Rilru A Tina Thin

Tunlaiah mizo tawnga thû ziak peih tak tak an tam ta hle a, chhiar vek sên a ni lo a tih theih hial awm e. Chutihrual erawh chuan mizo tawng ziah dan dik lova ziak hi an tam zawk hial awm e! Ziah zawm tur ziak zawm si lo, ziah zawm loh tur ziak zawm tlat si an tam hle. Lehkha zir sâng tak tak zingah pawh zu han awm a mawle! Thâwk khat lai khan Central YMA meuh pawhin Press Release a siamah mizo tawng ziah dan dik lovin thu a theh darh nasa hle a, "Ram leh Hnam Humhalh" thupuana hmang mektu pawl kha a ni lawi si!

Mizo thisena piang chhuak zingah hian mahni tawng pawh ziak dik thei ta lo kan tam ta lutuk hi chu mizo tawng humhalh lama thahnemngaite tan chuan a rilru natthlak tak zet. Mizo tawng thiam ber nih erawh a theih loh a nih pawhin mahnia inzir chawp pawhin thuziak tluang pangngai ziak dik thei tur hi chuan a thiam theih si a ni. Middle School-ah te khan Mizo Tawng Grammar Textbook kan zir nasat hlawm em kha mawle! Khang kan thil zir te kha thiam tak tak si lovin kan lo pass-pui mai mai nge mawni dawn ni.

Mizo tawng ziah dan i thiam duh tak zet a nih chuan kan Bible hi inzir nan hmang la; a nih loh pawhin Synod Literature & Publication Board (SL & PB) lehkhabu chhuah te hi inzir nan chuan chhenfakawm tak a ni hlawm. Kohhran pawl rilru la na tak i nih a, SL&PB kutchhuak i ngaina lo a nih erawh chuan "Thu Leh Hla" chanchinbu hi lo kâwm ngun mai teh.

Hmanni khan Pastor Bial pakhat KTP Conference hmang chuan an Bial Chhungah mizo tawng hman uar leh hman dik uar ni se tih an rel a, an agenda chu an thlawpzia sawilan nan "kan agenda hi ka support e" zu ti tluar tluar hlawm si a mawle!!! Sudden Muanga tih dan takah 'Mak thei ngei e'.

Mizo i ni em? I nih chuan mizo tawng i thiam em? I thiam a nih si chuan mizo tawng ziah dan dik takin thu i ziak thiam em?