KOHHRAN-A HARHNA HI CHAM HLEN SE

  ( Tirh. 2:1-8, 37-47 )

 Kum 1726 khan Frelingheysen, Gilbert Tennant leh Jonathan Edwards kaltlangin New England-ah harhna runpui a thleng a, ram hrang 150 laiah a kangkai nghe nghe a. Georgia ramah pawh John Wesley kaltlangin harhna a thleng ve bawk. Hei hi Kristian History-ah chuan harhna (revival) runpui thlen hmasak ber a ni ta. Hetiang harhna ropui hi vawiin hian kan chang ve thei em tih hi mi tam tak zawhna a ni ta reng a, a chhanna pawh “kan chang ve thei” tih a ni. Nimahsela hetiang chang ve tur hian tihtur kan nei thung.

Kan Kohhran-ah pawh harh-tharna kan chang mek a, kan chan reng theih dan tur hi Tirhkohte Thiltih Bung 2 atang hian i lo zir ang u:

I. Thlarau lamah inpeihlawk ila (chang.1).

Kalhlen Kut atanga ni 50-naah Pentikos ni a lo thleng a. Pindan chungnungah mi 120 lai rilru leh taksa hmunkhatin an awm khawm a. Heta “an zain” tih hian taksaa awmkhawm piah lamah an rilru chhunglamah pawh an inzawm hle tih a tarlang. (KJV). Rilru hmun khat puin an awm tihna pawh a kawk awm e.

  

Football hi kan en theuh tawh awm e. Heta kan hmuh chian em em thin chu chak tur chuan player-te an tanrual a ngai hle tih hi. Rilru lama inman apiangin a takah an khel tha a, chakna pawh an chang leh nge nge thin a nih hi. Eng anga player mal khaiah chuan thiam filawr nimahse, an Team-ah thawhhona leh inzawmna bulfuk tak tak a awm loh chuan engtihna mah a ni chuang lo.

Hetiang chiah hian harhna tluantling chang tak tak tur chuan thlarau lamah lo inbuatsaih ve a ngai a, duhna tak neih a tul. Mi pakhat duhna mai hian a tlin rei loh chang a awm tam fo avangin mi tam tak ten duh inang chunga harhna hi beisei zel chi a ni ang. Thlarau lamah kan tanrual chuan tisa lamah pawh kan lo inthurual mai dawn tihna a lo ni nghal bawk a, Thlarau a lo zalen nghal bawk dawn a ni. Sim chunga inbunruak leh dilin, kan thil dil kawnga kan inlungrual bawk chuan harh tharna kan chang zel ang.

II. Midang tan nun hmang ngam ila (chang. 4-8).

Thlarau Thianghlim a lo thlen meuh chuan Thlarauvin a tawngtir ang zelin tawng dangin an lo tawng ta a nih kha. Hmun hrang hrang atangin thil thleng hi en tumin mipui tam tak an lo kalkhawm bawk a nih kha.  

Mihring hi dilchhut leh hawkdak tak mai kan ni a. Kawngah accident leh thil te tham tak thleng pawh hi a hmuna en ve kher duh zel mi kan lo ni vek mai nia. Thlarau Thianghlim hnathawh changa Petera te ho awmkhawm pawh kha hmuh chakin an rawn hawrkhawm a ni.

Thlarau lama kan inbuatsaih hnuah chuan kan Pathian hian Pentikos ni-a thil thleng ang kha a rawn thlentir ve ngei ang a,  kan vela mite pawhin engnge thleng tih leh eng mi nge kan nih tih an rawn hre darh tawh mai dawn a, Krista-ah kan awm ta tih an hre tawh ang. Zirtir tlawm tak tak ten Pentikos ni-a khati zat mipui an hip kha a mak zawk ngawt nia! Hlimna awmna hmunah tupawhin awm kan chak a, telve nih kan chak thin a nih hi. Hei erawh hria ila: Ringlo miten an thil hmuh avangin Baptistma an chang a, Pathian chawimawituah an inpe ve ta, a va ropui em! Harhna chan hlawkzia kan tem ve dawn lawmni? Mahni inhaivur rilru pu apiangte hi an rilru a hlim tak tak thei lova, an thla a muang bawk hek lo. Midangte Krista ke bula hruai chu sawi loh, a hnawtdarhtu thawhhlawk tak nihna mai a lo ni. Luang chhuak lo nunah Thlarau Thianghlim a ngam tak tak thei lo a ni.

III. A man pek huam ve ila (chang. 43-47).

Pentikos ni a thil thleng kha Petera’n zirtirna a pek leh mi sangthum baptisma chanah khan a tawp mai lo, kha kha chu a bul tanna chauh a la ni. Zirtir leh inpawlin, chhang phelin, tawngtaiin thahnemngai takin an awm reng a, an neih sumpai pawh an intawm vek bawk. Khhawvel thil pawh kan duh tak tak hi chu a man pek pawh kan inhuam hle a nih hi maw.  Thlarau lam harhna hian mi vakbote Krista ke bula thlen hi a tum ber a ni lova, Krista ke bula thlen hi chu Thlarau lam harhna rahchhuak mai zawk a ni. A hmingin a kawh angin- Pathian mite chawhharh hi a hnathawh a ni. Tihharha kan awm chuan Pathian kan zah a, kawng tam takah Amah kan chawimawi tawh dawn a ni.

Awle, kum zabi 18-na laia harhna ropui thleng hi lo thawnthu thlir mai lovin, kan Kohhran-ah leh vawiinah ngei hian a thleng ve thei a ni tih hriain, a dawnthleng keimahni zawk hi kan inenlet fo a ngai tih hriain harhna duh tak taktu nih tum theuh thin ang u. A lama kan inhawn phawt chuan kan Pathian hi chuan Thlarau Thianghlim rawn tirh hi chu a peih reng a, a dawngtu lam a enlawk hmasa phawt zawk a ni. “Aw Lalpa, Thlarau lama harhna rawn thlen la, keimahah hian tan ang che” kan tingam ve angem le?

“Kei hmun chungnung leh thianghlimah ka awm a, mi thuhnuairawlhte rilru tiharh tur leh inchhir ngawih ngawihte thinlung  tiharh turin mi rilrua inchhir ngawih ngawiha  thuhnuairawlh tak hnenah pawh ka awm a ni.” ( Is. 57 : 15b )