KA RILRU AN KHAWIH HLE MAI

Vawiin 18.6.2013 (Thawhtan) chu ka thian pahnih Assam Regiment haw tur ka buaipui a. Heta ka thiltawn hi ka theihnghilh tawh ngai lovang:-

1.  Chawhnu her, Behliang mun hun velah chuan KFC ei turin building lian tak chu kan pan a. Tualah chuan Mo thuam ngei mai, var taka lo inthuam chu kan hmu nawlh mai. Amah pawh chu mizo hmeichhia ngei a ni bawk si! Thildang zawng zawng aia ven har ‘Lei’ chuan, “Tunge aw? Mizo min tihmingchhe mange aw’ tih chu a puangchhuak nghal zat nia mawle. Vaiho lah chuan an lo bawr vut vut mai si a, a kalpuitu lah chuan Mizo an nih thu leh an tih chu a lo hrilh ve bawk a. Nuih a za duhin mit fukna ber an ni chiang khawp mai. A then phei chuan mo lawm an ni ang kan ti bawk a. Mopa hmel lah a lang bawk si lo.

Anmahni ka han belhchian hnu chuan ka zak ta chem chem zawk nia mawle! Ka va te tehlul em. Vaiho leh a mizopui ngeite pawhin mak thlira kan lo thlir kha a lo va zahawm si em! Mizoram atanga rawn kal a nih thu leh Pathianin Guwahati hmuna a thu puang chhuak tura a tirh thu leh, kawtthler hrang hranga an au tawh thu min hrilh a. Cable TV lam pawhin lo Focus tawhin, “He Guwahati hmuna Lal Isua la hre lo te hi Lalpa’n a hmangaih em em che u a, Amah pan turin a duh che u a ni,” tiin chanchin tha an lo puang tawh asin. Keiniin a lum tih luat avanga Cold Drinks nena kan chet laiin ani chu tirh a nih angina a mo thuam var nen ngei, lukhum nen chhun ni sense vawl vawl, a lum luat avanga mi panga chuangin nunna an lo channa hmunah ngei chuan mite nuihsan hlawhin Krista Chanchin tha a lo puang a nih chu!! A kalpuitu Guwahati nu pawh hi a fakawm hle mai, vai tawng nen lam a tulna hmun apiangah a lehsak a, ei tur nen a zui nileng ve thak bawk nia. Mak tia thlirtute zinga mi ngei pawh, “Lalpa’n malsawm che u rawh se, ka lawm hle mai,” tiin min la thlah ta zui lehnghal. Ka zak lutuk tlat. Lalpa’n hualhim zawk mawlh rawh se.

Pathian thu zawmtute hi khawvel mite mithmuhah chuan an lo va a tak em; nimahsela Pathian mithmuhah chuan an fing hle si a tih te rilruah a rawn lut zut zut a. Sermon-a kan lo ngaihthlak tawhte pawh min hriatchhuah thartir uar uar mai-

Vawi khat chu London khawpuiah khuan mi danglam tak mai pakhat a awm a. Ni khat chu “Krista tana mi â ka ni e,” tih hi a kawr hmaah a tar kulh mai a, chuti chung chuan bazaar lun laiah a tei a tei kual a. Mite chuan hmusit takin an nuih ru tet tet hlawm a. A tuk lehah phei chuan a kawr hnung lamah chuan thuziak dang a rawn tar belh chhah leh a. Mite chuan nimin lam aia â zual sauhva ngaiin an nuih a za lehzual a. Amaherawhchu a hnung lama thuziak chuan mi thenkhatte thinlung a khawih ta riau mai a, chuta thuziak chu, “Nang tu tana â nge i nih ve?” tih hi a ni. Mite chuan Krista tana â kan nih loh vek vek chuan Setana tan kan â lo thei lo a ni tih an ngaihtuah zui ta a.Chu pa chu nuihzat ngawt tur a nih lohzia an man ta a. Tirhkoh Paula ngei pawh kha thiamna lamah chuan Gamaliela ke bula sei lian ngat a ni a, tunlaia Ph.D kan tih ang hi chu a ni ngei ang. Nimahsela, “Keini zawng Krsta avanga mi â kan ni e,” a ti tlat mai. Ka unau duhtak, Krista tan i a ve ngam dawn em le?

2.  Zan tirah chuan thiante nen kan inthen ta a, Suit Case pu chung chuan Room lam panin pavement-ah ka inpu haw vawk vawk a. Ngaihtuahna kawm kual mai mai paha kal zel chungin ka hmaa mipa naupang pathum, kum 15 bawr vel rual kal pawh chu ka lo chik lem lova. Ka pheikhawk char tha ve tak mai chuan naupang/rawlthar pakhat vawthlep (Slipper) veilam chu ka lo va rahbehsak palh chu niin. A pai chawn mai a, mi rawn en zawk a, kei pawh ka ding chawp ve mai bawk a. Ani pawh chu a kal ve mai bawk a, kan tha tlangah ngaiin mipui zi nuai nuai karah chuan ka inpu leh luk luk mai a. Nimahsela pen hnih thum ka pen hnu chuan thil hriatchhuah ka nei ta:- Chu naupang chuan a vawthlep chu phelhin a lo kalsan daih nia mawle! 

A pahnih chuan a lo kalsan a lo ni a, ke lawnga a kal auh auh chu ka va hmu leh thin a, ka thil put bawr vei nen ka va umpha thei mai bik si lo. Ka’n lehhawi chuan ka rahna hmuna a slipper hnutchhiah pawh chu ka va hmu hram bawk a, mak ka ti hle mai. A hmel han en lah khan mihausa fa a nih a rinawm bik si loh. Kha vawthlep nei tur pawh khan a nu leh pate chuan zan rei lamah mi bawlhhlawh paih chhehvum haiin an tlaivar hial pawh a ni thei asin. He vawthlep hi keimah vang liau liaua kalsan a niin ka hre tlat a, ka inthiam thei thlawt lo a ni. A veilam chauh kha ka rahpalhsak kha a ni si a, engati nge a dinglam pawh a phelh kher le? Amah aia rethei zawkte tan a hnutchhiah zawk emni? Zawhna hlir mai ka rilruah a lo lut zut zut a, a chhanna erawh a rawnlut thei bawk si lo. Hriatthiam har ka tiin amah khawngaihna chuan mi rawn bual nghal a, mahni inthiam lohna hruiin mi vet bawk si. Ka lo rap palh kher kher chu ka inchhir ngawt mai. Tun hnuah chuan ka fimkhur zual tawh ngawt ang. A kalpui a thiante tal khan engah nge an khaisak loh? Phelh vek turin an hrilh zawk emni ang? Ka rahpalh hnu pawh khan kalve leh nghal mai awm tak aw. Hriatthiam loh zirlai a va ni tehlul em. 

A tawpah chuan, “Inngaitlawm leh phunnawi lo apiang hi chawimawi phu leh mi zahawm chu an lo va ni tehlul em” ti chung zelin hnuk ulh teuhin ka haw ta hnak hnak a.

“Chutichuan, tupawh he naupang te anga inngaitlawm apiang, chu mi chu van ramah chuan a ropui be rang”. (Mt. 18:4)

“Tupawh inngaihlu apiang an tlawm ang a, tupawh inngaitlawm apiang chawimawiin an awm ang”.  (Mt. 23:12)