat rawh; hei hian superficial veins leh lymphatics te a hnawhping tlat tur a ni. A tur tawn khalh tur tihna a nih chu.
 
3. Taksa tihchet loh a tha.
 
4. Rul ha uingho(fangs) hnuhma kha taksa dungzuia 1cm a sei leh 3mm a thuka zai tur a ni. Hei hi tur pai thisen leh lymph tichhuak tura tih a ni.
 
5. A hmuamhma chu saline emaw, tui thianghlima silfai tur.

TREATMENT: A rang lama polyvalent antisnake venom injection lak nghal tur. 20ml taksaa thun tur a ni a, a symptom a la awm cheu a nih chuan darkar 1 hnuah lak leh tur. A la reh lo cheu a nih chuan a reh hma chuan darkar 6 dan zelah lak zel mai tur a ni.Antisnake venom hi a awm loh chuan 40ml of antivenene i.v. hi a hman theih bawk.Tetanus antitetanus injection pwh a tha bwk. Zeng ven nan-neostigmine.