MIZO TAWNG VE RENG A NI

Tunlai hian mi tam tak ten kan tawng thumal thenkhat, a mala sawr zimin, awmze dang zawk nei leh dik lo riauva hriain, siam that tulin an hria a.A tawi zawngin sawi ta ila, kan mizo tawng hi kan chik tharin, kan analyse sup sup ta ni berin a lang. Hei erawh kan hriat a tha-  thil hi dik awm taka lang,dik hauh si lo a awm tih hi

 

Tam tak awm zingah a hnuaia mi tlemte hi i lo bih thuak teh ang u:-

1. Lu met:  Mi tam takin “ lu met tih hi a dik lo, lu kan meh te chuan lu kan nei tawh nang; chuvang chuan sam met tih zawk tur a ni, sam alawm kan meh thin,” an ti. Dik awm takin a lang; mahse a dik hauh si lo. Lu met tih hi a dik zawk, MIZO TAWNG VE RENG A NI.

2. Veikhawr:  Kut vei lam hmang thiam te hi veikhawr kan ti. Mi tam tak ten, “Hei hi a dik lo,veilam hmang thiam na na na chu veikhawr a ni thei lo, dingkhawr tih zawk tur. ‘Khawr’ chu hmang thiam lo sawina alawm,” an ti. Hei pawh hi a dik lo. Kut veilam hmang thiam zawk chu veikhawr kan ti zel ang. MIZO TAWNG VE RENG A NI.

3. Vawkhniahzawn Thla:  Mizote chuan July thla hi Vawkhniahzawn Thla kan ti. Hmanlai vawk chhuah hun, khawchhiat leh ruahsur tam lai chuan vawk rual hnu hi khawlaiah a zawn zut thin a, chuta tanga rawn piang chhuak a ni. HNIAK chauh hi la chhuaka Vawkhniakzawn Thla tih kher tur a ni lo.Vawkhniahzawn Thla hi a tawk mai. MIZO TAWNG VE RENG A NI.

Awle, sawi tur tam tak awm zingah a chunga mite hi tuna tan chuan duhtawk phawt ila. Remchangah a dang kan la post ziak dawn nia.  Kan thumal te hi a mala khel vak tur pawh a ni lo.Hetianga analyse vak hi kan tum loh zawk, tawng humhalh lohna, tawng tih dazatna a ni tlat. MIZO TAWNG VE RENG A ANI  tih tur hi tam tak a awm a nia.

{misual.com lama ka lo post tawh ka rawn chhuanglum leh a ni e.}